¹ Ani amarwani klesya, egyoro ni jyo motte hoŋ Gayo, al amuno ni ta nelahode. ² Illaŋ al amuno ni, amojo ni jo oŋida ayiji daŋ odulo jihoi bwo fe oŋida ahwan hoi itoŋo on oyyu ihwa itoŋo oloyiri hoi on oyyu. ³ Amuno ni bebe to ninya ofwonnierek illarak iramaniere jihoŋ jo owon nelahode jihoi bwo fe idaha iye ilahode. ⁴ Obolo namuno hoŋ bebe agalik al etaniŋu ni jo adahai aduri hoŋ ilahode. ⁵ Illaŋ al amuno ni, igyama iye egyama on oyyu al ilwak iye eruhok iko atamonok. ⁶ Arai isi ahetamijanak ono amuno hoi ihosyere klesya. Ihanio adi iye on oyyu al ilwak iye isi ta ewatara hosi bwo olwaha isi on oyyu itamunoyere Hollum. ⁷ Ofwoi isi te eram ono afure Yesu bwo fe obeŋi isi ifwotuni omuk erre jyo paganohyen. ⁸ Tania oŋida hohoi elwak laati ihwa hulo jo oŋida hohoi era ahegyamak ikosi ta nelahode. Ehara Doturefe Ekyanita Hohoi ⁹ Egyoro nya ni jyo eklesya ati iha Doturefe ekyanita hohoi nyo awak inyi itoŋo eleittok hosi. ¹⁰ Tania al attu ni etaleyehi adi ni ehanita honyi hun ihanio inyi jo omwaŋa inyi hohoi on orroho. Obyaŋara ania hama ati iha inyi arraŋuna illarak bwo itik hulya hul awahi’to ’raŋuna illarak ette fuhara isi addi to klesya. ¹¹ Illaŋ al amuno ni, hejifatyo etamijani on orroho’to, ati ijifatye etamijani on oyyu. Lya ol odulo’to ihaniere on oyyu ara inyi olo Hollum. Lya ol odulo’to ihaniere on orroho obeŋ bu inyi igonyu Hollum. ¹² Arai laati daŋ ahetamijanak ono ayijon Dimitoro bwo ara nelahode etamijani honyi. Era hohoi bwo fe ahetamijanak honyi bwo imijak iye ara etamijani hohoi ahode. ¹³ Awak dwo ni igyoro erre arryai jihoi ati abeŋ ni awak igyoro isi ta aari galam iko ta agalam. ¹⁴ Eyihi ni jo attu adi ni jihoi ihalu kai bwo fe ekyana adi hohoi to omomite. ¹⁵ Ijara nelik taji hatawana jihoi. Itifonyai iye mottyarak. Itifonyak mottyarak daŋ ababo.