¹ Ifa to nobo far, eba Paulo iko Barnaba te Ikoniom ata ajiŋak to sinagog no Yudea ata hiro to hose to hikoi no eruhori iluluŋ no hiyo ilo Yudea iko ilo Grik. ² Ojo Judei ilafa obe leruk ata hitihara hosi ino Jentail ata ejoriari ilasira. ³ Nia etole isia fuur, ero inya bino to hiŋere ojo to golon no Hollum to hisiara nohonye hituhuta no sayye no hamaihini. Egiem inya to hituhutita ojo hililihita ino legiem has ino Paulo iko Barnaba. ⁴ Ati obwanya ifa iluluŋ no bore gala: otuba ifa ilak hiyo iko Judei ojo ilak iko efahat. ⁵ Nafa eciem Judei iko halufak elimak etaha heruho hiram no hosie hegiama noloru hijo erwoŋ Paulo iko Barnaba. ⁶ Ifa afanu isia etiru hiro niya ata isia huruata abore gala no Likaonia, Listra ojo Derbe, iko ogeri ino mai nya. ⁷ Ojo dia arasa isia daŋ hitiyana sayye ino olibo. ⁸ To Listra owuon ifa lobo tuŋani to hejek ho nye loloye hejek, eyokie ifa inya man to hotwai no hotonye, lafa obe olot man beren. ⁹ Etiru tuŋani lia hiro no Paulo. Adule honyehite ino Paulo to honye toktok ata egonyu hijio owuon inya ho huruk anyar. ¹⁰ Nia ata inya hijo to honye woŋ, "Tete ahide to hejek inohoi" Ata tuŋani lia hisur ahide ata hililoto ta mai nya. ¹¹ Nafa egonyu iluluŋ hiro inafa egiem Paulo ehaf hiro, hose ahide, hijo to hirori no Likaonia ,"Afanu jiohin te iyohoi afau iya rijorihien ino hiyo." ¹² Ata isia efurak Barnaba, "Seus," ojo Paulo a Hermes nyo, ara ifa inya herarani la agalik. ¹³ Fadiri lo Seus lafa owuon haji imojit to oger to bore gala, eyani husuŋ haromok ojo hoyyek imuduti he ikat iko bali. Awak inya iko iluluŋ no hiyo hisio hibulucita. ¹⁴ Nafa etiru Paulo iko Barnaba inia. Ata isia efufutu boŋojin inohosie ade ata aruhuni abali te iluluŋ ilo oyio, hijo, ¹⁵ "Itai hiyo, no nyo egiema itai hiro huna? Era iyohoi hiyo ilo lewuon iko wahan iya nahatai. Eyani iyohoi sayye ino olibo hijo anyar ebusak hiro inia ejo itai efanu to Hollum lo losio fur. Lia oyieu ido iko fau, hariai ojo hiro ino owuon daŋ to hosie. ¹⁶ Ta ŋasi inafa beren ebusak ifa inya hiyo daŋ hoto loto koi inohosie. ¹⁷ Obe ifa inya ebusak wan nohonye obe hutuhuti. Te inia daŋ egiem inya nalanyar adumu inye esio itai hai te ido ojo holoŋ ina olibo, hefutahini tajia ina hatai to ŋiria iko mune." ¹⁸ To hiro inia, etik Paulo iko Barnaba iluluŋ no hiyo inia hotobiaŋa ebulucia to hosie. ¹⁹ Ata ilak iloJudei afanu to Antioka ojo to Ikoniom hiro te iluluŋ nya. Niya ata isia huruoŋo Paulo ata ayatari inya ade to bore gala, egil isia hijo oye ena inya. ²⁰ Niya oweta hejufutak aŋati ata inya diote owu ajiŋak to bore gala. Ifa motie ata isia efie iko Barnaba a Derbe. ²¹ Ta halu ho hilima nohosie sayye to hotwai ho bore gala eruk ifa hjufutak ariaii, aciohini isia a Listra, Ikoniom ojo a Antioka. ²² Odule isia hitigolo hosi ino hejufutak ojo etigolo isia hotoduloi to huruk. Elimak isia isia hijo ara to hitigiemita ariaii, eremik iyohoi ajiŋahini to obie no Hollum. ²³ Ta halu ho hanyimu nohose to hiji he iluluŋi ho heruhok etaha, hahamojok ojo eya, esio isia to Hollum, lia leruk isia to honye. ²⁴ Niya ata isia hilaŋ oko Pisidia ata afanu man a Pamfilia. ²⁵ Nafa atowu isia hiro hiram no Hollum to Perga, ata isia efie Atalia. ²⁶ Teya alaŋ isia to fuluga Antioka nafa eruk isia to hamaihini no Hollum te igiem nafa esahak isia. ²⁷ Nafa eba isia ta Antioka ata atubak iluluŋ daŋ, elimahini hiro daŋ ino egiem Hollum he isia. Iko hiŋa nohonye ikat no huruk jai to hiyo ilafa olufa? ²⁸ Ata isia hitole fuur ho hejufutak dia.