¹ Motiarak, ebe iyyohoi egiorok ta hatai ta far ojo holoŋitek inno lofuye hirro hunna hebarari. ² Eyyen itai binno hacohini na Habu. Etubur iso far nyia hiyyo binno iyya awoŋ no lohoho ahahalari hiyyo ta tari. ³ Ifa lejo isia, ''imor iko manya nalanyar'', kokwak oto iso run tohosie.' owoun isio iyya diahai no hitado no hiito noŋoruo. Obe iso nobo hekoi heryace. ⁴ Ati itai, halasira, ojo hanasira, abe itai iwanun te idumele hotobiaŋa far nyia oburak itai iyya lohoho. ⁵ Era itai daŋ durre illo cialai ojo durre illo far. Ebe itai era lonyirok illo harie kuyya illo edumele. ⁶ Hotobiaŋa iyyohoi ejoto iyya illamuk. Ati hetudule hiriria ojo hosi odule ŋaa. ⁷ Liyya illo ojioto, oijoto isia ta taharie, ojo ilia eboto, eboto daŋ ta tari. ⁸ Ati iyya era iyyohoi lonyirok illo far, anyar ehum iyyohoi riŋa eijo hidofe egigilo na anyar. Anyar eciofok iyyohoi buhu no suhe no huruk ojo no mune, ojo tamu no etilohini no moi. ⁹ Obe ifa Hollum onyimu iyyohoi hijo hetera iyyohoi illo jore, ati hijo anyar errumu iyyohoi hetilahini ta Habu lohoi Yesu Kristo. ¹⁰ Inyia ifa oye te iyyohoi hijo kuyya eriŋa iyyohoi kuya hidofe efer iyyohoi, anyar emanya iyyohoi daŋ he inyia. ¹¹ Ilimak hirro innia te illamuk anyar obe wati innahatai elik. Itulwak wati iyya nia egiamari itai iyyania. ¹² Iyyania, efia iyyohoi itai halasira, iruho ilia ille egiama to hiji hatai ojo hidofe ara ettaha ta hatai ta Habu ojo hidofe etiyana itai. ¹³ Ewak hidofe iyyohoi anyar emuno itai isia binno te igem nohosie. Ituwuanai to himwara to hiji hatai. ¹⁴ Ettitto iyyohoi itai, halasira: Itisor heturwok, itulwak ille etaban to hiji hatai, itulwak ille elik, isiara hidi nahatai to hiyyo. ¹⁵ Hotobiaŋa lobo odumak run ho run to lobo, ati itudule siaha hirro inno olibo te illak ojo hiyyo daŋ. ¹⁶ Tomune holoŋitek daŋ. ¹⁷ Itudule mojo. ¹⁸ Isiara humo to Hollum to hirro daŋ. Nyo ara nia wahan no Hollum te itai to Kristo Yesu. ¹⁹ Baŋa etuduny Loyiri. ²⁰ Baŋa olisa hikilita. Iticem hirro bi daŋ. ²¹ Iniefa hirro inno olibo. ²² Ibusak higemita inno orru. ²³ Isiara Hollum lo himora hototubak itai. Isiara oyiri nahatai daŋ tamai, oholio, ojo wati innahatai hototubahini obe hipali ta hawoŋ na Habu lohoi Yesu Kristo. ²⁴ Agalik libe no lia lafa ellilloŋu itai, ojo lia lohu hidofe higem. ²⁵ Halasira, itimoje daŋ hidofe te iyyohoi. ²⁶ Itifonyak halasira daŋ to hijujura no hutuk. ²⁷ Efia nayya itai to fure na Habu hijo anyar ehianak itai waraga inna ta halasira daŋ. ²⁸ Isiara hamehini na Habu lohoi Yesu Kristo hotowuana ikaitai.