¹ Ani Paulo ababus to Yesu Kristo iko Timoteo illa hohoi. Egyorok hohoi jyo Filimona al emuno hohoi iko al egyama’to ikohoi, ² bwo jyo eklesya on owon’to ihaji hoi. Bwo fe egyorok hohoi jyo Afia hanie hohoi iko jyo Arikipo oseŋeritanani olo Yesu Kristo ikohoi. ³ Ijara amehino hatawana jihatai iko nelik taji on otto’to jyo Hollum Monye hohoi iko Hobu Yesu Kristo. ⁴ Esyo ni ahumo jyo Hollum hoŋ oŋitek daŋ teye al amojo ni. ⁵ Nyo etaniŋu ni amuno hoi bwo fe neruk hoi jyo Hobu Yesu iko jyo aati Hollum daŋ. ⁶ Bwo amojo ni jo oŋida etisarrahina ono neruk hoi iyaŋuno jyo aati amijana hirre daŋ hun oyiji hun ofwonni to Kristo. ⁷ Illaŋ awon ni iko namuno on obolo iko etilihyo al agilu ni namuno hoi, nyo ilwahyo iye atajya heruhok. ⁸ Tania dwadi aremik ni iŋere ifahari iye to Kristo ihaniere on oyyu, ⁹ elolya ni jihoi ta namuno, nyo ani Paulo amarwani iko ababus to Yesu Kristo. ¹⁰ Elolya ni jihoi te eito hoŋ Onesimo, nyo ottu inyi rahan ahito hoŋ ibabus dini. ¹¹ Igyama nya inyi on orroho jihoi ati ihwania igyama adi inyi on oyyu jihoi bwo fe jihoŋ. ¹² Enyyak ni inyi jihoi. Ifwotu inyi ihwa lonyi hoŋ al amuno ni. ¹³ Awak dwo ni inyi erasa ikoŋ jo oŋida inyi igyama jihoŋ imaji hoi al awon ni ibabus te eram ono asayyo hun oyiji’to. ¹⁴ Ati abeŋ adi ni ehanio ana al habeŋ ni amijak awahan hoi, nyo oŋida ayiji hoi obeŋ ara ta arrosyo ati ta awahan hoi. ¹⁵ Kuyya opyaharo nya inyi jihoi do jo oŋida inyi acaharo irasari jihoi fur. ¹⁶ Obeŋ bu inyi ara apit ihwania, ati agalik inyi apit nyo ara inyi illaŋ al amuno ni bebe. Bwo imuno adi iye inyi, ta ahwan honyi iko te eruk honyi jyo Hobu. ¹⁷ Al igigilo iye jo ara ni olorryahata hoi, ifwotu inyi ihwa ahwan hoŋ. ¹⁸ Bwo kuyya ipal nya inyi jihoi, kuyya owoni ahoros hoi ikonyi, oŋoto erre hunia jihoŋ. ¹⁹ Ani Paulo, egyorok ni ana ta aani hoŋ, aduma adi ni. Abeŋ adi ni ekyana te eram ono ahoros hoŋ ikoye, ara inyi ahwan hoi luŋa. ²⁰ Afe illaŋ, oŋida iye itamuno ani ta afure Hobu, olwahye ataji hoŋ ta afure Kristo. ²¹ Egyorok ni jihoi nyo amijak ni ahode ifaha adi iye, bwo ihanio adi iye on oyyu agalik erre hun eramak ni jihoi. ²² Oyyu dwo al ihuhumak iye amaji jihoŋ itoŋori, nyo eyihi ni jo olwahye emojiti hoi ani ifanyari jihoi. ²³ Itifonya Epafro iye. Inyi otto babus ikoŋ ta afure Yesu Kristo. ²⁴ Itifonyai Marko, Aristarko, Demo, iko Luka iye. Isi illarak hoŋ hul egyama’to ikoŋ. ²⁵ Ijara amehino ono Hobu hohoi Yesu Kristo hatawana jyo oloyiri hoi. Amen.