¹ Ihalu ikyana Yesu ekyanita huna ofwoi inyi iko leyiyanak honyi lifohor lowore Kedro tolya. Owon dia nobo najasyore, ette inyi jiŋana dia iko leyiyanak honyi. ² Omijak fe Yuda, etinyyaŋani, amaji ania nyo adahatye nya Yesu dia iko leyiyanak honyi gagaga. ³ Isyori ehumak eleittaha iko Farisei jyo Yuda eluluŋ oseŋer iko legyamak hulo aji imojit eneittok, ette inyi leten dia. Iyarai isi allomohyen iko narwata ojo erremiti. ⁴ Nyo ta amijana Yesu nerre daŋ hun ofwonni adi wanan, teyya ette inyi leten jihosi ette jaran, ngai al ittifyati tai? ⁵ Itarraŋi isi ojori, Yesu Anasaretanani. Ojo Yesu jihosi, Ani alya. Owon bu Yuda, etinyyaŋani, lihiji hosi. ⁶ Lajo ati Yesu, Ani alya, bwo isi ette iŋiŋad bwo ibatarai ifau. ⁷ Inyyak fe Yesu ifiyo isi ojo, Ittifyati tai ŋai? Itarraŋi hya ojori, Yesu Anasaretanani. ⁸ Itarraŋ Yesu, ojo, Ajo dwo bu ni jihatai nani alya. Al ittifyati tai nani, idehina hulo hetefwahi. ⁹ Oŋida itasiruni nodwo hiram ikyana inyi ojo, Aati hinya isyo iye nani abeŋ ni etalitohi obo olosi abotye. ¹⁰ Owon ati Simone Petro iko nademi on obolo. Osutu inyi ademi to sohobo ette yef lobo lapit olo ehumani ol obolo’to ette isaluna neyyok honyi etteŋet. Anya lapit alya Malko. ¹¹ Ojo ati Yesu jyo Petro, Osuhok ademi hoi lisohobo. Igigilo iye jo abeŋ adi ni amat akosy an isyo Monyoŋ jihoŋ? ¹² Ette eluluŋ oseŋer iko eleittok hosi bwo legyamak hulo Yudea inefuna Yesu, ¹³ ette ifitana, ette rihoro inyi teyya jyo Anas do, nyo inyi hamoni Kaifa, al ara’to ehumani ol obolo’to te eŋa nya. ¹⁴ Inyi Kaifa alya linya iramak’to Yudea jo oŋida atulo abotye oye ta aati daŋ. ¹⁵ Ati arasai Simone iko lobo leyiyanani ijifatyo Yesu. Bwo fe omijak ehumani ol obolo’to afure leyiyanani lya. Ojiŋani iny i arabotye iko Yesu lihiloŋoni ehumani. ¹⁶ Ati arasa Petro ilet. Ojiŋu ati lodwo leyiyanani ol omijak ehumani ol obolo’to inyi ette ikyana jyo nerrirryani ikat, ette itajiŋana Petro. ¹⁷ Ojo ati nerrirryani ikat jyo Petro, Iye bu lobo olo leyiyanak honyi? Itarraŋ inyi, Obeŋ. ¹⁸ Inahini legyamak iko oseŋer eema ette wotya dia osujai eema, nyo ihacoro bebe. Bwo fe owotya Petro ikosi ol osuja eema. ¹⁹ Ifiyo fe ehumani ol obolo’to jyo Yesu neram ono leyiyanak honyi iko nettiyenio honyi. ²⁰ Itarraŋ Yesu ojo, Ekyana ni jyo aati on oleyo, ettiyenatyo nya ni ihasik imojiti iko ihaji imojit eneittok hun adaharik Yudea daŋ. Abeŋ nya ni ekyana obo ariŋ lit lit. ²¹ Ifiyo iye jihoŋ nyo? Ifiye hinya itayiruni’to nerre hunya ekyana ni jihosi, omijani fe isi nerre hunya ekyana ni. ²² Al ikyana inyi ihwo nya, abotye olo legyamak hul owoni’to dia anaŋ Yesu bwo ojo, Itarraŋ iye jyo ehumani ol obolo’to ihwania? ²³ Ojo Yesu jihonyi, Al ekyana dwo ni on orroho, itahutak nepali hoŋ. Al ekyana dwo ni on oyyu, inaŋ ati iye nani nyo? ²⁴ Ette Anas ifahina Yesu al ifiti jyo Kaifa ehumani ol obolo’to. ²⁵ Owon bu Simone Petro dia ol osuja eema. Ojori omuk jihonyi, Ira bwo fe iye lobo olo leyiyanak honyi? Iha inyi ojo, Obeŋ. ²⁶ Obo olo legyamak ehumani ol obolo’to, atahaŋ ba atulo odwo isalu Petro neyyok honyi, ojo, Abeŋ dwo ni egonyu iye lijasyore ikonyi? ²⁷ Inyyak Petro risa, ojo, Obeŋ. Ette ahohoro ilok. ²⁸ Ara amotye attati isi rihoro Yesu to haji Kaifa lihaji okuma an anya’to pretoryo. Hobeŋi isi ojiŋani nyo itadwari isi jo al ejiŋak isi ette isi byaŋan enyyak ŋiyo neyom. ²⁹ Ojiŋu fe Pilato alet jihosi, bwo ojo, Anyo riŋ an irrasana tai atulo olo? ³⁰ Itarraŋi isi ojori, Obeŋ dwo inyi ara olorroho eyaŋuno dwo hohoi inyi jihoi? ³¹ Ojo ati Pilato jihosi ojo, Iyati inyi, oŋototo neram ta ahwattek hatai. ³² Ojori ati Yudea jihonyi, Itihi jihohoi attohyo lobo. Ara ana itasiruniere nekyana Yesu an itahutaniere inyi naye on oyeri adi inyi. ³³ Inyyak Pilato jiŋana ihaji ette iloŋuna Yesu ette ifiyo inyi ojo, Ira iye a Hobu olo Yudea? ³⁴ Itarraŋ Yesu ojo, Neram ana iye likyana ta natwa hoi hama kuyya lomuk ikyanai jihoi? ³⁵ Itarraŋ Pilato ojo, Ara ni Ayudetanani? Aati hoi iko ehumak eleittaha, isi iyaunie iye jihoŋ. Anyo nyati ihanio iye? ³⁶ Itarraŋ Yesu jo, Obeŋ olobye hoŋ ara ono afau ana. Ara dwo nolobye hoŋ ono afau ana dwo mana aati hoŋ arrem jo oŋida obeŋi isyori nani jyo Yudea. Ihwania obeŋ nolobye hoŋ odyoto tene. ³⁷ Ojo ati Pilato jihonyi ojo, Ira ati iye ahobu? Itarraŋ Yesu ojo, Iye lijo ara ni ahobu. Ta neram ana isiuni nya nani. Attu nya bu ni lifau itamijaniere nelahode. Hul awahi’to daŋ nelahode itayirye nekyanita hoŋ. ³⁸ Ojo Pilato jihonyi, Nanyo nelahode? Likyana Pilato ihwania inyyak inyi jiŋuna jyo Yudea ette jaran jihosi ojo, Abeŋ ni anyurak obo eram honyi on orroho. ³⁹ Ara emohit hatai ihohiniere atulo abotye te eyom ono Allaŋan Anjelo. Iwahata tai ahohi ni jihatai Hobu olo Yudea? ⁴⁰ Inyyahi isi iwuwoŋita daŋ ojori, Hehou olo, ohou ati Baraba. Ati ara Baraba olohoho.