¹ Awak naŋ hijo anyar edihu itai ika naŋ le'ro naŋ rori kai inno ofiak. ² Nyo ahain naŋ te'tai ta haini no Hollum, nyo atiorok ifa naŋ itai to oliawa lobotie, hijo anyar esio naŋ itai to Kristo iyya hoduoti no olibo ³ Ati abaŋ naŋ hijo enyob iso munu itai iyya nafa enyiabari inyia Eva to ofioroho te innohonyie, hijo hotobiaŋa inyia orihori higigilita innahatai ade tara mune no olibo nemunori itai iyyania to Kristo ta tajia innahatai daŋ. ⁴ Elimak ifa iyyohoi itai hiram no Yesu, atta itai efwotu Oyiri lo Olibo, eijo hidofe itai atta huruk hiram nohoi. Ati enyiak itai ebusak ilak hiyyo hetiyenai ta hatai lobo Yesu lo'lufa. Iyyania ewak itai huruk Oyiri lo olufa atta itai huruk hiram no olufa. ⁵ Egigilo naŋ hijo abe naŋ ara assai te efahat illo hittaha. ⁶ Ettallik ida hido naŋ to hiro no olibo iyya iyya isia, obe hiyyen nanaŋ odico. Etuhutek iyyohoi inna ta hatai te hikota daŋ ojo to hirro daŋ. ⁷ Atta naŋ hipala letifiaha naŋ wan nanaŋ ajo naŋ etibolo itai to hitiyena nanaŋ ta hatai sayye inno Hollum to biaŋana no duma. ⁸ Ahoru ifa naŋ arobia tara ikelesia hijo anyar egiamari naŋ ta hatai. ⁹ Nafa awuanari naŋ to hiji hatai olociaŋ, abe ifa naŋ efifia hinak hirro tara lobo tuŋani, nyo esio halasria illa afanu ta Masedonia hirro innafa awak naŋ. Abe ifa naŋ efia hinak hirro ta hatai, hidofe, abe iso naŋ adule hififia itai. ¹⁰ Iyya owuon bisan to Kristo ta hanaŋ, dede oyyen iso hiyyo inno owuon to doŋe na Akaya hiram inna. ¹¹ Obe ojo hijo abe naŋ amuno itai, oyyen Hollum hijo amuno naŋ itai. ¹² Ojo to hirro inne ehuma naŋ, adule iso naŋ hihuma hetihori ille etidara to hijo to nohosie hijo, egiama isia iyya iyohoi. ¹³ Ara hiyyo ille efahat henyiabak iko hegiamak ille enyaba, nyo ojo isia era lefahat illo Kristo assai. ¹⁴ Ebe iyyohoi elliliha te inne, nyo olwo sitan to wan nohonyie iyya anjilo lo cialai. ¹⁵ Niyya obe ara to hillilliha kuyya to hinyiaba ne hegiamak illohonyie atta hijo, era isia hegiamak illo libe. Osiru iso ŋoto to hosie to hihumita inne ehuma isia. ¹⁶ Enyiak naŋ hiro, hotobiaŋa lobo egigilo hijo esita naŋ, ati legigilo itai ania, etidara nayya hijo anyar etidara naŋ kai. ¹⁷ Hirro inne ero naŋ, abe naŋ ero to hituhuta na Habu, ati ero naŋ to hitidara iyya lofiaha. ¹⁸ Nyo etidara hiyyo arria to hirro inno wati innohosie, etidara iso hidofe naŋ. ¹⁹ Egigilo itai hijo era itai ferejiok ati etiru itai tara liyya ille esita. ²⁰ Le'humak lobo itai piti, itidihu, lohorru lobo hirro innahatai, le'nyob inyia itai, kuyya letidara inyia to wan nohonyie, kuyya annaŋa inyia homoŋite innahatai, itidihu daŋ. ²¹ Ero naŋ to irri nyo ara iyya elik ifa iyyohoi. Ati letidara lobo, atta naŋ hiro iyya lobolit--Etidara iso naŋ hidofe. ²² Hara isia hiyyo ille Ebrei? Ara hidofe naŋ. Hara isia hiyyo ille Isarail? Ara hidofe naŋ. Hara isia to woyyo na Abramo? Ara hidofe naŋ. ²³ Hara isia hegiamak to Kristo? Ee, ara hidofe nayya daŋ. Ati ero naŋ iyya osita. Agalik ati naŋ isia binno to higiemita arria, to hifita ta babus to hinyiahita arria, te ibahiti arria, ojo hidofe ye eliaha ta hanaŋ hinyiahita arria. ²⁴ Hinyiahita miet efwotu naŋ ibahiti tomwana hunik hohottoŋwan ta hali no Yudea. Abaha hiyyo naŋ hunik to fattigioho. ²⁵ Errwuoŋ isia naŋ to moru inyiahi nobotie. Awuon naŋ ta babur ne esiak moru atta ŋadiori ahotwai hari. ²⁶ Eyari naŋ hifoliaha no hifioŋ inyiahi nobotie. Alot naŋ to hiji ho hirro inno oyeyer inyiahita arria. Yeyer no hariak, yeyer na hahalak, yeyer to hiyyo illallaŋ, yeyer ta paganohien, yeyer no doŋe yeyer no tim, yeyer no hotwai ho hifioŋ nettok, yeyer no hittole to hiji no hiyyo ille enyiaba. ²⁷ To holoŋitek arria egiama naŋ binno to hitigiama no'bolo. Abe naŋ ajoto ta hariejin. ²⁸ Alot naŋ to hibwoti no biaŋan no hifioŋ, to biaŋan no hinya innamuk hirro daŋ ettulak, ojo hidofe daŋ to hirobi ojo to biaŋan no boŋojin. Owuon hirro hunna daŋ ta bali, ati agalik inna. Obolo hitihawua ne ikelesia binno holoŋitek daŋ. ²⁹ Le'lik lobo, abe naŋ elik ojo hidofe lahuye lobo, abe naŋ ejiriŋa binno. ³⁰ Kuyya letidara naŋ, anyar etidara naŋ iso naŋ to hilik nanaŋ. ³¹ Hollum lara Monye Habu lohoi Yesu letahuo tulaŋ, oyyen inyia, abe naŋ agesem. ³² To doŋe na Damaseka owuon eittok la habu la Aretta lerriria doŋe na Damaseko henefuni nayya, ³³ Ati ettusuru halasira hanaŋ nayya to gufa te ittulit no ohitir, atta naŋ hurrwuata ade tara hosie.