¹ Iyyania, to hiram to no luaha hiyyo ille eruk Hollum, anyar abe nayya egiorok ta hatai. ² Nyo ayyen nayya nyo nia ewak itai hijo eluahari isia, elimak nayya to hiyyo illo Masedonia to hitahuo. Elimak isia hijio ehuhumak hiyyo illo Akaya hisiorita innohosie man ifa toŋoleŋa. Hifiriwa na hatai etiwulek tajia inno hiyyo arriai ehumari isia ania. ³ Ati efahak nayya halasira hohoi ta hatai hijo anyar obe iyyohoi etahuo itai bi assai, ojio anyar ehuhumak itai wati innahatai, iyya ero nayya ifa. ⁴ Nyo, kuyya afanu illak illo Masedonia daŋ hanaŋ atta arrumu itai ibe ehuhumak hisiorita innahati, efi iyyohi hiloriri daŋ to hitahuo nohoi itai. ⁵ Egigilo nayya iyyania hijo olibo ofu halasirak hohoi hulloŋ ta hatai to hosiere hanaŋ anyar ofu ehuhumak hisiorita innahatai iyya etiorok ifa itai. Ara nia hijo anyar hisiorita innahatai oso to wahan no wati innahatai hotobiaŋa ara ta ŋarrosok. ⁶ Ara higigilo tiji: tuŋani ille oyyek ŋama bok bok odieŋu iso hunna oduhucio, ojio lo oyyek wan inno oluŋa, odieŋu iso arriai. ⁷ Isiara hiyyo daŋ nobotie nobotie hesiara iyya otiorok ifa isia ta tajia hosie obe ara mijan to na tajia kuyya hidofe ta baŋi- nyo omuno Hollum tuŋani ille esio hisiorita to mune na taji. ⁸ Oremik Hollum ŋetifutak hisiorita innohonyie daŋ ta hatai, hijo anyar ewuon itai ho hirro inne ewak itai holoŋitek daŋ, eremik itai hiluak higiemita daŋ hunna olibo wati. ⁹ Iyya egiorohini hijo, ''Aharak inyia ibariti atta hisio to lociaŋak; Odule iso ibisiti innohonyie man fur.'' ¹⁰ Ati Hollum ille esio hinyiomo ta hayani arik he imune inna ohu inyia adahari, etisarik iso inyia ta hatai ojio hidofe ofonik ta hatai hinyiomo inne efu itai edulak anyar ofonik haŋer hunna oluŋa. ¹¹ Efanu iso itai hira habarak to hirro bidaŋ anyar imorot itai, atta hiyyo hisio ta hatai humo to Hollum. ¹² Nyo obe hisiorita hunnaŋ ara iluahiti inno hiyyo inno Hollum hame, ati efut isia arriai ho humo no Hollum hame. ¹³ To nyo egonyu hiyyo hisiorita hunna; etahuo iso isia Hollum ta baŋi nahatai sayye no Kristo ne ero itai, ojio to himorot nahatai to hosie ojio to hiyyo daŋ. ¹⁴ Omojo isia tetai ojio tajia innohosie awak itai, to nyo to hamehini no Hollum inna obolo binno to hotwajin hatai. ¹⁵ Humo to Hollum to hisiorita hunna obolo wati inne etalik iyyohoi hiro!