¹ Nafa nyia man to hitieri, nafa etiru iyyohoi, nafa egonyu iyyohoi to honyehite innohoi, ejio hidofe eriŋa atta hitany ta has innohoi- ero inni to hiram no wuaran. ² Oliew ifa waran, egonyu iyyohoi, ejijo hidofe era asuuti, ettitto iyyohoi hiram no wuaran nosio fur, nafa lowon ho Monye nafa oliew te iyyohoi. ³ Elimak iyyohoi ta hatai hirro innafa etiru iyyohoi ejio hidofe egonyu, hijo anyar erriaha itai iko hoi iyya inna erriahari iyyohoi iko Monye ojo Lonyi honye Yesu Kristo, ⁴ egiorok iyyohoi hirro innia hijo anyar efut mune nohooi ⁵ Hiram nyia nia nafa etiru iyyohoi tara honyie atta hidofe elimak ta hatai: Ara Hollum cialai nyo obe idumele tara honyi. ⁶ Leijo iyyohoi hijo erriaha iyyohoi ho inyia eijo hidofe elot te idumele, era iyyohoi telerok ojo hilahode obe tara hohoi. ⁷ Ojo lelot iyyohoi to cialai iyya owuon inyia ta calai, erriaha iso iyyohoi to wati innohoi ojo hoto no Lonyi honyie Yesu atta hillilla hiyyata innohoi tamai daŋ. ⁸ Leijo iyyohoi hijo ebe iyyohoi ewuon he iyyau, enyaba iyyohoi wati innohoi ojo hilahode obe tara hohoi. ⁹ Ojo lemitu iyyohoi hiyyata innohoi, olibo inyia ojo hidofe obis, oremik ŋamitu hiyyata innohoi atta ŋelilaw hibotita innohoi tamai daŋ. ¹⁰ Ojo leijo iyyohoi hijo ebe iyyohoi leyyau, ehumak iyyohoi inyia loteler, ojo hiram nohonyie obe tara hohoi.