¹ Iyyania, nayya Paulo, elolia nayya ta hatai ta wan nanaŋ, ta nyalami iko ta bijan no Kristo. Ojio illak hiyyo hijo afiaha nayya to hosiere hatai, ati eŋere nayya la alama nayya ta hatai. ² Esiŋa nayya itai hijo, la awoŋ nayya hijo hotobiaŋa nayya eŋere ta hatai iyya inna eŋere nayya te illak hiyyo illo ojio elot iyyohoi te iwahiti inno wati innohoi. ³ Ara ida hido hijo elot iyyohoi to wati te innohoi hunna, obe riem nohoi ara wati innohoi hunna. ⁴ Obe irremiti innohoi ara inno wan inna, ati ara golon nohosie tara Hollum no oremik hitihar masik inno ogol. Oremik hidofe isia hitifiaha ofioroho. ⁵ Etattur hidofe iyyohoi higigilita iko hirro daŋ inne etidara ojio hidofe etihita hiyyen no Hollum. Efit iyyohoi higigilita daŋ hatara piti hotoniŋe Kristo. ⁶ Ebak iso hidofe iyyohoi hamiasak daŋ to holoŋ ne eniŋori itai dede. ⁷ Igigile dede to hirro hunna. Le ejio lobo tuŋani dede hijo ara inyie lo Kristo, isiara inyie hegigile to wan to nohonyie, era hidofe iyyohoi daŋ illo Kristo. ⁸ Le etidara ida hido nayya kai to hilohittok nohoi, nafa esio Habu te iyyohoi haduhori itai ahide hijo hotobiaŋa iyyohoi etihar itai, abe iso naŋ awuon he irri. ⁹ Ati abe nayya awak hitibaŋa itai to waragat innanaŋ. ¹⁰ Nyo ojio illak hiyyo hijo, "Ero inyia to golon ojio hidofe efiriwa ta waragaha innohonyie, ati ofiak inyia to homomite innohoi. Obe osiru hetirari to hiro nohonyie.'' ¹¹ Isiara hiyyo iyya hullo hotoyyen inna; to hirro inne egioro iyyohoi ta hatai to waragaha ejio iyyohoi ebe ewuon he itai niyya, efanu iso iyyoho hihuma le eba iyyohoi nia. ¹² Ebe iyyohoi eŋere hetirrijori wati innohoi iko illak hiyyo illo ojio elibo isi. Ati obe ofioroho to hosie le etirrijo isia wati illohosie he illak hiyyo, ojio hidofe isia ociama wati illohosie he illak hiyyo, obe isia owuon ho higigilo on obis. ¹³ Ati ebe iso iyyohoi etidara iyya hiyyo hullo ellaŋ ohori. ati iyya esio Hollumte iyyohoi ohori nohonyie, eba ohori nia man ta hatai. ¹⁴ Ati ebe iyyohoi ellaŋ ohori nohoi le egiama iyyohoi to hiji hatai, nyo eba ifa iyyohoi to hiji hatai to hosiere iko sayye inno olibo inno Kristo. ¹⁵ Obe iyyohoi etidara ellaŋ ohori te igem ne illak hiyyo, ati eyyik iyyohoi hijo lobolo huruk nahatai, atta iso igem nohoi bolo to hiji hatai agalik. ¹⁶ To nia atta iyyohoi iso hitiyana sayye inno olibo te innak fauhien inno owuon to hosiere inno masik innahatai. Nyo obe iyyohoi etidara te igem ne ehuma lobo tuŋani to nobo mai. ¹⁷ "Ati lia le etidarawan, isiara inyia hetidarai ta Habu." ¹⁸ Oliew libe no tuŋani le etahu Habu inyia. Obe ara lia le etahuo wan nohonyie.