¹ Tara howiti, to hiito noŋorwo na ara onyimoti ho durre innohonyie, hunna amuno naŋ to bisan, obe ara hidofe nayya hame, ² ati iko daŋ illo oyyen ibisiti, to bisan nafa odule tohoi owuon iso iko hoi mak. ³ Hamelehini, hamehini, owuon iso himwara iko hoi tara Hollum Monye ojo tara Yesu Kristo, Lonyi Monye, to bisan ojo to mune. ⁴ Amuno naŋ bino hijo arrumu naŋ durre ilohoi ilak olot to bisan, iyya nafa emojini iyyohoi hifahi inna tara Monye. ⁵ Iyyania, elalia naŋ iyye hito noŋorwo, obe ara iyya egiorok naŋ hifahi ŋejuk to hoi, ati inya nafa etiru inyohoi tohitieri, hijo anyar emuno iyyohoi wati. ⁶ Inyia mune, hijo anyar elot iyyohoi to hifahita innohonyie. Hifahi inna, etiru ifa hido itai beren, hijo anyar idule itai loton ejio itai emuno. ⁷ Esarai henyiabak afau, ojo isia ebo huruk hijo ottu ifa Yesu Kristo tara to wan. Henyabani lia ojo hidofe ara mereni lo Kristo. ⁸ Itiriŋai watye innahatai hijo hotobiaŋa itai etilitek hirro innafa egiemu itai daŋ, ati anyar emoju itai hisiori nalanyar. ⁹ Leno lobo ahosiere ojo inyia obe odule to hitiyana no Kristo, obe owuon ho Hollum. Ojo lia lodule tohitiyana nohonyie, owuon inya dang ho Monye iko Lonyi. ¹⁰ Lawoŋ lobo tuŋani tahatai obe eyyani hitiyana inna, ibaŋa efwotu inyia ta haŋitek innahatai, ibaŋa efony inyia. ¹¹ Lefony lobo inyia, otuba inyia to higemita innohonyie inno lorru. ¹² Owuon hirro arria inno lawak naŋ egiorok ta hatai ati abe naŋ lawak egiorok isia to waraga ojo to hifioŋ inno galam. Ati awak naŋ awoŋ ta hatai anyar ero to homomite, anyar efut mune nohooi. ¹³ Efonya durre inno hanasi hatai nafa onyimun itai.