¹ Ani Yakobo, apit olo Hollum iko Hobu Yesu Kristo, efonyo ni awoi ’tomon harrihai hul isarrahini’to. ² Illarak hoŋ, omunoti al ofwonni esusuta gele gele jihatai, ³ nyo imijana tai jo iyaŋuno akemyo ono neruk hatai adihan tajya. ⁴ Bwo ijara adihan hototuhok egyama honyi on oyyu jo oŋida itai daŋ iyijoto bwo ibyaŋata iwahata obo ariŋ. ⁵ Ati kuyya owon obo alatai ol obeŋ’to iko ofyoro ijara inyi omojo jyo Hollum bwo isyori adi jihonyi. Nyo isyo Hollum jyo aati daŋ te emorot, obyaŋara te eŋuŋunita. ⁶ Ati oŋida inyi omojo ta neruk bwo obeŋ ikuyya, nyo lya al ikuyya’to ara inyi ihwa afolyahita hari on ohuco oyyami folyak folyak. ⁷ Helaha atulo alya igigilo jo efwotu adi inyi omuk erre jyo Hobu. ⁸ Nyo atulo ol owon iko atajya arrihai iparaŋa inyi te ehanita honyi daŋ. ⁹ Ijara eruhoni al ilocaŋ’to hotomunoi ta abolori honyi ihosyere Hollum. ¹⁰ Bwo ijara abarani hotomunoi ta amutari honyi, nyo otuhunie adi oŋitek honyi ihwa ayaburita huno amiyaŋ. ¹¹ Nyo al idwoŋ oloŋ on onok’to bebe ette itayoho amiyaŋ, bwo ororwouni ayaburita honyi bwo elamanita honyi ette litohina. Ara adi ihwania jyo abarani nyo oye adi inyi hottifya inyi ebariti honyi. ¹² Ijara atulo al odihu’to ettigemyo hotomunoi, nyo al agalik inyi esusuyo ifwotu adi inyi egorya ono nesu an ilaman’to iyyafaniere ihou, on ocorok Hobu jyo hulya hul omunoi’to inyi. ¹³ Al ottu esusuyo jyo obo atulo helaha inyi ojo, Hollum ani esusuyo nyo obeŋ inyi isusuyo obo atulo, bwo ittallik arrohoji isusuyo Hollum. ¹⁴ Ati arai ewahiti huno ahwan hun isusuye’to laati daŋ ababo ette iyaro isi jyo arrohoji. ¹⁵ Iyaŋunie ewahiti huno ahwan eyyau, bwo iyaŋuno eyyau naye. ¹⁶ Illarak hoŋ hul amuno ni, henyobyete ahwattek hatai. ¹⁷ Ofwonni esyorita daŋ ababo hun oyiji’to iko hun olibori’to to hide bwo odetunie isi jyo Monye olo afaŋan. Ittallik inyi lufaji bwo fe obeŋ abali jihonyi. ¹⁸ Isyo inyi nesu aŋejuk jihohoi ta awahan honyi hama bwo ta nekyana ono nelahode tania era hohoi oloŋehwa ihiji hirre hun oyyeu inyi. ¹⁹ Illarak hoŋ hul amuno ni, omijana erre huna. Ijara laati daŋ ababo itaniŋuni kwak. Helaha isi ikyanai kwak. Helaha isi iloŋojitai kwak. ²⁰ Nyo obeŋ neloŋojita iyaŋuno abisan ono Hollum. ²¹ Tania iyara addi ebotita daŋ iko arrohojita hun agalihini’to bwo ifwotuna nekyana ono Hobu ta anyalami, nyo ara ekyana honyi an idulani itajya hatai on oremik’to italahuna oloyirihyen hatai. ²² Irata ahefahak ikyana bwo herata ahetaniŋok asai hul inyobyete ahwattek hatai. ²³ Nyo kuyya ara obo atulo ahetaniŋoni asai ono nekyana bwo obeŋ inyi ara ahehanani, ara inyi ihwa atulo ol omijo’to omom honyi to miraya, ²⁴ nyo iŋiŋyala inyi omon honyi ette leten addi, ette gworo kokwak omom honyi odwo omijo inyi. ²⁵ Ati kuyya odulo obo atulo ihenio efahita huno Hollum hun oremehini ihohiniere, isyarak adi Hollum emuniti jihonyi te ehanita honyi, nyo obeŋ inyi ara ahetaniŋoni ol ogworo’to, ati ara inyi ahehanani al igyama’to. ²⁶ Kuyya owon obo ihiji hatai al igigilo jo ara inyi atulo Hollum ati obeŋ inyi itik aŋadyef honyi, inyobyo inyi ataji honyi bwo ara neruk honyi jyo Hollum asai. ²⁷ Eruhoni al ara’to ahode bwo fe olibo ihosyere Hollum Monye hohoi, inyi alya al adaha’to jyo ahohyo iko ehidahi ilwahyere isi te ettigemyo hosi bwo fe irrirrya inyi ahwan honyi t’ebotita hutta fau.