¹ Owoni nya eyak sayyo iko ettiyanak iklesya otto Antioka, isi: Barnaba iko Simione al ifurani Nigere, Lucia olo Cirene, Saulo iko Nanana egyamani hobu Erode. ² Homojoi isi jyo Hollum bwo fe oferunij ojo Oloyiri ol Olibo jihosi, Aharana Barnaba iko Saulo te egyama an eloŋok ni isi. ³ Tania omojoi isi ette feruna bwo iyyabani ahas hosi jyo Barnaba iko Saulo ette ifahara isi hetefwahi. ⁴ Teyya al ifak Oloyiri ol Olibo isi igyamari, ofwoi isi many Selucia bwo teyya allaŋi isi aari ta atogol many lifau Ciporo. ⁵ Ninya lafanyi isi Salama ittittoye isi ekyana ono Hollum ihasik imojiti huno Yudea. Bwo fe owon Yoane ikosi ahalwahani hosi. ⁶ Latuhi isi adaha imasik daŋ huttotwa ful, afanyi isi jyo amiji Paposa bwo onyurani dia obo addyamani, ebwanani ol orroho olo Yudea afure honyi Bar Yesu. ⁷ Adaha nya inyi iko mandir olo amiji ania, Sergo Paulo, inyi atulo ofyoro. Iloŋo inyi Saulo iko Barnaba litaniŋuniere ekyana ono Hollum. ⁸ Ati Elyama al ara’to ahaddyamani (nyo ara ania awoyo hiram ono afure honyi), itik isi, bwo fe okemyo inyi itihoniere mandir addi to hiruk jyo Yesu. ⁹ Ati Saulo al ifurani bwo fe Paulo, ifut inyi iko Oloyiri ol Olibo ette ikikorihina jyo addyamani, ¹⁰ ette jaran, Iye lonyi Sitan bwo ira iye amyotononi olo alibori, ifut iye iko enyobyo bwo arrohoji. Ibeŋ adi iye idehi eloico nelahode ono Hobu agesemi? ¹¹ Ihwania imijye, ottirok adi Hollum aani honyi jihoi bwo iŋodo adi iye ette bwo fe ibeŋ adi iye igonyu oloŋ to omuk oŋitek. Teyya kwak ette neriri iko nedumele imuluhana noŋite honyi ette inyi ’tifya obo irihotyere inyi ta aani. ¹² Tania al igonyu mandir anyo idwoŋ jihonyi iruk inyi bwo illilliha jyo ettiyenio ono Hobu. ¹³ Ihalu ofwoi Paulo iko aati hul owoni’to ikonyi ta ababur many Paposa bwo afanyi isi imiji Perga ifau Pamfilia. Attati Yoane busaro isi ette caharo Yerusalem. ¹⁴ Ati allaŋi isi Perga bwo afanyi imiji Antioka obo, ifau Pisidia. Bwo fe ta sabatok ojiŋani isi ihaji imojit ette itoŋo dia. ¹⁵ Ihalu iheni eleittaha to buk ono efahita iko eyak sayyo ojori isi jihosi, Illarak hohoi, kuyya al owoni omuk ekyanita hun iwahata tai ikyana jyo laati, ikyanati. ¹⁶ Odyoto Paulo ette kaf aani honyi ahide otte jaran jihosi: Aati hulo Israele ikatai hul ebaŋata’to Hollum, itaniŋyete. ¹⁷ Onyimu nya Hollum olo aati Israele hohonyok hohoi bwo itaboloru isi ta aŋasi hun itoŋorik isi ifau Masir bwo fe ta aani honyi orihu nya inyi isi addi jyo afau ania. ¹⁸ Ta aŋasi atomwana aŋwan odik inyi isi to mur. ¹⁹ Bwo fe itattur nya inyi awoi hattarik hutta fau Kanana ette isyo jyo laati honyi amanyai dia ta aŋasi esiha aŋwan iko atomwana miet. ²⁰ Lihalu isyo inyi aŋotok hirre many arari Samwele aheyani sayyo. ²¹ Attati isi ifiyo Hollum to obo hobu bwo isyo Hollum jihosi Saulo lonyi Kisi otto woyo ba Benjamino. Ilohobwori nya inyi isi aŋasi atomwana aŋwan. ²² Ninya latuhuno jihonyi isyo Hollum Davide jihosi irari ahobu hosi. Bwo fe ojo Hollum, “Lanyurak ni Davide lonyi Yese, inyi atulo al itamunoyo’to ataji hoŋ bwo ihanio inyi awahan hoŋ.” ²³ To woyo ba Davide isyo Hollum jyo Israele Etalahani, inyi Yesu ihwa ocorok nya inyi. ²⁴ Ninya hobeŋ Yesu ottu, ittittoyo nya Yoane jyo aati Israele ojo, Iloitoto atajya hatai t’eyyata ittata adi itai ifwotuna batisimo. ²⁵ Bwo ninya ilyaha naye ono Yoane ojo inyi, Igigiloti tai jo ani ŋai? Obyaŋara ani lya; ati inyi lya ol ohottu tehalu