¹ To oŋitek hunia nyo alwaji leruhok, iŋuŋunitai omuk hulo Grik jyo hulo Ebrei nyo ojori isi abeŋi obiloŋi hosi ifwotuttai aŋiyo on oremik al ahorye lefahat to oŋitek hwa daŋ. ² Tania ette hulya ’tomon harrihai hul anyai’to lefahat, iloŋuna eruhok daŋ bwo ojori jihosi, Obeŋ osiru jihohoi idehiniere ettiyenio eram Hollum ligyamari ta neram ŋiyo. ³ Tania hotto hulo, onyimuna tehiji hatai aati hattarik hul oyiji bwo ifuti iko Oloyiri bwo olofyoro ligyamari egyama ana. ⁴ Bwo etoŋo adi hohoi ahamojok bwo fe ahettiyanak hiram Hollum. ⁵ Omunoi eruhok daŋ te ekyana ana ette isi nyimuna Setefano, atulo ol obolo neruk honyi bwo fe ifut iko Oloyiri. Bwo fe onyimuni isi Filipo, iko Prokoro, Nikano, Simone, Parmona iko Nikolao olo Antioka. ⁶ Iyaŋunie isi lonyimot hulo ette itilyoronia isi ihosyere lefahat ette isi mojo tesi bwo iyyabani ahas hosi jihosi. ⁷ Tania oboboloruno nekyana Hollum bwo fe olwalwajunie eruhok honyi bebe imiji Yerusalem bwo ofwonni ehumak arryai liniŋyere jyo nelahode. ⁸ Ifut nya Setefano iko namehino bwo nadwaran ette inyi ihanio ellillihita iko etamijanita ihiji wati. ⁹ Tania omuk aati hul ifurani Libertino iko omuk hulo afau Cirene, Alesandria, Silisia, bwo Asia aŋalafai ikonyi. ¹⁰ Ati obeŋi nya isi oremehini itarraŋuna nekyana honyi nyo ikyana inyi to ofyoro iko to oloyiri. ¹¹ Tania odumai isi omuk laati irrosyere inyi jo, Etaniŋu hohoi amoryo honyi Mose iko Hollum. ¹² Tania iloŋojitai aati hutto miji iko amarwak bwo legyorok. Ette inefuna inyi liyaŋuniere inyi ihosyere hewwak hirre. ¹³ Ette isi iloŋuna etamijanak irrositi hinya ojori jo, Odulo atulo olo moryo amaji on odwa’to ana iko efahita huno Mose. ¹⁴ Nyo etaniŋu hohoi ekyana honyi jo, Itattur adi Yesu olo Nasaret amaji ana bwo iloit adi inyi emohiti hunya isyo Mose jihohoi. ¹⁵ Ikikorihini hul iwwahai’to jyo Setefano bwo igonyuni isi omom honyi liyyalarai iko ono anjelo.