¹ Etaniŋu ni etuk on okwat an ikyana to maji on odwa’to jyo anjelohyen hattarik ojo, Ifwatta, ijuhoro ifau erre hutto sahani hattarik huno ajore Hollum. ² Ette anjelo etabotye leten, ette juhoro ifau erre hutto sahan honyi. Attati atoŋos hun orrohoji’to bwo fe odyahai ifwanna ihwattek wati hul owoni iko etamijani ono acaŋ, iko jyo hya hul itahabuye arrijori honyi. ³ Ijuhok anjelo etarrihi erre hutto sahan honyi ihari ette aari rahan ahoto, ihwa nooto ono layani ette erre daŋ hun isui’to ihari ye. ⁴ Ijuhok anjelo etahunihi erre hutto sahan honyi jyo arryak iko olotilihi hari ette isi rahan ahoto. ⁵ Etaniŋu ni anjelo olo arryak ojo, Ibis iye te eŋotiti hoi hunia. Iwon nya iye bwo herasa iye ahana. Ira iye Ahaliboroni. ⁶ Nyo itawouni nya laati nooto ono aati Hollum iko ono eyak sayyo bwo isyo iye attok hulya nooto imatari. Osiru ana tesi. ⁷ Bwo fe etaniŋu ni nekyana on ottu’to t’etityek ojo, Afe, Hobu Hollum Adwarani al agalik daŋ, obisi eŋotiti hoi bwo arai isi ahode. ⁸ Ijuhok anjelo etaŋwani erre hutto sahan honyi iholoŋ, ette isyarana adwaran jyo oloŋ iswahiniere laati te eema. ⁹ Tania amadai laati ta anahan on obolo bebe ette isi moryo afure Hollum Adwarani al ifahu’to ettigemita hunia. Bwo fe obeŋi isi iloiti atajya hosi itahabuyere inyi. ¹⁰ Ijuhok anjelo etamiete erre hutto sahan honyi ikurus ono acaŋ ette olobye honyi rahan edumele bwo ohonye laati etuhe hosi nyo obolo adyaha, ¹¹ ette isi moryo Hollum olo edou bwo iburaŋatye isi bebe nyo olwaji atoŋos jihosi. Ati obeŋi isi iloiti atajya hosi t’ehanita hosi. ¹² Ijuhok anjelo etaleji erre hutto sahan honyi ihari eneittok an ifurani Efarate ette itayoho aari ania ihuhumaniere ekoi jyo hobwok hul ofwonni adi t’ettedwoŋi holoŋ. ¹³ Egonyu ni ajohin hunihoi hun orrohoji’to ihwa edodwohi hun ofwonni addi to hutuk munu, bwo to hutuk caŋ, bwo fe to hutuk hebwanani enyabani. ¹⁴ Arai isi ajohin hun orrohoji’to hun ihanie’to etamijanita, bwo ofwoi isi jyo hobwok hulo afauhyen daŋ ittubaniere isi ta arrem iholoŋ eneittok ono Hollum Adwarani al agalik’to daŋ. ¹⁵ Imijye, attu adi ni ihwa olohoho. Hotomunoi lya ol obeŋ’to ojotoro iko al irrirrya’to aboŋojin honyi ŋadi inyi adaha aŋaturoi bwo igonyuni laati inyi ette inyi iloriri. ¹⁶ Ottubanie hobwok jyo amaji an ifurani te nekyana Ebrei, Amagado. ¹⁷ Ijuhok anjelo etahattarihi erre hutto sahan honyi iloyyami. Teyya teyya ottu nekyana on okwat bebe to maji on odwa’to bwo to kurus on ojo, Atuhuno. ¹⁸ Ihalu erre hunia owoni emedehita hilai, nekyanita, etitta hide, bwo fe ekikiro fau on obolo bebe agalik ninya beryen hamanyai laati ifau. ¹⁹ Tania obwanya Babolona amiji eneittok aŋaco hunihoi bwo okwaharai amisihi huno paganohyen. Tania ogilu Hollum Babolona jo ijara hatamata ta akos ono ajore honyi on obolo’to. ²⁰ Olitohini nafuli daŋ addi bwo fe obeŋi adoŋyok oleye. ²¹ Abahye afalaŋa hun obolori’to laati bwo fe odiŋ afalaŋati abotye ihwa arotol atomwana miet. Tania omorye laati Hollum nyo ittigemye afalaŋa isi bwo obolo bebe ettigemyo ania.