¹ Oleyo etamijani on obolo’to bebe t’edou. Owon aŋotte an iyyafak oloŋ ihwa aboŋo bwo owon ayafa iwoyo hejek honyi. Iyyafak inyi egorya ono elelyefi ’tomon harrihai ihou honyi. ² Oyedu inyi ette inyi ’yo te eburaŋatyo ono esyo. ³ Inyyak etamijani obo leyo t’edou. Imijye, ottu amunu on obolo bebe bwo odo. Owon inyi iko osi hattarik bwo amwarrak ’tomon bwo fe owoni agoryai hattarik ihosi honyi. ⁴ Okuro alisa honyi aŋati etahunihi ono elelyefi hutte dou ette sulana isi ifau. Bwo owotya amunu odwo ihosyere aŋotte an ilyaha’to esyo, nyo awak inyi diloro eito al isiuni. ⁵ Isiu inyi eito ’le, inyi alya al ilettohori adi aati daŋ hutte fau ta agolon. Attati eito alya kafana jyo Hollum ikurus honyi, ⁶ ati ofuho aŋotte imur jyo amaji an ihuhumak Hollum tenyi, bwo dia itaŋiyo adi Hollum inyi oŋitek alif abotye iko esiha arrihai iko atomwana ille. ⁷ Owon arrem idou. Mikelele iko anjelohyen honyi orrem iko amunu on obolo’to. Bwo fe amunu ania iko anjelohyen honyi orrem iko Mikelele, ⁸ ati obeŋ amunu iyyala isi tania obeŋ obo amaji jihonyi te dou. ⁹ Ette isi bironia amunu ifau. Ara inyi amunu ninya beryen an anya’to Etisyahani bwo fe anya Sitan, inyi enyabani ono afauhyen daŋ. Ibironi inyi ifau iko anjelohyen honyi daŋ. ¹⁰ Bwo fe etaniŋu ni etuk on okwat t’edou ojo, Ihwania attu etalahuna iko adwaran iko olobye ono Hollum hohoi. Attu bwo fe elaballok ono Kristo nyo ibirori dwo etisyahani addi, inyi etisyahani ono illarak hohoi an itisyaha’to isi ihosyere Hollum hohoi ta afanni iko ta arwe daŋ. ¹¹ Iyyalari isi inyi ta nooto ono Lonyo ker bwo te etamijani hosi an ikyanarik isi, nyo obeŋi isi omunoi nesu hosi dwadi ta asaa ono naye. ¹² Tania ijara edohwo omunoi iko hya hul amanyai’to dia. Orroho bebe jyo afau iko aari nyo afany etisyahani jihosi ta ajore on obolo nyo omijak inyi omutari asahyen hun arasai’to tenyi. ¹³ Al igonyu amunu odwo jo ibirori inyi ifau, olo inyi ittittifyari aŋotte ninya isiu’to eito ’le. ¹⁴ Ati isyori jyo aŋotte ewa arrihai ihwa huno akilir eneittok jo oŋida inyi idarra tohosyere munu addi many jyo amaji honyi imur. Itaŋiyo adi Hollum inyi dia ta aŋasi hunihoi iko anus. ¹⁵ Ette amunu mitara aari to hutuk honyi te ehalu aŋotte ania ihwa ebulyo hari, jo oŋida aari owororo inyi addi. ¹⁶ Ati olwak afau aŋotte ania ette ŋa ewure honyi idiluniere ebulyo hari on ottu’to to hutuk munu. ¹⁷ Tania ijorya amunu bebe jyo aŋotte ania ette inyi leten irryomoniere iko aduri ŋotte hul ijifatye’to nefahita huno Hollum bwo fe iko hul ogolihini’to jyo etamijani ono Yesu. ¹⁸ Owotia nyia anyamanit ania ilotifor hari enne ittokon.