¹ Awotya ni ilotifor hari ette ni igonyuna acaŋ ottu addi to hari. Owon inyi iko amwarrak ’tomon bwo osi hattarik. Owoni agoryai ’tomon imwarrak honyi bwo fe igyoroni emoriti ihosi honyi. ² Iyyalaru acaŋ an egonyu ni ihwa aworu bwo owoni ejek honyi ihwa ejek huno aŋumar bwo etuk honyi ihwa elemye. Isyo amunu on obolo’to adwaran honyi jyo acaŋ iko akurus honyi itoŋori. Isyo inyi bwo fe elaballok on obolo’to jihonyi. ³ Egonyu ni ahou honyi abotye iko atoŋosa on ojo attoho inyi ati aŋida inyi. Illillihai laati daŋ hutta fau ette jifaru acaŋ ania. ⁴ Itahabuye laati amunu nyo isyo inyi adwaran honyi jyo acaŋ. Itahabuye bwo fe isi acaŋ ette jaran, ngai ol orryamari’to iko acaŋ? ngai ol oremik’to ’rem ikonyi? ⁵ Bwo fe isyori jyo acaŋ ikyanari erre huno etadara iko huno nemoriti. Isyori jihonyi bwo fe ilettohori laati ta ayafajin atomwana aŋwan harrihai. ⁶ Aŋa inyi etuk honyi imoryere Hollum, bwo omoryo inyi afure Hollum iko aji honyi, ara dwo bu hya hul amanyai’to idou. ⁷ Isyori bwo fe jihonyi irryomoniere iko aati Hollum ette iyyalara isi, ette inyi ilettohori awoi wati daŋ, olobyehyen daŋ, nekyanita wati daŋ gele gele, iko afauhyen daŋ. ⁸ Itahabuye adi laati daŋ hul amanyai ifau inyi, isi hya hunya obeŋi igyoroni afureta hosi ibuk ono nesu many t’etteri fau. Inyi abuk ono Lonyo ker linya ottorhori. ⁹ Lya ol owon iko ayyaha ijara inyi hetaniŋu. ¹⁰ Kuyya igyoroni efita jyo obo atulo ifitani adi inyi ahode, bwo kuyya igyoroni attohoro obo ta ademi, ottohori adi inyi ta ademi ahode. Italeyeuni erre huna adihan iko neruk ono aati Hollum. ¹¹ Egonyu ni acaŋ obo ojiŋu to fau. Owon inyi iko amwarrak arrihai ihwa lonyo ker bwo amala inyi ihwa amunu. ¹² Owon inyi iko edwariti daŋ huno acaŋ etabotye ette inyi itahutana edwariti hunia ihosyere honyi. Bwo fe orrosyo inyi afau iko laati hul amanyai ifau itahabuyere acaŋ etabotye ninya owon’to iko atoŋosa on ojo attoho inyi ati aŋida inyi. ¹² Owon inyi iko edwariti daŋ huno acaŋ etabotye ette inyi itahutana edwariti hunia ihosyere honyi. Bwo fe orrosyo inyi afau iko laati hul amanyai ifau itahabuyere acaŋ etabotye ninya owon’to iko atoŋosa on ojo attoho inyi ati aŋida inyi. ¹³ Ihanio acaŋ etarrihi ellillihita hun obolori’to, dwadi bu ta adwaran honyi itadou inyi eema t’edou many ifau ihosyere wati. ¹⁴ Inyobyo inyi hya hul amanyai’to ifau te ellillihita hunya isyori jihonyi ihaniere ihosyere caŋ. Attati inyi jaran jyo laati jo oŋida isi ohololuni arrijori ono acaŋ ninya ocuhi ta ademi ati hesu inyi. ¹⁵ Isyori adwaran jyo acaŋ etarrihi isyaraniere nesu jyo arrijori ono acaŋ etabotye, jo oŋida arrijori ania ikyana bwo fe ottohori adi laati daŋ hul obeŋi’to itahabuye arrijori ono acaŋ. ¹⁶ Bwo orrosyo inyi laati daŋ ifwotuniere aridinyi ihas iŋeti hosi kuyya bu ihomomite hosi. Arai isi laati lasai iko eleittaha, laati abarak iko alocaŋak, laati hul arai’to apiti iko hul obeŋi’to arai apiti. ¹⁷ Obeŋ obo atulo oremik inyyaŋa kuyya bu itinyyaŋari erre arari al owon aridinyi jihonyi. Ara aridinyi ania afure ono acaŋ kuyya bu anamba ono afure honyi. ¹⁸ Awak eram ana ofyoro. Lya ol owon iko ofyoro ijara inyi ihenio anamba ono acaŋ, nyo ara inyi anamba ono atulo; inyi ana esiha ille iko atomwana ille heille.