¹ Ihwania ette Pilato iyaro Yesu jyo oseŋer ette isi lumyo inyi asai. ² Bwo oyiri oseŋer egorya hikwa ette isihonia lihou ette itiyyafana nahwan honyi ta nobo naboŋo en emoli. ³ Bwo fe ihuhutoni jihonyi ette jaran, Hobu Yudea, moŋ, bwo fe ette naŋ inyi. ⁴ Inyyak Pilato jiŋuna alet ette jaran jihosi, Alya atina alya, eyak ni inyi jihatai oŋida imijana tai jo abeŋ ni anyurak obo eram honyi on orroho. ⁵ Ojiŋu fe Yesu ol owon iko egorya hikwa lihou bwo naboŋo en emoli. Ette Pilato jaran, Imijyete atulo alya. ⁶ Ninya igonyuni ehumak eleittaha iko legyamak hosi Yesu iwuwoŋitai isi ojori, Isihonia inyi, isihonia inyi. Ojo Pilato jihosi, Iyatti, isihonia ta ahwattek hatai ikruce, ati abeŋ ni anyurak obo eram honyi on orroho. ⁷ Itarraŋi Yudea jihonyi, Owoni nefahita jihohoi, ta nefahita huna osiru jihonyi naye, nyo ikyana nya inyi ojo ara inyi o Lonyi Hollum. ⁸ Itaniŋu Pilato ekyanita huna ette inyi baŋi bebe. ⁹ Inyyak bu Pilato jiŋana ihaji ette jaran jyo Yesu, Iye alaja? Obeŋ fe Yesu itarraŋ obo ekyana jihonyi. ¹⁰ Ette Pilato jaran jihonyi, Ibeŋ iye ikyana jihoŋ? Itimo iye jojo owon nadwaran jihoŋ ihouniere iye iko isihoniere? ¹¹ Itarraŋ Yesu jihonyi, Hara nya obeŋi isyori jihoi t’edou ibeŋ dwo iye iko nobo nadwaran ihaniere obo ariŋ jihoŋ. Ta neram ana lya al isyo’to nani lihas hoi iyyau dwo inyi neyyau an agalik’to onohoi. ¹² Ihwania awak Pilato houna Yesu, ati Yudea iwuwoŋitai bebe ojori, Al ihou iye inyi ibeŋ iye ira amotte hobu Cesare nyo aati daŋ hul ojori’to era isi ahobwok ihari Cesare. ¹³ Itaniŋu Pilato nekyana ana, orihoro inyi Yesu alet ette isuga ikurus an iwwaharik limaji an ifurani Ebrei Gabata. ¹⁴ Ara nya akilfanni ono oloŋ an ihuhumyerek neyom. Ette Pilato jaran jyo Yudea, Imijyete Hobu hatai. ¹⁵ Iwuwoŋitai ati isi ojori, Iyaro, iyaro addi, isihonia inyi likruce. Ojo Pilato jihosi, Esihok adi ni Hobu hatai? Itarraŋi ehumak eleittaha, Ebeŋ hohoi obo lobu arari Cesare. ¹⁶ Ette Pilato isyo Yesu jihosi isihoniere likruce. ¹⁷ Inefuni ati isi Yesu ette iyaro. Bwo fe Yesu olororo akruce honyi ette leten jyo namaji an ifurani Ebrei Golgota on ojo amaji hou. ¹⁸ Isihoni isi Yesu dia iko lomuk arrihai, abotye tolo, lobo tole ati owon Yesu ihiji hosi. ¹⁹ Igyorok fe Pilato nobo negyeri an ihanani ihide kruce. Igyoroni jo, YESU OLO ANASARETANANI HOBU OLO YUDEA. ²⁰ Ihenie Yudea arryai negyeri ana nyo namaji an isihonierek Yesu ilyaha imiji. Igyoroni ta nekyana Ebrei iko ono Grik iko ono Latini. ²¹ Ojori ati ehumak eleittaha hulo Yudea jyo Pilato, Hegyorok, Hobu olo Yudea, igyorok ati jo, Ikyana inyi jo, inyi Hobu olo Yudea. ²² Itarraŋ Pilato ojo, Nerre hodwo egyorok ni, legyoro ni. ²³ Ninya isihoni oseŋer inyi iduhuni aboŋojin honyi ette harana amasik aŋwan bwo isyarani jyo oseŋer daŋ ababo. Iduhuni bu naboŋo ottotwa. Obeŋ nerifit jyo aboŋo ottotwa ana. Oyyei nya inyi daŋ arabotye to murut many lihejek. ²⁴ Ikikyanai ati isi, Helaha egwas ana. Hekilati ottuadi inyi jyo ŋai. Oŋida itasiruni egyerita hun ojori, “Aharai isi naboŋojin hoŋ, Bwo fe abahai isi ogumar ta naboŋo hoŋ.” ²⁵ Ihanie oseŋer ihwo nya. Owotyai ati liwoyo kruce honyonyi bwo Maria ŋorwoi Kleofa, bwo hanie honye Yesu, iko Maria Madalena. ²⁶ Al igonyu Yesu honyonyi iko leyiyanani ol omuno inyi owotyai dia, ojo jyo honyonyi, Iyaŋ, lonyi hoi olo. ²⁷ Ette inyi jaran bu jyo leyiyanani, Honyohoi ana. To noloŋ nya itamanyayo leyiyanani lya honye Yesu. ²⁸ Lihalu nyo omijak Yesu latuhunie nerre daŋ, oŋida ihanie bu neram inya igyoroni, ikyana inyi ojo, Ebwoto ni. ²⁹ Ihanani fe dia nobo natobok hari an ifut iko aari hun irwatiŋoi litwa. Ilutoni obo aboŋo litwa ette ihanana jyo obo olosiholoti ette isi iyahina lihutuk Yesu. ³⁰ Al amat Yesu ojo inyi, Atuhuno. Ijurru inyi nahou ette ye. ³¹ Ara nya noloŋ an ihuhumyerek neyom. Oŋida hetebyaŋahi ahwattek arasai likrucehyen to sabato, nyo ara sabato ania noloŋ eneittok. Ifiye Yudea jyo Pilato hotowuriehe nejek hosi jo oŋida iduhuni ahwattek addi to krucehyen. ³² Afwoi ati oseŋer ette isi wur nejek tulo abotye iko huno atulo etarrihi hyodwo isihoni iko Yesu. ³³ Ofwonni isi jyo Yesu, onyurani isi aye inyi ette isi ilak wur nejek honyi. ³⁴ Ati ocuk obo olo oseŋer amari Yesu ta afere attati nooto iko naari wouno teyya. ³⁵ Linya igonyu’to itahutak etamijani bwo fe ara etamijani honyi ahode. Omijak bu inyi jo ikyana inyi eram ahode, oŋida itai iruhoto. ³⁶ Hodwo hirre ihanie oŋida itasiruni egyerita hun ojori, “Obeŋ adi obo ahotyo honyi owuro abotye.” ³⁷ Bwo fe nobo ekyana ojo, “Iŋiŋyalai adi isi jyo lya ol ocuhi isi.” ³⁸ Ihalu hodwo hirre, ottu Yosefo otto miji Arimatea, al ara ahejifani Yesu an idima ta abaŋi Yudea, ette ifiyo Pilato ta ahwan Yesu iyari addi. Aharak fe Pilato. Attati inyi leten, ette idutuna nahwan Yesu. ³⁹ Bwo fe Nikodemo linya ottu’to jyo Yesu ta arwe iyaŋuno muraz en eharuto iko aloea hun odiŋi daŋ arotle esiha abotye. ⁴⁰ Iyarai isi nahwan Yesu bwo obubunani ta aboŋo ette ihanana dia nerre hun oŋwoji gir gir, ihwa ihanie Yudea al onuhani obo atulo. ⁴¹ Limaji an isihonierek Yesu owon obo najasyore. Bwo fe lijasyore owon obo nelume naŋejuk ono hobeŋi onuhani lobo dia. ⁴² Itaferehini fe Yesu dia, nyo ilyaha nelume bwo fe motye ara oloŋ neyom ono Yudea.