¹ Nya beryen ikyana Hollum jyo hohonyok hohoi te etuhe huno eyak sayyo te ekyanita gele gele iko te ekota arryai. ² Ati to oŋitek huttehalu huna ikyana inyi jihohoi to Lonyi honyi linya onyimu inyi irutaniere erre daŋ, bwo fe oyyeu nya Hollum afauhyen daŋ tenyi. ³ Itahutak inyi akwatan ono Hollum bwo fe iyyalu inyi Hollum ahode. Adanyaro inyi erre daŋ ta adwaran ono nekyanita honyi. Ninya italibo inyi eyyata daŋ itoŋo inyi ihani iŋet ono Adwarani ette dou. ⁴ Bwo fe agalik inyi anjelohyen bebe nyo isyori nya jihonyi afure on oyyu’to agalik hunosi. ⁵ Obeŋ nya Hollum ikyana jyo obo anjelo ojo, “Iye lonyi hoŋ, Ahana attu ni rahan amonyohoi.” Obeŋ bu inyi ojo jo obo anjelo jo, “Ara adi ni monyohoi, bwo fe ira adi iye lonyi hoŋ.” ⁶ Bwo fe ninya iyaŋuno inyi oloŋeu honyi ifau ojo inyi jo, “Ijara anjelohyen daŋ hulo Hollum itahabuye inyi.” ⁷ Ojo inyi ta anjelohyen jo, “Ihuhumak inyi anjelohyen honyi ihwa oloyyami, Bwo fe ihuhumak inyi legyamak honyi ihwa aŋadyefa hima.” ⁸ Ati to Lonyi ojo inyi, “Hollum, odulo adi akurus hoi fur. Bwo fe obisi efahita huno olobye hoi. ⁹ Imuno iye alibori bwo iliwari eyyata. Tania Hollum al ara’to Hollum hoi luŋa, onyimu inyi iye, Bwo fe isyo inyi jihoi etahabuyo iko namuno agalik daŋ.” ¹⁰ Ojo inyi bwo fe, “Hobu, t’etteri iyyeu nya iye afau, Bwo fe arai edohwo egyamita huno ahas hoi. ¹¹ Otuhunie adi isi, ati irasa adi iye fur; Imarwahi adi isi daŋ ihwa aboŋo, ¹² Itabuhok adi iye isi ihwa ayyoni Bwo fe iloitoni adi isi ihwa agamis Ati ibeŋ iye iloito bwo aŋasi hoi obeŋi isidi.” ¹³ Obeŋ Hollum ojo jyo obo anjelo jo, “Itoŋoi oŋyatai hoŋ Many ehananiere ni amyorok hoi Ihwa ebalori hejek hoi.” ¹⁴ Haŋai anjelohyen? Arai isi oloyirihyen hul igyamai’to, hul ifahini ilwahyere hya hul ifwotuni adi etalahuna.