¹ Buk nafa egiorok naya to hoi,iye Tofilo, nafa ero higiemita iko hiro inafa etiyana Yesu, ² man to holoŋ nafa akari inya edo, ta halu ho hisio nohonye hiro nohonye ata elimak Oyiri lo Olibo te efahat ilafa onyimu inya. ³ Ta halu ho hitigiama nohonye, ata inya hisio wan nohonye lo owuar to hosie hatara ahutuhuti no oremik isia huruk. To holoŋitek tomwana aŋwan oliew inya to hosie ata hiro hiram no obie no Hollum. ⁴ Ifa atubai inya ikosie, ata inya elimak isia hotobiaŋa ebusak Yerusalem ati anyar etila itierit tara Monye, hiram nya, ojo inya hijo, "Etiru itai tara nanaŋ ⁵ hijo dede etifoto Yoani to hiffioŋ ati efoto iso itai to Oyiri lo Olibo ta halu holoŋitek ilak." ⁶ Nafa atubahini isia arabotie ata isia hifi inya, "Habu, hara iso mahu holoŋ ina ne eyani ahabwe to Israel?" ⁷ ejo inya to hosie, "Obe ara itai eyen holoŋ kuya okit no ojo monye to hilohittok no honye. ⁸ Ati emoju iso itai golon, lawoŋ Oyiri lo Olibo ta hatai, ara iso itai asuti ilalaŋ man teni to Yerusalem iko to Yudea ojo to Samariai, iko ta ŋacio ino fau daŋ." ⁹ Ifa ejo Habu Yesu hiro huna, iya nafa oriŋari isia ahide, ahafari ifa inya, ojo itiran ata eŋofok inya to honyehite hosie. ¹⁰ Nafa holoriŋa isia eido toktok hololot inya, kwyak, hiyo ohorik weta aŋati hosie to boŋojin ino obuwor. ¹¹ Ejo isia, "Itai hiyo ilo Galilea, nyo eweita itai ini riŋa eido? Yesu ile ore wan eido owu iso inya aciohini to hikoi ina iya nia egonyuni itai inya owuyeri eido." ¹² Nia acohini isia Ayerusalem to doŋe no Oliveto, nafa eliaha aŋati ho Yerusalem, to loton nafa ho holoŋ no Sabato. ¹³ Nafa eba isia, ata isia efie ahide hahaji hitarihi, nafa etolojori isia. Ara ifa isia Peturu, Yoani, Yakobo, Anerea, Phillipo, Tomaso, Batulumeo, Metteyo, Yakobo onyi Alfeyo, Simone. Zealot, iko Judas onyi Yakobo. ¹⁴ Otuba ifa isia nobotie iya nafa odulori isia amojori. Ojo ŋoruo owuon iko isia haba, Mariai hotonye Yesu, iko halasirak honye. ¹⁵ To holoŋitek niya oweta Peturu to hiji ho ilasira, ara 120 fureta, at hijo, ¹⁶ "Ilasirak, etisiru higierita inafa egiorok, hijo erou Oyiri lo olibo to hutuk no Davide to hiram no Yuda, lafa heŋiamitani lo heniefita ho Yesu. ¹⁷ Ara ifa inya lobo lo hoi ata emoju ihoriti ino mai negiem." ¹⁸ (Iyania tuŋani lia enyaŋu fau to higiemita inohonye ino loru, nia ata inya ahuye ikoho ahosiere, ata wan no honye tuada, ata monyiet inohonye apulohini ta fau. ¹⁹ Daŋ hiyo ila amanya to Yeruselem etiru hinia, eliloŋo isia mai nya tohiruri tonohosie, "Fau no Hoto." ) ²⁰ Iya egioro to buk Hofureta, 'Isiara fau nia hotowuana ania, ojo hotobiaŋa lobo tuŋani amanya dia; 'Isiara lobo tuŋani hamai heyari mai nohonye.' ²¹ Osiru, teya, hijo lobo tuŋani le edihitai iyohoi holoŋitek daŋ Habu Yesu heno ahotwai ojo hawoŋ to hiji hohoi, ²² To hiteiri no hibatisio no Yoani man to holoŋ nafa eyari inya ahide tara hohoi, anyar ara asut to hohoi to hebuhu no honye." ²³ etiwetik isia hiyo lohorik, elliloŋo Yosefo Barsabas lafa ara fure Justo iko mattias. ²⁴ Omojo isia ata hijo, "Iyye, Habu, ile eyen tajia ino hiyo daŋ, nia ituhutek lari lia tara hiyo hulo lohorik enyimu. ²⁵ anyar eyari mai ina ebusari Judas to heno nohonye oyiriari." ²⁶ Ata isia hibiro to Yosefu iko Mattia hijo ŋai iso orutak ta mai ho Judas ata hiyo ebirok ta Mattia lafa ofonihini to efahat tomon holobotie to hiji hefahat.