¹ Eyyen itai ta wati innahatai, halasira, hijo obe ifa ŋawoŋ nohoi ta hatai ara assai. ² Eyyen ifa itai hijo obolo hitigiama nohoi man ottohe iyyohoi irri to Filipi, eyyen ifa itai. Eŋere ifa iyyohoi hiro hiram no Hollum to hiji ho hitigiama. ³ Obe ifa hittitto nohoi ara to hipali, he ibwoti, to hinyiaba, ⁴ ati eruhu Hollum iyyohoi esiarari te iyyohoi hiram nohonyie hijo anyar ero iyyohoi sayye inno olibo, inya nia ero iyohoi. Ero iyohoi hijo hotobiaŋa iyyohoi etumuno hiyyo, ati Hollum nyo Hollum hame eremik hiciem ojo hidofe loyyen tajia innohoi. ⁵ Iyya ara Hollum a sut lohoi, ebe ifa iyyohoi ero ta hatai to teler kuya hidofe to nobo far hijo anyar edaya iyyohoi hirro innahatai. ⁶ Ebe iyyohoi esiaha lohuo nohoi tara hiyyo, kuya hidofe tara itai kuya tara ilamuk. Nara ida ania, ne ewak iyyohoi idumuti innohoi to hira nohoi lefahat. ⁷ Ati enyalam ifa iyyohoi ta hatai iya anyalam hotonye to durre innohonyie. ⁸ To hikoi nia, emuno ifa iyyohoi itai. Ebe ifa iyyohoi ebwany hiram no Hollum hatai hame ati esio ifa iyyohoi wati innohoi ta hatai. ⁹ Edule itai hiyyen igem iko hitigema nafa hohoi, halasira, egiama ifa iyyohoi ta tari ojo te iŋalio hijo hotobiaŋa iyyohoi etigem itai. Ta far nyia, etiyana ifa iyyohoi itai sayye inno Hollum. ¹⁰ Ira itai a suti inno hirro inne. Leyyen itai libe, bisan ojo imanyiti innohoi nafa ewuanari iyyohoi he itai eijo iyohoi emanya he itai illafa eruk. ¹¹ Leyyen itai hitigolo nafa hohoi ta hatai iyya monye ho durre innohonyie, ettitto ejo hidofe etigolo itai. Ettitto iyyohoi ¹² hijo anyar emanya itai iya lawak Hollum to lohuo nohonyie iyya ellilloŋu inyia itai to lobie ojo lohwo nohonyie. ¹³ To hiram nia edule iyyohoi hisiara to Hollum humo, To nafa efwotuni itai hiram no Hollum tara hohoi, obe ifa itai eruk hijo ara hiram no tuŋani, ati efwotu ifa itai ania, hijo ara Hiram no Hollum, Inyia hiram nyia ne egiama to hiji hatai ille leruk. ¹⁴ Halasira, eyyalu itai ikelesiaha inno Hollum inno lowuon to Yesu Kristo nia to Yudea. Errumu itai hitigemita tara hiyyo illo doŋe nahatai hirro innafa orrumu isia tara hiyyo illo Judei. ¹⁵ Illafa ottohe Habu lohoi Yesu Kristo ojo hekilak atta hidofe ŋefuhai iyyohoi ade. Obe etumuno Hollum ojo hidofe odule aŋerejak to hiyyo daŋ hijo hotobiaŋa iyyohoi ero to huwo illo ara halufak hijo hotobiaŋa isia etilohini. ¹⁶ Te hikoi nia, adumu isia atta afonik hiyyata innohosie ati awoŋ jore no Hollum ta halu to hosie. ¹⁷ Halasira, elama ida hido iyyohoi tara hatai kai ta tajia, ewak iyyohoi bino ta tajia innohoi hiwolo itai to homomite. ¹⁸ Nyo ewak iyyohoi ŋafanu ta hatai-naya Paulo, edas ati etihita sitan iyyohoi. ¹⁹ Nyo ara hitidara nohoi to heyik to tamu tara Habu lohoi, ta hawoŋ nohonye. Obe ara itai? ²⁰ Itai era lohuo ojo mune nohoi.