1 Ifa beren ero Hollum to hohonyok illohoi to hekilak hinyiahita arria ojio tekotia ariai. 2 Ati to holoŋitek hunna eliaha wati, ero Hollum to hoi to lonyie honyie, lafa onyimu inyia hotorutak hirro bidaŋ, ati tara honyie atta inyia ayyeu hirro inno fau. 3 Ara lonyi honyie to honyie acialai no kuatan, ojio hidofe ocialari ho Hollum dede ojio inyia ottoŋita hirro bidaŋ to duaran to no honyie. Nafa etilibik inyia hiyyata innohonyie, atta inyia hittole ta hani he inyiet no haduarani te idou, ojio hidofe agalik anjilohien binno to nyo esio ifa hiyyo inyia fure no olibo na agalik inno anjilohien. 4 Obe ifa Hollum emak lobo anjilo hata galik onyi honyi to hikumita , iyya nafa agalihini fure no honyie inne anjilohien. 5 To higierita obe Hollum ero to lobe anjilo hirro inafa elimak inijia to lonyi honyi: "Irra iyye onyi hanaŋ! Ena elimak nayya to hiyyo bi daŋ hijio ara nayya monyohoi!'' Atta inyia hijo to nobo higieri, ''Ahu nayya hirra amonye honyi, ojio inyia ohu hirra onyi hanaŋ''? 6 Nafa eyyani Hollum onyi honyie ille abaŋ inyia, onyi honyie ille lobotie a fau, atta inyia hirro: anjilohien illo honyie bi daŋ anyar omojo inyia.'' 7 Ojio to higieri erro hidofe hirram no anjilohien: ''ŋemak Hollum anjilohien illo honyie hijo hatara alo Oyirihien no ogol no lowuon iyya ŋadiafa inna hima.'' 8 Ati to higierita, egiorohini hidofe inne Lonyi Hollum: ''Iyye lia era Hollum le hikumo man fur, ejio iso iyye ihu hikumo na lobis to lobie no hoi. 9 Emuno iyye hiyyo illohoi illo obe eyyau ejio iyye ebe emuno hiyyo illo owuon he iyyata. Ati Hollum ille emojo iyye, emak iyye hotomune binno agalik lobo lo lowuon.'' 10 Eyyen hidofe iyyohoi hijo lonyi honyi agalik anjilohien to nyo egioro to higierita hiram no lonyi Hollum, "Hollum ara ifa iyye iyyeu fau to hitieri. Atta hidofe iyye ayyeu hirro bi daŋ inno lowuon to fau, hahier ojio hirro bi daŋ inno lowuon to hide. Obe hirro niyya ettok wuana, ati ehu iyye adule wuana man fur. 11 Ofu isia tuho agwasari iyya nia ogwasari boŋojin ade. Ehu iso abibinari isia iyya ara isia 12 boŋojin. Atta ati iyye hiloyyit hirro bidaŋ inno lowuon ta fau hatara innak hirro ŋejuho, iyya tuŋani ille eciofok boŋojin ŋejuho. Ati ittole iso iyye na ociala, ejio iso iyye emanya fur!'' 13 Holobe Hollum eijo innak hirro te illak anjilohien hirro inia ojio inyia to Lonyi honyie: '' Tohunye ta hani he inyiet hanaŋ ejio iyye ekumo daŋ hanaŋ ati ajio nayya ahu himir miorok illohoi bidaŋ anyar ewuon iyye to hide hosie!'' 14 Ara anjilohien jia oyirihien ille efahu Hollum hijo anyar legiama ojio hidofe orriŋa heruhok illo ottu Hollum etilohu daŋ, iyya ojio inyia hiio ahu inyia higiem to hosie.