1
Iyya ara itieriti hunaŋ innohoi halasira hanaŋ hulloŋ amuno nayya, hetilibo wati arik ho oyirihin innohoi to hirro daŋ hunna eturruo wati iyyohoi, ati hetufutak libe nohoi ta baŋi to no Hollum.
2
Itimoju iyyohoi ebe iyyohoi, holobe iyyohoi eturru lobo tuŋani, ebe iyyohoi etisilai lobo tuŋani, ebe iyyohoi enyieb lobo tuŋani.
3
Abe nayya ero ania hijo aŋotori itai, to nyo ajo ifa nayya hijo ewuon itai ta taji hanaŋ, kuya to ye kuya to wuaran era nobotie daŋ hanaŋ.
4
Obolo ŋere nanaŋ tetai ojio hidofe hitahuo nanaŋ obolo tetai. Efut nayya ho hilik na taji, ojio mune nanaŋ atta asiari to hiji ho hitigiemita innohoi daŋ.
5
Nafa afanu iyyohoi a Masedonia obe lobo yiri tara hohoi Ati obore ifa hitigiemita te iyyohoi ta bali ojio baŋi wuon to oko hotwe.
6
Ati Hollum le etilik wan hiyyo ille ejiriŋa wati, etilik ifa inyia tajia innohoi to ŋawoŋ no Tito.
7
Obe ifa ara ta hawoŋ no honyie hame ati ara to hitiliha inna omoju inyia tara hatai, amuno ifa naŋ binno nafa elimak inyia nayya hijio ewak itai egonyu nayya binno, ejio hidofe itai ejiriŋa man atta nayya muune binno.
8
To nyo kuya eyyani waraga nanaŋ ta hatai diahai na tajia, abe naŋ eloit taji nanaŋ ejiriŋa ida hido nayya, nyo egonyu nayya obe diahai nahatai to waraga inna odule iso man fur.
9
Ati iyyania amuno nayya, obe ara to diahai nahatai, ati to diahai nia hatai, eloit itai tajia innahatai, nyo ottu diahai nia tara Hollum ejio iyyohoi iso ebe ehuma ta hatai no lorru.
10
To diahai nia aŋatak Hollum ta hatai, eyyani inyia hiloito na taji inna ara hisidi nohonyie etilohini. Obe nobo hijiriŋa tara; diahai na fau innaŋ eyyani ye.
11
Itiwolo iko hisidi no hijiriŋa inna aŋatak Hollum ta hatai hijo eyyani mahu nyo. Ero itai ilieti innahatai to hifiriwa to Hollum. Ati to heyyau nia eloŋojita itai ejio hidofe itai ebaŋ. Inyia nia awak nayya hataluak itai, ojio to hifiriwa no taji iŋot itai le eyyau wan. Inyia nia etuhutek itai hijo elibo itai to hiram te inna.
12
Ati egiorok nayya ta hatai obe ara to lia le eyyau wan kuyya to lia ille odiaha to heyyau to nia, ati egiorok nayya hijio anyar etihutek Hollum ta hatai hifiriwa nahatai to hosiere no Hollum.
13
To hiram to nia, anyar elik tajia innahatai. Hotobiaŋa ara to hitilik nohoi hame inna emuno iyyohoi, ati emuno iyyohoi binno agalik to mune no Tito to nyo elik oyiri nohonyie to hiram ta nahatai bi daŋ.
14
To nyo kuyya etidara nayya to honyie tetai abe nayya awuon he irri. Iyya ero ifa iyyohoi ta hatai hirro dede daŋ, ara hidofe hunna etahuo iyyohoi to Tito.
15
Ojio hidofe taji nohonyie omuno agalik tetai, nyo ogilu inyia ŋaniŋe nahatai ojio hidofe baŋi arik ho hikikiro nafa imojuni itai inyia.
16
Amuno nayya etole taji nanaŋ dee to hirro innahatai daŋ.