¹ Ihalu erre hunia egonyu ni anjelo obo isuru t’edou ol owon iko adwaran on obolo’to bwo fe itafaŋ akwatan honyi afau. ² Ikyana inyi on okwat bebe ojo, Akwaharo, akwaharo Babolona amiji eneittok. Ofwonni ajohin manya dia. Amanyai oloyirihyen hun iboti’to dia. Amanyai aheny daŋ hun iboti’to iko hun orrohoji’to dia. ³ Amatai laati hutta fauhyen daŋ aari ajalaŋi ono ajore honyi iko esomiti honyi. Orotoi hobwok hulo afau ikonyi, abarai akawajahyen hulo afau ta arrohojita honyi. ⁴ Etaniŋu ni etuk obo t’edou ojo, Laati hoŋ ifwanna addi jihonyi, Ŋadi itai irryahati iko eyyata honyi, ngadi bwo fe irryahati iko ettigemita honyi. ⁵ Nyo ofonio inyi eyyata honyi many afanyarik isi idou Bwo agilu Hollum arrohojita honyi. ⁶ Isyatta jihonyi ihwa isyo inyi. Inienuna enyyahita arrihai te ehanita honyi, Bwo fe iharutonia amat enyyahita arrihai ikos honyi. ⁷ Itahuyo inyi ahwan honyi bwo amanya inyi ta arrohojita, Tania isyatta jihonyi adyaha iko ettigemyo on osiru jihonyi. Nyo igigilo inyi itaji honyi ojo, Ani hobu, Obyaŋara ani ehidak bwo abeŋ adi ni amijak edyahita. ⁸ Tania to oloŋ abotye ofwonni adi ettigemita honyi, Isi huna: eŋwati, ayyo iko ahure, Bwo fe oswahini adi inyi te eema Nyo ogol Hobu Hollum ol oŋot’to inyi bebe. ⁹ Hobwok hulo afau hunya orotoi’to ikonyi ette manya ta ayiranita honyi oyyoi adi isi tenyi al igonyuni isi afuro ono aswaharo honyi. ¹⁰ Owotyai adi isi alamarai nyo abaŋi isi ettigemyo honyi ette isi jaran, Orroho, orroho Babolona amiji eneittok, iye amiji en egol bebe, ta asaa abotye ottu aŋoco hoi. ¹¹ Oyyoi akawajahyen hutta fau tenyi ette buryo inyi, nyo ihwania obeŋ tulo inyyaŋa erre hosi. ¹² Owoni isi iko nayyel, abilat hun opipyahi’to, bwo onoroi hun opipyahi’to iko hun obwori, aboŋojin hun ilamani, hun emoliha, iko hun egarawaji, bwo hun odori. Owoni isi iko abauhyen hun ilamani bwo erre hun ihuhumi ta naalai tome iko te etoi, ta afelek, ta abilata iko ta amorwo. ¹³ Owoni isi bwo fe iko amile, asitata, ottogoŋ, eyyali ono ahwan, arya, aari ajalaŋi, eyyali ono aŋiyo, efwa, ema, esuŋ iko akyoro. Bwo fe owoni isi iko akusani iko atoromilehyen, bwo apiti iko omuk laati. ¹⁴ Ojori adi isi, Atuhunie aŋer hunya idaya iye attati nelaman hoi iko ebariti hoi byaŋarana bwo obeŋi adi inyyahi nyurana isi. ¹⁵ Oyyoi adi akawajahyen hul itinyyaŋai erre hunia ette buryo inyi, nyo abarai isi ta amiji ania. Owotyai adi isi alamarai nyo abaŋi isi ettigemyo honyi. ¹⁶ Ojori adi isi, Orroho, orroho jyo amiji eneittok; iyyafatyo nya inyi aboŋojin hun ilamani hun emoliha bwo odori; iyyafatyo inyi nayyel iko onoroi hun opipyahi’to iko hun obwori’to. ¹⁷ Nyo ta asaa abotye otturoi ebariti hun obolori’to. Owotyai eleittaha hulo ababuri alamarai iko laati daŋ hul adahai’to ibaburi ojo bwo fe hya egyamak baburi bwo fe laati hul onyurani ebariti hosi te egyama ihari. ¹⁸ Attati isi iwuwoŋita al igonyuni isi afuro ono aswaharo honyi ette jaran, Anani miji on orrijo’to iko amiji ana? ¹⁹ Attati isi huco aboro ihosi hosi ette iwuwoŋita; oyyoi isi ette buryo inyi ojori, Orroho, orroho jyo amiji eneittok. Nyo onyurani laati daŋ hul owoni iko ababuri ebariti hosi jyo amiji ania nyo abara inyi. Ta asaa abotye itatturi inyi. ²⁰ Edou, omunoi tenyi; aati Hollum, lefahat, bwo eyak sayyo, omunoti daŋ tenyi. Nyo inienu Hollum inyi tetai. ²¹ Iduhu anjelo al ilotir’to bebe amorwo an ara’to ihwa eryai eneittok ette bironia inyi ihari ette jaran, Irwoŋoni adi Babolona amiji eneittok ta agolon ihwa ana, bwo obeŋ adi inyyak leyo. ²² Bwo obeŋi adi inyyahi itaniŋuna erribok dori iko etuhe hedolok bwo ahutak cuwalita iko aforojohyen. Bwo fe obeŋi adi inyyahi nyurana obo ehuhumani hirre, bwo obeŋi adi inyyahi itaniŋuna obo aŋotte iryeyo imiji hoi. ²³ Obeŋ adi allomo inyyak wulori imiji hoi bwo obeŋi adi inyyahi itaniŋuna obo etuk hayamani kuyya bu etuk hodwoti an hetehi yama. Nyo obolori nya akawajahyen hoi agalihini, bwo ta abwana hoi inyobyo nya iye afauhyen daŋ. ²⁴ Bwo fe onyurani jihonyi nooto ono eyak sayyo iko ono aati Hollum bwo ono laati daŋ hul ottohori’to to fau.