¹ Ara ana etaleyehina ono Yesu Kristo an isyo Hollum jihonyi itahutaniere jyo lapiti honyi erre hun ofwonni adi ihalu kai. Ifak inyi anjelo honyi iramaniere erre huna jyo apit honyi Yoane. ² Yoane olo, inyi etamijanani olo nekyanita huno Hollum iko nettiyenita huno Yesu Kristo, ara dwo bu te erre daŋ hunya igonyu inyi. ³ Ijara lya al ihenio’to hotomunoi iko hya hul itayiruni’to nekyanita huno nekiluna ana, ette ’tunana itajya hosi erre hun igyoroni dini, nyo ilyaha asaa an itasirunierek adi isi. ⁴ Ani Yoane, egyoro ni jyo eklesyahyen hattarik huno Asia. Ijara amehino hatawana jihatai iko nelik taji on ottu’to jyo lya ol owon’to ahana, many nya beryen, bwo ottu adi. Bwo fe ijara nelik taji on ottu’to jyo oloyirihyen hattarik hul owoni’to ihosyere kurus Hollum hatawana jihatai. ⁵ Bwo fe ijara nelik taji hatawana jihatai on ottu’to jyo Yesu Kristo al ara’to etamijanani ol obeŋ’to ogesem bwo ara inyi oloŋeu tehiji hayak bwo fe inyi eleittok olo hobwok hutta fau. Ijara akwatan hatawana jyo lya ol omuno’to hohoi, nyo ohohi inyi hohoi t’eyyata hohoi ta nooto honyi. ⁶ Bwo fe ihuhumak inyi hohoi awati honyi iko ahehumak jyo Hollum Monyonyi. Ijara akwatan iko adwaran hatawana jihonyi fur. Amen. ⁷ Imijyete, ottu adi inyi idisi bwo fe igonyuni adi oŋite wati daŋ inyi ara dwo bu hya hinya ocuhi’to inyi. Oyyoi adi awoi wati daŋ hutta fau te eram honyi. Arai nekyanita hunia ahode. Amen. ⁸ Ojo Hobu Hollum, Ani Alafa iko Omega, on ojo etteri iko esidi, ani alya al awon’to ahana, many nya beryen, bwo attu adi ni. Ani Adwarani al agalik’to daŋ. ⁹ Ani Yoane illa hatai bwo eŋiŋarak ni ikatai te ettigemita bwo fe olobye iko nadihan hun owoni’to itwa Yesu. Awon nya ni iful on obolo an ifurani Patemo te eram ono nekyanita huno Hollum iko nettiyenita huno Yesu. ¹⁰ Itafutak Oloyiri ol Olibo ani to oloŋ ono Hobu ette ni itaniŋuna to horwoŋ hoŋ etuk on okwat’to ihwa aforojo. ¹¹ Ojo inyi, Igyoroi iwaraga erre hun igonyu adi iye bwo fe ifak awaraga ania jyo eklesyahyen hattarik, isi huna: Efisa, Semuruna, Perugamona, Tiatira, Sarudi, Filadelufai, bwo fe Laodisia. ¹² Teyya afyala ni igonyuniere ŋai al ikyana’to jihoŋ. Al afyala ni egonyu ni allomohyen hattarik hun ihuhumi ta nayyel. ¹³ Ihiji allomohyen huna egonyu ni obo al ara ihwa Lonyi tulo. Iyyafak inyi aboŋo on ohodo’to bwo fe iluro asuhe honyi ta aboŋo ono nayyel. ¹⁴ Obwori ofir hou honyi bebe ihwa agutuny. Owoni oŋite honyi ihwa aŋadyefa hima. ¹⁵ Owoni ejek honyi ihwa abilata on opipyak’to an ifuhye ihima bwo fe ara etiri hutuk honyi ihwa aryak arryai. ¹⁶ Owoni elelyefi hattarik ihani iŋet honyi bwo fe to hutuk honyi ottu ademi on ofi’to bebe, bwo fe ara omom honyi ihwa oloŋ an afaŋ’to bebe. ¹⁷ Ninya egonyu ni inyi akwaharo ni ihejek honyi ihwa atulo ol oye’to. Attati inyi iyyabana aani iŋet honyi jihoŋ ette jaran, Hebaŋ, ani etteri iko esidi. ¹⁸ Ani bwo fe leswoni. Aye nya ni ati imijye, esu ni tulaŋ bwo fe awon ni iko eŋanyiti huno naye iko huno Hadese. ¹⁹ Tania igyoroi erre hodwo igonyu iye bwo fe erre hun owoni’to ihwania iko erre hun idwoŋi adi ihalu. ²⁰ Igyoroi bwo fe awoyo hiram ono elelyefi hattarik hodwo igonyu iye ihani iŋet hoŋ bwo fe eram ono allomohyen hattarik huno nayyel. Arai elelyefi hattarik ihwa anjelohyen hulo eklesyahyen hattarik bwo fe arai allomohyen hattarik ihwa eklesyahyen hattarik.