¹ Ani Simone Petro apit iko efahata olo Yesu Kristo, egyoro ni jyo hulya hul enyurak’to ikohoi neruk on oyyu ta abisan ono Hollum hohoi iko Etalahani Yesu Kristo. ² Ijara amehino iko nelik tajya ofonihino jihatai ta amijana ono Hollum iko Yesu Hobu hohoi. ³ Nyo ara ta adwaran ono Hollum an isyaraniere inyi jihohoi erre daŋ hun olwahye’to hohoi ta nesu ana iko te etamunoyo Hollum. Isyo inyi erre huna jihohoi ta amijana hohoi inyi linya iloŋu’to hohoi ta akwatan honyi iko ta ayiji honyi. ⁴ Tania isyo inyi jihohoi ecoriti honyi hun obolori bwo fe oyiji agalihini daŋ, ette hohoi remehina ifwotuna Oloyiri olo Hollum tesi nyo eris hohoi t’eyyata iko ewahiti hun orrohoji’to huno afau. ⁵ Tania okyamata bebe ifonihiniere nayiji jyo neruk hatai, bwo jyo nayiji ofonihina amijana hirre, ⁶ bwo jyo amijana hirre ofonihina errirrya hwan, bwo jyo nerrirrya hwan ofonihina adihan taji, bwo jyo adihan taji ofonihina amijana Hollum, ⁷ bwo jyo amijana Hollum ofonihina amehino jyo illarak hatai, bwo jyo amehino jyo illarak hatai ofonihina amuno jyo laati daŋ. ⁸ Kuyya obolori ehanita hunia jihatai bwo osyarai, ibyaŋata adi itai iboyojoto bwo fe iŋijuna adi itai aŋer ta amijana ono Yesu Kristo Hobu hohoi. ⁹ Nyo lya ol obeŋ’to owon iko erre hunia oŋodo inyi, nyo igonyu inyi erre hutteger honyi hama bwo ogworo inyi ellillayo ono eyyata honyi hunya beryen. ¹⁰ Tania illarak hoŋ, okyamata bebe itagolyere neloŋuna hatai iko anyimuna hatai, nyo kuyya ihaniete tai erre hunia ibyaŋata adi itai ikwahati ’tuŋ. ¹¹ Bwo fe isyori adi jihatai ijiŋaniere ta namuno ilobye on obeŋ iko esidi. Ara inyi olobye ono Hobu hohoi Yesu Kristo Etalahani. ¹² Tania adulo adi ni itagiluta itai te erre hunia dwadi imijana tai isi bwo fe igolihina ilahode on owon’to itwajin hatai. ¹³ Al harasa ni itoŋo ta ahwan hoŋ egigilo ni jo oyyu jihoŋ itagilutari itai erre huna, ¹⁴ nyo amijak ni jo ilyaha naye hoŋ ihwa itahutak nya Hobu hohoi Yesu Kristo jihoŋ. ¹⁵ Bwo ehum adi ni itagiluta itai jo oŋida itai igotyete erre hunia ta asahyen daŋ ihalu ye hoŋ. ¹⁶ Ninya eramaniere hohoi jihatai adwaran iko attuna ono Hobu hohoi Yesu Kristo, ebeŋ nya hohoi ejifatyo eyabita hun inyobye’to, ati egonyu nya hohoi akwatan honyi to oŋite hohoi. ¹⁷ Nyo ifwotu nya inyi etahabuyo iko akwatan ono Hollum Monye hohoi ninya itaniŋuniere inyi nekyana ono Adwarani olo akwatan al ojo inyi, “Lonyi hoŋ olo, al amuno ni bebe.” ¹⁸ Etaniŋu nya hohoi ta ahwattek hohoi nekyana ania t’edou ninya ewanari hohoi ikonyi ihide doŋe on odwa’to. ¹⁹ Tania itasiruni nekyanita huno eyak sayyo jihohoi bwo oŋida itai ihumata itayiryo many afaŋari amotye bwo idwoŋori elelyef otto taŋatyo motye itajya hatai ihwa allomo on owulo’to idumele. ²⁰ Ati omijana ana jo, obeŋ obo atulo oremik ittiyenio nekyanita hutto buk Hollum ihwa awak inyi. ²¹ Nyo obeŋ nya obo ekiluna ottu ta awahan ono atulo ati ikyanai laati Hollum ihwa iramak Oloyiri ol Olibo isi ikyanari.