¹ Ihalu amijo ni ette igonyuna Lonyo ker ol owotya idoŋe Sion. Owoni laati ikonyi alif eshiha abotye iko atomwana aŋwan haŋwan hul owoni iko afure honyi bwo afure Monyonyi ihomomite hosi. ² Etaniŋu ni etuk an ikyana t’edou an ara ihwa etiri haryak arryai bwo fe ihwa etitta hide on okwat. Ara inyi bwo fe ihwa laati hul irribye adori hosi. ³ Idoloi isi afure aŋejuk ihosyere kurus iko eyyeti aŋwan hun isui’to bwo fe ihosyere marwak. Obeŋ obo atulo oremik idolo afure ania arari laati alif esiha abotye iko atomwana aŋwan haŋwan hunya italahunie’to to fau. ⁴ Isi hya hinya obeŋi owoni iko aŋorwo. Olibori isi ihwa odwoti on hobeŋ’to ottironie iko obo alle. Isi hya hul ijifatye’to Lonyo ker imasik daŋ hun alari inyi. Inyyaŋuni hulo t’ehiji wati irari ahaŋer loŋehwa hulo Hollum iko Lonyo ker. ⁵ Obeŋ nya obo agesemi ihutuhe hosi. Obeŋ obo epali jihosi. ⁶ Ihalu egonyu ni anjelo obo idarra idou bwo owon inyi iko asayyo hun oyiji’to hun odulori’to fur iramyere jyo laati hul amanyai’to ifau; isi awoi wati daŋ, nekyanita wati daŋ gele gele, iko olobyehyen daŋ. ⁷ Ikyana inyi on okwat bebe ojo, Abaŋata Hollum, isyatta akwatan jihonyi, nyo attu asaa ono aŋoco honyi. Itahabuyete lya ol oyyeu’to edou iko afau, bwo aari iko olotilihi. ⁸ Ijifatyo anjelo etarrihi inyi ette jaran, Akwaharo, akwaharo Babolona amiji eneittok. Itamat nya inyi laati hutta fauhyen daŋ aari ajalaŋi hun arai’to esomiti honyi. ⁹ Ijifatyo anjelo etahunihi isi ette jaran te etuk on okwat ojo, Lya al itahabuyo’to acaŋ iko arrijori honyi bwo ifwotu aridinyi ihomom honyi kuyya bu ihani honyi, ¹⁰ amat adi inyi aari ajalaŋi hun arai’to ajore Hollum hun obeŋi iharutoi iko aari. Amat adi inyi to kos ono neloŋojita Hollum. Ittigemye adi amatani te eema iko anahan ihosyere anjelohyen hul olibori bwo fe ihosyere Lonyo Ker. ¹¹ Odok afuro ono ettigemita hosi bwo ittulak fur. Obeŋ obo ayiri jihosi ta afanni iko ta attari. Isi hya hul itahabuye acaŋ iko arrijori honyi bwo hul ifwotuni aridinyi ono afure honyi. ¹² Italeyeuni erre huna adihan ono aati Hollum, isi hya hul ogotyerek’to nefahita Hollum iko neruk jyo Yesu. ¹³ Etaniŋu ni etuk ikyana t’edou ojo, Igyoroi jo, Ijara hya hul oyei’to ta neruk jyo Hobu hotomunohi ta asaa ana many fur. Ojo Oloyiri, Ara ahode, ijara isi oyiri t’egyamita hosi nyo ijifatye ehanita hosi isi. ¹⁴ Ihalu ana amijo ni ette igonyuna edis on obwor bwo itoŋo obo atulo dia al iyyalu Lonyi tulo. Owon egorya ono nayyel ihou honyi bwo owon ademi on ofi’to ihani honyi. ¹⁵ Ojiŋu anjelo obo to maji on odwa’to ette iloŋo on okwat jyo lya al itoŋo’to idis ette jaran, Iduhu ademi hoi bwo odyoŋoi ema nyo odo amana otto fau bwo afany asaa ono adyoŋo. ¹⁶ Tania ette lya al itoŋo’to idis ibironia ademi honyi ifau ette afau dyoŋoro. ¹⁷ Ojiŋu anjelo obo to maji on odwa’to ette dou ol owon bwo fe iko ademi on ofi. ¹⁸ Ojiŋu obo anjelo bwo fe t’etityek ol owon iko adwaran ono eema, ette inyi loŋo on okwat jyo anjelo ol owon iko ademi on ofi’to ette jaran, Iduhu ademi hoi, oŋoce ajalaŋi hutta fau nyo adori aŋer hosi. ¹⁹ Attati anjelo ibironia ademi honyi ifau ette ’tubana aŋer ajalaŋi iwure on omocerek isi, an ara ihwa ajore Hollum. ²⁰ Omoce isi aari haŋer ajalaŋi iler miji ette nooto ’tuna teyya ette dilonia ilohoho kusani bwo fe oŋer many amail esiha arrihai.