¹ Iyania ofuo ifa Peturu ho Yoani a haji nettok lomojori ta far imojit nohosie, sa hotoŋwan. ² owuon ifa lobo tuŋani oŋura man tesini lafa oferita te ikat na Haji Imojit nefurak isia hijo, Hilahaman anyar omojori ilwahiti tara hiyo ilo ofuo ahaji Imojit. ³ Ifa legonyu inya Peturu ho Yoani ofuo ahaji Imojit, ata inya mojo ilwahiti. ⁴ Ata Peturu ho Yoani egonyu inya, ata hijo, "Toriŋai te iyohoi." ⁵ Ata oŋura egonyu to hosie, awak ifa inya amoju nobo ilwahit tara hosie. ⁶ Ati ojo Peturu, abe naya ayita yiel iko dahab, ati nayita naya, esio iso nay to hoi. To fure no Yesu Kristo lo Nasarit, toloto." ⁷ Ata Peturu hitidiet inya ahide ta hani inyat: Kokwak ata hejek iko het ino tutunyo inohonye golon. ⁸ Odiote loŋura lia ahide ata loton; ata ajiŋak ho Peturu ojo Yoani ahaji imojit, lesuta, ojo hidofe etihabwo Hollum. ⁹ Ata hiyo daŋ tamai egonyu inya oloton ojo hidofe etihabwo Hollum. ¹⁰ Ahieru isia daŋ hijo tuŋani lia le lafa ettole te ikat, ojo hidofe ara hemimojoni lo hiro te ikat nelahaman na haji imojit; efut ifa isia ho hililiha iko mune to hiro inafa edoŋ to honye. ¹¹ Iya nafa eniefitari inya Peturu ho Yoani, enyior ifa hiyo daŋ to hosie amai nafa Eliloŋo hiyo hijo no Solomone, ilo omuno. ¹² Ifa egonyu Peturu iluluŋ, ata inya hitiraŋ hiyo hijo, "Itai iyo ilo Isarail, no nyo eliliha itai? No nyo eriŋa itai te iyohoi, iya iyohoi ifa etilibo inya hotoloto to golon nohoi kuya to no Hollum? ¹³ Etukwat Hollum la Abramo, ojo lo Isako, ojo lo Yakobo, Hollum lo monyie hohoi hegiamani lohonye Yesu. inya lafa ebo itai ata itai hisio inya to hosiere ho Pilato, ojo Pilato ata ebusak inya. ¹⁴ Ebo ifa itai Haliboni iko Habisani, ata itai hiwak ebusak tuŋani hatohoni ta hatai. ¹⁵ Atohe itai Ettok lo wuaran, lafa etidietu Hollum to yee-- eijo iyohoi era suti ino hiro hunna. ¹⁶ Iyania, to huruk to fure nohonye, ata tuŋani lia eriŋa itai wuana ho golon. Esio huruk nolotu tara Yesu inya libe nelefut, to hosiere hatai daŋ. ¹⁷ Iyania, halasira, ayen naya hijo ehuma itai hiro inia to tume iya nafa egiamari etaha ilahatai. ¹⁸ Ati otubai hiro inafa ero hekilak daŋ to hutuhe te inohose, hijo Otu iso Kristo arumu hitigiama, ati iyania atubak inya. ¹⁹ Itiyite, ata itai ebusak hiyata innahatai, anyar honye efufusori hiyata inahatai ade, ata iso itai arumu wuaran tara Hollum, ²⁰ efahu iso inya Kristo lafa onyimohini ta hatai inya Yesu. ²¹ Inya Lia omoju iso ido man ta far nolotubahini iso hiro daŋ, hiro inafa ero Hollum to hutuhien ino hekilak halibok. ²² Otenu ifa Muse hijo, 'Etidietu iso Habu Hollum hekilani iya naya to hiji ho halasira hatai. Etira iso itai hiro ino lero inya ta hatai. ²³ Etihar iso inya tuŋani to hiji ho hiyo iloobe etira to hekilani lia.' ²⁴ Dede, hekilak ilafa tara Samuele ojo ilafa afanu tahalu honye, ero ojo elimak holoŋitek hunna. ²⁵ Era itai onyirok ho hekilak ojo hidofe himwara nafa ehumak Hollum ho hohonyiok ilahatai, iya nafa lojo inya ta Abramo, 'To hinyomoti lohoi, orumu woyyojin ina fau daŋ jaha tara hoi.' ²⁶ Nafa ehaf Hollum hegiamani lohonye, efahak inya inya ta hatai hosiere, anyar ajak itai nyo eloitu inya itai daŋ tara hibwotita innahatai."