¹ Ara nya Melekisedek hobu olo Salem bwo fe ara inyi ehumani olo Hollum al agalik’to daŋ. Orwaŋanie nya inyi iko Abramo ninya ocohuniere Abramo to ’tohyo honyi hobwok ette Melekisedek itajahina inyi. ² Isyo nya Abramo aŋati etattomoni jihonyi ono erre hun iyauno inyi to ’rem, nyo ahosyere daŋ ara Melekisedek hobu olo abisan ihwa itahutak afure honyi. Inyi bwo fe hobu olo Salem on ojo hobu olo nelik taji. ³ Obeŋi igyoroni esyok honyi ara bu awoyo hosi, obeŋi igyoroni etteri kuyya bu esidi ono nesu honyi, ati iyyalu inyi Lonyi Hollum nyo ara inyi ahehumani ol odulo’to fur. ⁴ Ikemijyete abolori ono atulo olo, nyo isyo nya Abramo amarwani aŋati etattomoni jihonyi ono erre hun iyauno inyi to ’rem. ⁵ Bwo fe awoyo ba Levi hul ifwotutai egyama ono ehumani, owoni isi iko efahi imojuniere aŋati etattomoni jyo laati hul arai illarak hosi, dwadi arai isi hutto woyo ba Abramo. ⁶ Ati atulo alya, Melekisedek ol obyaŋara to woyo ba Levi, ifwotu inyi aŋati etattomoni jyo Abramo, bwo fe itajak inyi lya ol owon’to iko ecoriti. ⁷ Eram ana an ara’to ahode jo, itajak atulo al agalik’to lya ol omuta’to. ⁸ Tania ifwotuni ehumak hutto woyo ba Levi aŋati etattomoni dwadi oyei adi isi, ati ifwotu Melekisedek aŋati ania bwo ara inyi atulo al isu’to fur. ⁹ Bwo ajo ni jo, Levi alya al ifwotu’to aŋati etattomoni, oduma nya inyi beryen aŋati etattomoni to Abramo. ¹⁰ Nyo arasa nya inyi ihwan hohonyi honyi ninya orwaŋanierek Abramo iko Melekisedek. ¹¹ Ihwania kuyya onyurani laati abisan te ehumak hutto woyo ba Levi, nyo tenyi ifwotuni laati efahita, nyo nyi do ewak hohoi obo to woyo ba Melekisedek, bwo obyaŋara to woyo ba Arone? ¹² Nyo al iloiti awoyo ono ehumak oŋida bwo fe iloiti efahita. ¹³ Igyoroni erre huna to lya ol odyoto’to jyo obo awoyo hama, bwo to woyo honyi obeŋ nya tulo igyama te etityek ono ehuma. ¹⁴ Nyo ahode ottu nya Hobu hohoi to woyo ba Yuda, ati obeŋ nya Mose ojo onyimuni adi ehumak to woyo ania. ¹⁵ Bwo fe oleye adi erre hun ekyana hohoi ahode al egonyu hohoi obo ehumani odyoto ihwa ninya arari Melekisedek. ¹⁶ Obeŋ inyi ara ahehumani te ejifatyo honyi efahita ati ta adwaran ono nesu on obeŋ adi isid. ¹⁷ Nyo ojori nya jihonyi jo, “Ira iye ahehumani fur to woyo ba Melekisedek.” ¹⁸ Tania itapwahi efahi ottohosyere nyo ilik inyi bwo fe ofyaha. ¹⁹ Nyo obeŋi nya efahita itabisi omuk erre ati ewon hohoi iko neyihina on oyyu’to agalik, an ituhutoro’to hohoi jyo Hollum. ²⁰ Ihanani nya Kristo ahehumani te ellama. ²¹ Ihanani ehumak huttohosyere ta abyaŋan illama, ati ikyana Hollum jyo Kristo ojo, “Illama Hobu Bwo fe obeŋ adi inyi iloit nekyanita honyi. Ira adi iye ahehumani fur.” ²² Tania itagol Yesu ecorit aŋejuk on oyyu’to agalik ninya amarwani. ²³ Owoni nya ehumak arryai nyo al oye obo oŋida obo orutak egyama honyi. ²⁴ Ati odulo Yesu fur tania obeŋ adi egyama honyi otuhuno. ²⁵ Tania oremik inyi italahuna many fur hya daŋ hul ofwonni’to jyo Hollum tenyi nyo amanya inyi fur imojori tesi. ²⁶ Oyyu jihohoi iwanari iko ehumani ol obolo’to ihwa alya nyo olibo inyi, bwo fe obeŋ inyi inyobyo, kuyya bu iyyau dwadi amanya inyi ihiji heyyak, bwo fe itahabuye inyi idohwo. ²⁷ Obeŋ Yesu isyo ehumita oŋitek daŋ ihwa ninya ihanierek ehumak hul obolori’to, te eyyata hosi ahosyere, bwo fe ihalu te eyyata huno laati. Ati ihanio nya inyi enyyahi abotye al isyo nya inyi ahwan honyi iyeri ikruce. ²⁸ Onyimuni efahita ehumak hul ilihi’to, ati nekyana ono ellama on owon’to ihalu efahita, onyimu inyi Lonyi ol obis’to fur.