¹ Ati ofwonni omuk laati to Yudea ette ittiyenio eruhok jojo, Kuyya ibyaŋata tai ifwotuna aŋoto ihwa ojori emohiti hunya isyo Mose jihohoi, ibyaŋata adi itai iremehina italahuno. ² Itaŋalafye Paulo iko Barnaba isi bebe, tania onyimuni eruhok Paulo iko Barnaba bwo omuk lifwarri Yerusalem jyo lefahat iko eleittaha te eram ana. ³ Tania ninya ifahini aati hutto iklesya isi, allaŋi isi afau Fenisia iko Samaria iramaniere laati aŋai iloiti paganohyen atajya hosi ette isi itamuno laati bebe. ⁴ Ninya lafanyi isi Yerusalem arraŋuni aati hutto klesya isi iko lefahat iko eleittaha ette isi iramana isi erre daŋ hun ihanio Hollum tesi. ⁵ Ati omuk eruhok ejifak Farisei odyotoi ette jaran, oŋida dwo paganohyen ifwotuni aŋoto bwo fe ijifatye nefahita huno Mose. ⁶ Ottubanie lefahat iko amarwak iwwahari eram ana. ⁷ Iwwahai isi fur ette Petro dyoto ette jaran jihosi, Illarak hoŋ, imijana tai jo onyimu nya Hollum ani tehiji hatai jo oŋida paganohyen itaniŋuni asayyo hun oyiji’to to hutuk hoŋ bwo fe heteruhohi. ⁸ Bwo fe Hollum ol omijak’to atajya wati daŋ ette isyo Oloyiri ol Olibo jihosi te etamijani ihwa inya isyaraniere inyi jihohoi. ⁹ Bwo fe obeŋ alufaji ihiji hosi ikohoi ati italibo inyi atajya hosi ta neruk. ¹⁰ Ihwania, nyo igigiloti tai ikemyere Hollum iryataniere eyeni imutto heyiyanak en ebeŋ hohoi eremik dihuna iko hohonyok hohoi? ¹¹ Ati eruk hohoi jo etalahuno hohoi ihwa isi ta amehino ono Yesu Hobu. ¹² Attati eluluŋ wati dwa liŋ liŋ ette itaniŋyo jyo Barnaba iko Paulo te eramyo hosi etamijanita iko edwariti hunya ihanio Hollum jyo paganohyen tesi. ¹³ Ninya latuhoni isi ekyana ojo Yakobo, Illarak hoŋ, itaniŋyete jihoŋ. ¹⁴ Iramak nya hohoi Simone jo aŋai ottu nya Hollum inyimuniere paganohyen ta afure honyi. ¹⁵ Bwo fe ikiluni nya eyak sayyo eram ana ihwa igyoroni ojori, ¹⁶ “Ihalu acohuno adi ni Bwo fe aduhok adi ni aji ono Davide an akwaharo’to. Enyyak adi ni inyi imaji honyi. ¹⁷ Oŋida aati hul arasai’to ottifyai Hobu Bwo paganohyen daŋ hul iloŋuni ta afure hoŋ. ¹⁸ Ikyana Hobu eram ana bwo itahutak inyi erre huna daŋ many beryen.” ¹⁹ Tania aŋotok ni jihatai jo, helaha hohoi ettigemyo paganohyen hulo hul iloiti’to atajya hosi ajyo Hollum. ²⁰ Ati ijara hohoi egyorok jihosi awaraga jo oŋida isi ihari erre huno ajohin iko huno arrijorihyen hosi bwo erre somon, bwo fe acaŋi hun obuni bun, bwo fe oŋida isi ihari nooto. ²¹ Nyo many beryen owotyai aati imisihi daŋ ittittoyere efahita huno Mose bwo fe ihenie nya isi to buk honyi esabiti daŋ ihasik imojiti. ²² Ihalu igigiloi lefahat iko amarwak bwo eklesya daŋ jo oyyu dwo inyimuniere aati omuk ifahiniere isi Antioka iko Paulo bwo Barnaba. Onyimuni isi Sila iko Yuda al ifurani Barsaba, arai nya isi eleittaha. ²³ Attati isi ifahina laati iko awaraga on ojo: Hohoi eruhok bwo lefahat iko amarwak efonyo hohoi itai bebe, itai illarak hohoi hul irata’to apaganohyen hutto Antioka, Sirya iko Silisia. ²⁴ Etaniŋu hohoi jo owoni omuk laati hul ofwoi t’ehiji hohoi ette ittigemyo atajya hatai te ettiyenita hosi ati ebeŋ hohoi efak isi. ²⁵ Tania egigilo hohoi dini arabotye inyimuniere omuk laati ifahiniere jihatai iko Paulo bwo Barnaba hul emuno hohoi bebe. ²⁶ Bwo isi laati hul arai aŋerejak bebe te ettittoyo hiram ono Hobu hohoi Yesu Kristo dwadi awahi aati isi ’tohoro. ²⁷ Tania efak hohoi Yuda iko Sila iramaniere itai ta ahwattek hosi erre huna. ²⁸ Nyo itahutak nya Oloyiri ol Olibo hohoi jo oyyu al ebeŋ hohoi ettigemyo itai to omuk efahita agalihini huna hun ogoli’to. ²⁹ Oŋida ibyaŋata tai iŋiyete erre hun ihumarik jyo ajohin kuyya bu nooto iko erre hun obuni bun. Hehaniete bwo fe erre somon. Al ifahati tai efahita huna oyyu adi jihatai. Ogoto daŋ. ³⁰ Attati ifahina isi Antioka bwo ottubanie isi dia iko aati hutte klesya ette isi ihyanana awaraga ania jihosi. ³¹ Ninya itaniŋuni isi, itamuni ekyanita huna isi bebe. ³² Bwo ikyanai Yuda iko Sila ekyanita omuk jihosi itagolyere atajya hosi nyo arai isi aheyak sayyo. ³³ Ihalu omuk oŋitek ifahini eruhok isi icahari ta nelik tajya jyo mottyarak hosi. ³⁴ Ati awak nya Sila itoŋo dia. ³⁵ Ati arasai Paulo iko Barnaba Antioka ittiyeniere nekyana ono Hobu iko laati omuk arryai. ³⁶ Ihalu omuk oŋitek ojo Paulo jyo Barnaba, Waŋ, efwo imijuno illarak hohoi hutto misihi hunya ettiyanak hohoi ekyanita huno Hobu. ³⁷ Ati awak nya Barnaba iyaro Yoane al anya’to Marko ikosi. ³⁸ Ati igigilo Paulo jo obeŋ oyyu iyari inyi nyo obusak nya inyi isi lifau Pamfilia bwo fe ebeŋ nya inyi adaha ikosi ligyamari. ³⁹ Attati isi ŋalafa bebe ette pyaha. Iyaro Barnaba Marko ette fwatan Ciporo ta atogol. ⁴⁰ Bwo Paulo onyimu Sila ette fwatan ta amehino ono Hobu bwo fe omojoi nya illarak hosi tesi. ⁴¹ Attati isi daha ifau Sirya bwo Silisia litagolyere eklesyahyen daŋ.