¹ Dede owuon hirro inno somon to hiji hatai ati ara somon inna orru binno, nobe oremik arrumuni to hiji ho paganohien, nyo amanyari lobo oŋorwo monye honyie. ² Ati etidara itai. No obe ida itai etariha man eyari ade tuŋani lehuma hiram nia to hiji hatai. ³ Abe ida hido naŋ to hiji hatai to wan nanaŋ, awuon naŋ he itai to Oyiri nanaŋ, ⁴ hidofe to fure na Habu Yesu aŋot naŋ hiram no tuŋani le iyya awuon naŋ iyyania he itai. ⁵ Isiara tuŋani le ta has ho sitan hetatturo iwahiti inno wan honyie, hijo hetilohini Oyiri nohonyie to holoŋ na Habu Yesu. ⁶ Obe hitidara nahatai olibo. Ebe itai eyyen hijo oremik bula kai etuwuduhu imune daŋ? ⁷ Ibusak bula marwahi ade anyar era itai imune ŋejuk, nobe bula dede. Nyo oye ifa Kristo te iyyohoi nyo inyia ker hihuma lohoi. ⁸ Iyyania hetidahai daha na karama daŋ to mune, obe ara to bula inne emarwak inna ara iyya liwa iko run ati to mune no obe bula nara iyya libe ojo hilahode. ⁹ Egiorok naŋ ta hatai waraga nanaŋ hijo hotobiaŋa itai ettuba ho hiyyo ille ehuma hirro inno somon. ¹⁰ Ati abe naŋ ero hijo hotobiaŋa itai ettuba iko paganohien ille ehuma hirro inno somon iko hiŋaru, iko hemumunak, ojo ille etihabuo rijorihien; atta itai enyie holowuon iko mai ta fau. ¹¹ Ati egiorok naŋ iyyania ta hatai hijo, howuon bahati lobo lojo ara inyie heruhoni ojo inyia odule ihuma hirro inno somon, kuyya eŋaru inyie, harumak, ehihorro, hijo hotobiaŋa ida itai erramita he inyia ojo hidofe baŋa adaha he inyia. ¹² Hijo no nyo aŋot naŋ hiram na hatamonok? Obe. Ebe itai eŋoto hiram no liyya illo owuon te ikelesia? ¹³ Oŋot iso Hollum hiyyo illo owuon ta bali. Ifuhai tuŋani lo'rru ade to hiji hatai.''