¹ Ilasira hanaŋ awak naŋ elimak ta hatai hijo egiama hamehini no Hollum jai to hiyyo liyya to ikelesia no Masedonia. ² Ara hido nolo owuon hitigiama to hosie nolo obolo osiari mune nohosie, ara ida hido elociaŋ isia binno, esiara isia hisiorita inno hosie iyya habarak. ³ Nyo ayyen naŋ dede hijo esiara isia hisiorita inno hosie iyya oremik isia. Dede, to wahan to nohosie esio isia arrobiyaha inno oluŋa agalik. ⁴ Elalia isia tohooi binno heyari hisiorita inno haluahari hiyyo illo Hollum heruhok. ⁵ Obe ifa ottu hijio te iwahiti innohoi, ati ahosiere esio isia wati innohosie ta Habu. Esio isia wati innohosie hehumari wahan no Hollum. ⁶ To nia efahak iyyohoi Tito heno ta hatai hamojini araobiyaha inno hisiorita nyo etiara inyia higiama beren to hiji hatai. ⁷ Ati iyya egalik itai to hirro daŋ; to hiruk, iko hiro, to hiyyen, to hifiriwa, to mune nahatai te iyyohoi itisiahai hidofe hagalihini anyar edule itai to himorot. ⁸ Abe naŋ ero hifahita ta hatai, ati ero naŋ haciamari mune nahatai hijo kuyya ara inyia dede, iyya mune no hiyyo ilamuk. ⁹ Nyo eyyen itai hamehini no Habu lohoi Yesu Kristo hijo abara ida hido inyia , ottu inyia hira olociaŋ te itai hijo anyar efanu itai hira habarak to hilociaŋ to nohonyie. ¹⁰ Iyyania elimak naŋ higigilo nanaŋ ta hatai hiram inna hijio anyar oluwak itai. To hiŋa nafa alaŋ etira ifa itai hisiara ahosiere daŋ obe ara nia hame, ati emuno itai haluwahari hidofe hiyyo. ¹¹ Ati iyyania atuhuni hiram nia. Ewak ifa itai hihuhuma ati esiaha inyia. ¹² nyo kuya awak taji no tuŋani hasiahari hisiorita, omoju Hollum hisiara nohonyie iyya owuon hirro to honyie ati obe Hollum efia hisiara to olociaŋ. ¹³ Abe naŋ ajo inna hijo anyar ettole ilamuk hiyyo to ye ejo itai ewuon iko hitigiemita ajo naŋ hijo, ¹⁴ iyyania anyar oluaha iluluŋ nahati hilociaŋ nohosie, ojo ta halu oluak iso ibariti innohosie hilociaŋ nahati ojo ecialari iso itai iko isia. ¹⁵ Iyya egioro hijo, "Lia lafa ohurru illo oduhucio obe iso owodo." ¹⁶ Ati humo to Hollum le ehumak hifiriwa ta taji ho Tito iyya nia ehumahini ta tajia hatai. ¹⁷ Nyo eruk inyia hirrorita innohoi ojo inyia enno ta hatai to wahan no lobolo. ¹⁸ Ejo iyyohoi efahak ilasi hohoi iko inyia lia etahuwo daŋ to heyyani no honyie sayye inno olibo. ¹⁹ Obe ara nia hame ati onyimu ikelesiaha inyia hafuye a Yerusalam iko hoi heyari hisiara nolo libo. Ara inna baŋi nohoi ta Habu ta wan nohonyie, ojo to wahan nohoi haluahari. ²⁰ Anyar ehum iyyohoi hiriria hijo hotobiaŋa lobo tuŋani orrosok iyyohoi nobo hiram no hirro hunna esio itai te iyyohoi. ²¹ Nyo ewak iyyohoi hihuma hirro inno obis obe ara to hosiere ha Habu hame , ati to hosiere ho hiyyo daŋ. ²² Efahak iyyohoi ilasi hohoi lobo iko isia lafa eciem iyyohoi hinyiahita arriai hidofe errumu iyyohoi hifiriwa nohonyie agalik, nyo omuno inyia itai dede. ²³ To hiram no Tito, ara inyia ilasi hanaŋ iko hegiamani le egiama iko ta hatai. Te ilasira illak illohoi efahak ifa ikelesiaha isia hullo etihutek hitihabuo no Kristo. ²⁴ Iyyania ituhutek mune nahatai to hosiere ho hiyyo lia te ikelesiahien, ituhutek hidofe te ilasirak hullo hijo nobe hitahuwo nanaŋ te itai ara assai.