¹ Paulo, Silvano ojo Timoteo, te ikelesia no Tesalonika nia lo owuon to Hollum Monye, Habu lohoi Yesus Kristo. Hotowuana hamehini ho himwara no Hollum ta hatai. ² Edule iyyohoi hisiara humo to Hollum te itai, iyya elioto iyyohoi itai to mojo nohoi. ³ Errasa iyyohoi to hosiere Hollum Monye hohoi hiyyen huruk nahatai, igem nahatai, mune nahatai, hitila no hiŋere nahatai to moi nyia lo owuon ta Habu lohoi Yesu Kristo. ⁴ Halasira, hullo omuno Hollum, eyyen iyyohoi hanyumuni nahatai, ⁵ ashan otu ifa hiram no Hollum nolobe ara to hiro hamai, ati to golon no Loyiri lo Olibo. To hikoi nia, hidofe eyyen itai hira sihil le ilari iyyohoi ifa beren to hiji hatai. ⁶ Eticelu itai iyyohoi ha Habu, iyya efwotu itai hiram no Hollum to hitigiama ojo hidofe to mune no Loyiri lo Olibo. ⁷ To hiram nia, era itai hetimijak to heruhok illo Masedonia ojo Akaya illo eruk. ⁸ Olieu hiram no Hollum te itai, obe lara to Masedonia ho Akaya hamai ati ta masik innafa egiamari itai esarik huruk nahatai to Hollum. Iyyania ebe iyyohoi eremik hiro innamuk hirro. ⁹ Isia to wati innohosie elimak hafanu nohosie ta hatai. Ero isia hiloito nahatai toro rijorihien to Hollum lo bis. ¹⁰ Elima isia hijo etila itai Lonyi honyie lottu te ido. Letidietu inya toro hayok. Inyia lia Yesu Kristo lo ohou iyyohoi tara jore nolottu.