¹ Ani Yuda apit olo Yesu Kristo bwo ani illa Yakobo. Egyoro ni jyo hulya hul iloŋoi, bwo jyo hul omuno Hollum Monye hohoi iko jyo hul ittaŋuni to Yesu Kristo. ² Ijara namehino bwo nelik taji iko namuno ofonihino jihatai. ³ Itai hul amuno ni, egigilo ni bebe igyorori jihatai te eram ono etalahuna hohoi, ati oŋida ani egyoro ilolyari jihatai jo oŋida itai itarrisati ta neruk ninya isyori jyo aliborok. ⁴ Nyo oryeuni omuk laati kai kai ihiji hatai, isi laati hunya oŋot Hollum ta atimo hosi Hollum. Iloiti isi amehino ono Hollum arrohoji, bwo fe ihari isi Eleittok hohoi olobotye inyi Hobu Yesu Kristo. ⁵ Ihwania awak ni itagiluna itai, dwadi imijana nya itai erre huna daŋ jo italahu nya Hobu laati addi to fau Masir ati ihalu ottoho inyi hulya hul obeŋi’to iruhi. ⁶ Bwo fe ifitak nya inyi anjelohyen ta aririk, isi anjelohyen hulya hunya ihari’to amaji hosi t’etteri. Itihok inyi isi idumele many iholoŋ ono aŋoco eneittok. ⁷ Arai Sodoma iko Gomora bwo amisihi hun onyihai’to jihosi etamijani ono aŋoco hima on osyo’to fur, nyo ihanie nya isi esomiti daŋ iko efariti hun orrohoji. ⁸ Ara adi ihwo nya jyo laati hul oryeuni’to ihiji hatai. Itiboti isi ahwattek hosi bwo ihari isi hul ilettohorik’to isi ette moryo eleittaha. ⁹ Itarisai nya Mikalele al ara’to arkanjelo iko etisyahani. Aŋalafai isi ta ahwan Mose bwo abaŋ Mikalele isiŋyere etisyahani ta agolon, ati ojo inyi jo, “Ijara Hobu isiŋyo iye.” ¹⁰ Ati itarisai laati hyodwo te erre daŋ hun obeŋi isi omijani, bwo fe ihanie isi ihwa awahi isi, ihwa ihanie acaŋi luŋa, tania itarrohojari erre hunia isi. ¹¹ Orroho bebe jyo laati hulo, nyo adahai isi ta nekoi Kaino. Te eram ono agurusi ijifatye isi epali ono Balama, bwo oyei isi ta amesyo ihwa Kora. ¹² Arai laati hulya ihwa amorwoi hun itihoi’to nyo iŋereji isi bebe al oŋiye isi ikatai ta akaramahyen hatai. Arai isi ihwa edisi hun obeŋi iko ahide hun oniŋye’to ahuco oyyami. Arai isi ihwa ayyani huno elelaŋ hun obeŋi’to oŋijuni, hun oyei’to, bwo fe orutuni addi. ¹³ Arai isi ihwa efolyahita hari bwo arai ehanita hosi hun eloririjita ihwa olobou hari. Arai isi ihwa elelyefi hun isyabitai’to hun afanyi adi idumele an iryok’to ’tir ’tir on obeŋ esidi honyi. ¹⁴ Owon nya Enoka al ara’to etahattarihi ihalu Adam bwo ikilu inyi jyo laati hulo ette jaran, “Imijyete, ofwonni adi Hobu iko aliborok honyi hul olwaji bebe ¹⁵ iŋocyere laati daŋ, bwo fe ituruk inyi laati daŋ hul otimoi’to Hollum te ehanita hosi daŋ hun orrohoji’to hunya ihanie isi ta abyaŋan mijana Hollum. Bwo fe ituruk adi inyi isi te emoriti daŋ hun orrohoji’to hun ikyanai eyyak tenyi, nyo arai isi latimok Hollum.” ¹⁶ Arai laati hulo ahamwaŋak iko aheŋuŋunok hul adahai te ewahiti huno ahwattek hosi. Ihutuhi isi ta nekyanita hun itadararik isi, bwo ittittai isi laati inyuraniere ayijita hosi. ¹⁷ Ati itai hul amuno ni, ogotyete nekyanita hunya ikiluni lefahat hulo Hobu hohoi Yesu Kristo. ¹⁸ Ojori nya isi jihatai jo, Te esidi fau owoni adi etabuyaŋak hul adahai’to te ewahiti huno ahwattek hosi iko ta abyaŋan mijana Hollum. ¹⁹ Isi hulya hul itabwanye’to laati bwo ottifyai isi ewahiti huno ahwattek hosi, bwo fe obeŋi isi iko Oloyiri. ²⁰ Ati itai hul amuno ni, itagolyete ahwattek hatai ta neruk hatai on olibo’to, omojoti to Oloyiri ol Olibo, ²¹ ogolihina jyo namuno ono Hollum ta ahwattek hatai, itilati amehino ono Hobu hohoi Yesu Kristo many inyuraniete tai nesu on osyo fur. ²² Itahutana namehino jyo hul ikuyyai’to, ²³ bwo fe ipihoro laati omuk addi to hima on osyo fur italahuniere isi, bwo jyo omuk itahutana amehino ta abaŋi, ati oliwati arrohojita hosi ara dwo bu aboŋo an iyyafani isi. ²⁴ Ihwania ijara akwatan hatawana jyo lya ol oremik’to irrirrya itai jo oŋida ibyaŋata tai ikwahati, bwo fe oremik inyi ititoŋonia itai ihosyere kwatan honyi ta abyaŋan ipali iko ta namuno on obolo’to. ²⁵ Ijara akwatan bwo abolori iko agolon ojo adwaran hatawana jyo Hollum olobotye Etalahani hohoi ta Yesu Kristo Hobu hohoi. Ijara akwatan hatawana jihonyi t’etteri many iko ihwania bwo fe tulaŋ. Amen.