¹ Igyoroi jyo anjelo olo eklesya otto miji Sarudi jo, Ikyana lya ol owon’to iko Oloyirihyen hattarik hulo Hollum iko elelyef hattarik ojo: Amijak ni ehanita hoi bwo fe ojori laati jo isu iye ati ibeŋ iye isu luŋa. ² Ihuma irrirrya bwo fe itagolo erre hun arasai’to nyo ilyahai isi atuhuno. Nyo abeŋ ni anyurak ayiji ono egyamita hoi ihosyere Hollum hoŋ ara dwo bu obo abotye. ³ Tania ogilu ettiyenita hun ifwotu iye iko hun itaniŋu iye. Oduloi igigilo tesi bwo fe iloito ataji hoi. Kuyya ibeŋ iye ihum irrirrya, attu adi ni ihwa olohoho bwo ibeŋ adi iye imijak asaa an attuniere ni jihoi. ⁴ Ati owoni omuk laati imiji Sarudi hul obeŋi itiboti aboŋojin hosi bwo fe osiruni isi idahari ikoŋ ta aboŋojin hun obwori’to. ⁵ Lya al iyyala’to iyyafak adi aboŋojin hun obwori, bwo fe abeŋ adi ni efufuso afure honyi addi to buk ono nesu. Elyet adi ni afure honyi ihosyere Monyoŋ iko anjelohyen honyi. ⁶ Lya ol owon’to iko ayyaha, ijara inyi hetaniŋu erre hun ikyana Oloyiri jyo eklesyahyen. ⁷ Igyoroi jyo anjelo olo eklesya otto miji Filadelufia jo, Ikyana lya ol olibo’to bwo fe obis; owon inyi bwo fe iko eŋanyit ono Davide; oremik inyi ŋa ekat bwo obeŋ tulo ihyanak, oremik inyi hyanana bwo obeŋ tulo aŋa. ⁸ Ojo inyi: Amijak ni ehanita hoi. Imijye, aŋahi ni ekat ihosyere hoi an ittallik tulo ihyanana. Amijak ni omuta adwaran hoi ati igotyere iye nekyanita hoŋ bwo ibeŋ iye imwanak afure hoŋ. ⁹ Imijye, owoni laati hulo Sitan hul ojori era isi Yudea ati ogesemi isi. Imijye, arrosok adi ni isi ifwonniere irigoŋori ihejek hoi bwo omijani adi isi jo amuno ni iye. ¹⁰ Igotyere iye nekyanita hoŋ ta adihan tania errirrya adi ni iye ta asaa ono esusuyo on ottu adi ikemyere laati daŋ hul amanyai ifau. ¹¹ Attu adi ni kokwak. Ogolik jyo erre hun owoni’to jihoi jo oŋida obo atulo obeŋ iyaro addi negorya hoi an ilaman’to an iyyafak iye ihou. ¹² Lya al iyyala’to ehanak adi ni ihwa alalai ihaji Hollum hoŋ bwo fe obeŋ adi inyi ojiŋu teyya ’tuŋ. Egyoro adi ni afure ono Hollum hoŋ jihonyi bwo afure ono amiji ono Hollum hoŋ, inyi Yerusalem aŋejuk an isuru’to t’edou jyo Hollum hoŋ, bwo fe egyoro adi ni afure hoŋ aŋejuk jihonyi. ¹³ Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen. ¹⁴ Igyoroi jyo anjelo olo eklesya otto miji Laodisia jo, Ikyana lya al ara’to ahode bwo ara ahetamijanani ol oyyu ol obeŋ ogesem. Inyi lya al ara’to etteri hirre daŋ hunya oyyeu Hollum. ¹⁵ Ojo inyi: Amijak ni ehanita hoi jo ibeŋ iye ilik kuyya bu inok. Oyyu dwo jihoŋ al ilik iye kuyya bu inok. ¹⁶ Ati ira iye ihwa aari hun olului, ibeŋ iye ilik kuyya bu inok, tania amita adi ni iye addi to hutuk hoŋ. ¹⁷ Ijo iye jo, Ani abarani, bwo awon ni iko ebariti, tania abeŋ ni awak obo ariŋ; ati ibeŋ iye imijak jo iwon iye iko ejiriŋita, afyahajita, elocaŋ, aŋodo, bwo fe iwon iye aŋaturoi. ¹⁸ Ajo ni jihoi jo oŋida iye inyyaŋu nayyel jihoŋ an italibori to hima bwo ibara adi iye. Inyyaŋu aboŋojin hun obwori bwo iyyafak isi itihoniere ariri hwan hoi. Inyyaŋu ayyani bwo ofyotok ihoŋite hoi jo oŋida iye imijo. ¹⁹ Esiŋyo ni bwo fe abahyo aduri daŋ hul amuno ni. Tania iloito ataji hoi bwo igyamai te efiriwa. ²⁰ Imijye, awotya ni ikat bwo fe ellilloŋo. Lya al itaniŋu’to etuk hoŋ bwo fe aŋahi ani ekat, ajiŋa adi ni iŋiyere ikonyi bwo fe inyi eŋiyo ikoŋ. ²¹ Lya al iyyala’to etoŋo adi ikoŋ ikurus hoŋ ihwa inya eyyalari ni atto ni itoŋo iko Monyoŋ ikurus honyi. ²² Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen.