¹ Tiofilo, jyo abuk hoŋ etabotye legyorok ni ehanita huno Yesu daŋ iko ettiyenita honyi many t’etteri, ² many jyo noloŋ ninya akafarik inyi lidou, bwo inyi latuhok esyarana ifahita to Oloyiri ol Olibo jyo lefahatb honyi hinya onyimu inyi. ³ Bwo fe ihalu ittigemita honyi, italeyehi nya inyi ahwan honyi al isu jihosi te etamijanita arryai, to oŋitek atomwana aŋwan bwo iramyo inyi erre huno olobye Hollum. ⁴ Ati to obo oloŋ, ninya hetoŋoi inyi ikosi, ittittoyo inyi isi ojo, Hefwatta addi to Yerusalem, ati itilati ecorit ono Monyoŋ. Ojo inyi, Inyi ana ecorit inya itaniŋuna tai jihoŋ. ⁵ Nyo ahode batisimo ono Yoane ara ta aari ati ihalu omuk oŋitek kai ibatisye adi itai to Oloyiri ol Olibo. ⁶ Ninya lattubanie isi ifiye isi inyi ojori, Hobu, ilo attadi iye ihwania inyyahina nolobye jyo Israele? ⁷ Ojo inyi jihosi, Ibyaŋata tai iremehina mijana asahyen iko noŋitek hun oŋotok Monyoŋ ta awahan honyi. ⁸ Ati ifwotuna adi itai adwaran al attu Oloyiri ol Olibo jihatai bwo fe irata adi itai ahetamijanak hoŋ limiji Yerusalem bwo Yudea iko Samaria bwo fe ifauhyen hun omuk daŋ. ⁹ Ninya latuhok inyi nekyanita huna bwo isi harasai yadari jihonyi igonyuni isi inyi lakafi ahide, bwo fe nedis ette raŋuna inyi ette inyi litohina to hoŋite hosi. ¹⁰ Ati hekikorihini isi lidou ta aleten honyi, kwak teyya igonyuni isi lomuk laati arrihai awotyai iger hosi iko aboŋojin hun obwori. ¹¹ Ojori isi, Itai, hulo Galilea hulo. Nanyo en ibonnatyati tai ette yadari ahide idou? Yesu lodwo al akafarai jihatai ahide idou, ocohuno adi orrijo ihwa an akafarik inyi ania idou. ¹² Teyya, acaharai isi Yerusalem to doŋe an ifurani Oliveto an ilyaha’to imiji Yerusalem. ¹³ Ninya lajiŋani isi lihaji ette isi icul ittugul on owon’to ihide haji on ottubatyerek isi toloŋi; arai nya isi: Petro, Yoanne, Yakobo, Andrea, Filipo, Tomaso, Bartolemeo, Matteyo, Yakobo lonyi Alufayo, bwo fe Simone Selotc iko Yuda lonyi Yakobo. ¹⁴ Owoni nya isi daŋ iko egigilo hosi abotye bwo odulori isi amojo arabotye iko aŋorwo bwo Maria honye Yesu, iko illarak honyi. ¹⁵ To oŋitek hwa owotya Petro ihiji illarak honyi ikyanari. Owon nya neluluŋ wati hul arai esiha abotye iko atomwana arrihai. ¹⁶ Ojo Petro jihosi, Illarak hoŋ, oŋida itasiruni egyerita hunya igyoroni hun ikyana Oloyiri ol Olibo to hutuk Davide te eram ono Yuda latadihoni heniafak Yesu. ¹⁷ Nyo ara nya inyi aholohoi bwo aharani nya inyi ligyamari ikohoi. ¹⁸ Inyyaŋu nya Yuda amana te edumiti hunya itinyyaŋaniere inyi Etalahani ette inyi kwaharo dia ette fodoho tehiji ette amonyit honyi idwoŋ. ¹⁹ Tania omijani aati Yerusalem daŋ ette ifurana amana ana te ekyana hosi ojo, Akedama on ojo, amana ewot hoto. ²⁰ 20 Ati igyoroni ibuk ono afureta huno Davide ojo, “Hetera amaji ana amura Bwo fe hetelaha tulo amanya dia.” Igyoroni bwo fe, “Ijara obo hotorutak egyama honyi.” ²¹ Osiru dwo obo orutak amaji nya irari ahetamijanani ikohoi ono nebuhuna Yesu. ²² Oŋida inyi ara olo hulo hunya ewon’to ikohoi ta asahyen daŋ hunya edahatyere hohoi iko Hobu Yesu many ibatisyere Yoane inyi many acahari inyi idou. ²³ Ojo teyya ette isi nyimuna aati arrihai, Mattia bwo Yosefo al ifurani Barsaba, bwo afure honyi abotye anya Justo. ²⁴ Tania omojoi isi ojori, Monye, ihwo imijak bwo iye atajya wati daŋ, itahutak alali oŋida hohoi enyimu jyo aati hulo arrihai hulo irari alefahata ikohoi, ²⁵ oŋida orutak amaji inya onyimoni jyo Yuda igyamari, nyo lalo Yuda addi, imaji honyi. ²⁶ Tania ikilai isi ette ikiluna Mattia ette inosonia inyi iluluŋ ono lefahat hulo ’tomon habotye.