¹ Ani Paulo efahata olo Yesu Kristo ta awahan ono Hollum, bwo fe Timoteo illa hohoi. Egyoro hohoi jyo eklesya ono Hollum otto miji Korinto, iko jyo aati Hollum daŋ hun owoni ifau Akaya. ² Ijara amehino hatawana jihatai iko nelik taji on ottu’to jyo Hollum Monye hohoi iko jyo Hobu Yesu Kristo. ³ Ijara etahabuyo hatawana jyo Hollum inyi Monye Hobu hohoi Yesu Kristo, nyo inyi Monye olo amehino bwo Hollum etilihani daŋ. ⁴ Nyo itilihyo inyi hohoi te ettigemita hohoi daŋ, jo oŋida hohoi eremik itilihyo hya hul owoni’to iko ettigemita te etilihyo inya itilihyere Hollum hohoi. ⁵ Nyo ihwa ifuti ettigemita huno Kristo jihohoi, tania imyatani bwo fe jihohoi etilihyo ono Kristo. ⁶ Kuyya awon ni iko ettigemita arai isi te etilihyo hatai iko etalahuna hatai. Kuyya awon ni iko etilihyo ara inyi te etilihyo hatai al idihuna tai ettigemita ihwa adihu ni. ⁷ Bwo eyihi ni ahode tetai nyo amijak ni jo al inyurana tai ettigemita ikoŋ inyurana adi bwo fe itai etilihyo ikoŋ. ⁸ Illarak hoŋ, awak ni itai imijana jo anyurak ni ettigemyo on obolo ifau Asia, nyo ejiriŋa nya ni bebe agalik, bwo egigilo ni jo kuyya aye adi ni. ⁹ Ahode egigilo ni jo owon aŋoco ono naye jihoŋ jo oŋida ani abeŋ eyihi jyo ahwan hoŋ, ati jyo Hollum ol oremik’to itubuhuna ayak. ¹⁰ Italahu nya inyi ani to ye on orroho’to bwo italahu adi inyi ani. Eyihi fe ni jihonyi jo italahuta adi inyi ani gagaga. ¹¹ al imojoti tai toni. Bwo fe isyori adi aati arryai ahumo ta alwahyo on olwahyere Hollum ani. ¹² Nyo ara ana etahuyo hoŋ, jo amijak ni ta ataji hoŋ jo adaha nya ni ta alibori taji iko ta abyaŋan inyobyo ihosyere wati hutta fau bwo fe ihosyere hatai agalik. Obyaŋara to ofyoro huno afau ati ta amehino ono Hollum. ¹³ Nyo egyoro ni jihatai erre hun iremehina tai ihenio bwo fe itaniŋuna. ¹⁴ Ihwa imijana tai erre huna kai, eyihi ni jo imijana adi itai erre daŋ ihalu. Tania iremehina tai itahuyo toni bwo ni tetai iholoŋ ono Hobu hohoi Yesu. ¹⁵ Nyo eyihi nya ni te eram ania, awak nya ni ’tuna jihatai ahosyere, jo oŋida iremehina tai inyyak muno. ¹⁶ Tania al agalaro ni itai alo ni Masedonia bwo fe al acohuno ni teyya attu adi ni inyyak mijaro itai, bwo iniamana adi itai ani al alo ni Yudea. ¹⁷ Al eloit ni egigilo hoŋ, arai ekyanita hoŋ ihwa oloyami asai? Ariŋ an awak ni ihanio, ehanio ni ihwa atulo olo afau? Nyo ojo inyi, Afe ehanio adi ni, ati obeŋ inyi ihanio. ¹⁸ Ati ihwa obeŋ Hollum iloit ekyanita honyi, obeŋi bwo fe ekyanita hoŋ jihatai iloitoi ojo, Afe, bwo fe ihalu ojo, Obeŋ. ¹⁹ Ettiyenio hohoi jihatai Lonyi Hollum Yesu Kristo, hohoi iko Silivano ojo Timoteo. Obeŋ Yesu iloit ekyanita honyi ojo Afe bwo fe ihalu ojo Obeŋ, ati ihanio inyi ihwa ikyana inyi. ²⁰ Nyo to Kristo itasiruni ecoriti huno Hollum daŋ tania etahabuyo hohoi Hollum. ²¹ Ati itagol Hollum hohoi ikatai inosoniere iko Kristo, bwo onyimu inyi hohoi. ²² Oridinyak inyi hohoi bwo isyo jihohoi Oloyiri ihwa etamijani jo era hohoi awati honyi. ²³ Ati eloŋo ni Hollum irari etamijani olo ataji hoŋ jo ara ta amehino hoŋ jihatai an abyaŋari nya ni alari jihatai Korinto. ²⁴ Obyaŋara jo awak ni ilettohori neruk hatai nyo ogol neruk hatai ihwania, ati egyama ni ikatai ilwahyere namuno hatai.