hoŋ, ati abeŋ ni asiru houna amuha honyi. ²⁶ Illarak hoŋ, onyirok Abramo, bwo fe itai hul ibaŋata’to Hollum, iramani jihohoi asayyo huna huno etalahuna. ²⁷ Nyo aati hul amanyai’to Yerusalem iko eleittaha hosi obeŋi nya isi omijani Yesu bwo fe obeŋi nya isi itaniŋuni ekyanita huno eyak sayyo ninya lihenuni isi to oloŋ sabato. Ette isi ŋotonia aye jihonyi itasiruniere egyerita. ²⁸ Obeŋi isi onyurani obo epali jihonyi on osiru iyeri, ati isyori isi inyi jyo Pilato ittohori. ²⁹ Ninya lihanie isi erre daŋ hunya igyoroni tenyi, odutuni isi inyi to kruce ette itaferehina ilume. ³⁰ Ati itubuhu Hollum inyi to ye. ³¹ Bwo to omuk oŋitek arryai italeyehi nya inyi ahwan honyi jyo hinya ofwonni’to ikonyi to Galilea many Yerusalem. Bwo arai isi ihwania ahetamijanak honyi. ³² Tania eyak hohoi itai asayyo hun oyiji hunya ocorok Hollum jyo hohonyok hohoi. ³³ Itasiru inyi asayyo hunia jihohoi lonyirok hosi te etubuhuna honyi Yesu. Ihwa igyoroni jyo Afure ono Davide etarrihi jo, “Iye lonyi hoŋ, Ahana attu ni rahan amonyohoi.” ³⁴ Bwo fe te ekiluna jo itubuhu adi inyi Yesu to ye bwo fe obeŋ ahwan honyi omuyak ojo inyi, “Esyo adi ni jihoi emuniti hun olibori Hunya acorok ni jyo Davide.” ³⁵ Ojo inyi bwo fe jyo obo amaji, “Ibeŋ iye iŋatak ahwan ono alya ol olibo’to omuyak.” ³⁶ Nyo igyama nya Davide jyo Hollum ihiji wati, ette ye bwo onuhani nya inyi iko hohonyok honyi ette nahwan honyi muyahi. ³⁷ Ati lya al itubuhu Hollum, obeŋ ahwan honyi omuyak. ³⁸ Illarak hoŋ, oŋida imijana tai jo ara ta atulo olo al efwonni hohoi ittittoyere abusana ono eyyata jihatai. ³⁹ Bwo fe aati daŋ hul iyihini’to jihonyi ohohini adi isi to hirre hun obeŋi efahita huno Mose oremehini hohina. ⁴⁰ Ihumata mijo ŋadi erre idwoŋi jihatai ihwa hunya ikyanarik eyak sayyo ojo, ⁴¹ “Imijyete, itai hul imyanati’to, illillihati ittata ye. Nyo ehanio ni ihwania obo nehani lilahaji hatai Ittata tai byaŋan iruhoto Dwadi iramak obo itai.” ⁴² Hojiŋuni Paulo iko Barnaba ilet ihwania bwo omuk aati arryai ette idwoŋ jihosi hul omojoi jihosi jo oŋida inyyahi isi ikyana erre hunia to sabato on ottu’to. ⁴³ Ofwoi aati ilet to haji imojit, aati Yudea arryai iko hul iruhi’to ettiyenio ono Yudea, ijifarai Paulo iko Barnaba, ette isi isiŋyo laati ojori, Adahati te ekoi ono amehino ono Hollum. ⁴⁴ Sabato on ottu’to ottubarai aati hutto miji daŋ itaniŋuniere ekyana Hollum. ⁴⁵ Ati al igonyuni Yudea eluluŋ wati, ahaini isi bebe ette itaŋalafyo Paulo ette moryo inyi. ⁴⁶ Ati ikyanai Paulo iko Barnaba te eŋere ojori, Osiru dwo jihohoi ekyana nekyana ono Hollum jihatai ahosyere. Ati te ehara hatai itahutana tai jo ibyaŋata tai isiruna ifwotuniere nesu on osyo fur. Tania imijyete, eyitoro hohoi ihwania jyo paganohyen. ⁴⁷ Nyo ifak Hobu hohoi ojo, “Efak ni itai irari afaŋan jyo paganohyen Bwo fe ahetamijanak hulo etalahuna iŋaco daŋ hutta fau.” ⁴⁸ Ninya litaniŋuni paganohyen ana omunoi isi ette itahabuyo ekyana ono Hollum bwo fe hul onyimu nya Hollum ifwotuniere nesu on osyo fur, iruhi. ⁴⁹ Teyya isarrahi nekyana ono Hobu imasik daŋ. ⁵⁰ Ati itamorye Yudea omuk aŋorwo abarak hun iruhi jyo Hollum iko aati eleittaha miji ette isi fwanna itigemyo Paulo iko Barnaba bwo iturwatari isi addi to misik hosi. ⁵¹ Ati teyya iddiddeŋuni isi attuduha to hejek hosi hetera etamijani jihosi ette fwatan imiji Ikonio. ⁵² Teyya ifuti nya leyiyanak iko namuno on obolo iko Oloyiri ol Olibo.