¹ Ijara apiti daŋ itahabuye eleittaha hosi, jo oŋida obeŋi laati omorye afure Hollum iko nettiyenita honyi. ² Bwo hya hul owoni iko eleittaha eruhok, helahahi isi omyanai isi nyo arai isi illarak hosi. Ati ijara isi igyamai on oyyu, nyo eleittaha hul igyamarik isi arai aheruhok bwo omuno Hollum isi. Ittiyenie bwo isiŋye laati ihaniere erre huna. ³ Kuyya ittiyenio obo atulo nettiyenita hun olufaji bwo obeŋ inyi iruk nekyanita huno Hobu hohoi Yesu Kristo iko nettiyenita huno amijana Hollum, ⁴ itadara inyi bwo obeŋ inyi omijak omuk erre. Ifiyo inyi erre asai asai bwo aŋalafa inyi te ettiyenita. Iyaŋunie erre huna ahaini, ajore, amoro, iko egigilo hirre hun orrohoji’to. ⁵ Itarisai isi iko laati hul orrohoji egigilita hosi bwo obeŋi omijani nelahode. Igigiloi isi jo eremik isi nyurana ebariti ta amijana Hollum. ⁶ Ati amijana Hollum arabotye iko anyalami iyaŋuno ebariti huno ataji. ⁷ Nyo efwonni nya hohoi jyo afau ana ahania bwo fe ebeŋ adi hohoi eyaro omuk erre jyo afau ana addi. ⁸ Ati al ewon hohoi iko aŋiyo bwo aboŋojin etoŋo adi hohoi te elik tajya. ⁹ Ati hya hul ottifyai ebariti okwahinie adi isusuyo iko ilofidik iko ewahiti huno ahwan hun orrohoji’to, iko hun arai’to asai bwo orihoroi adi erre huna isi liye ono ahwan iko ono oloyiri. ¹⁰ Nyo ara amuno gurusi etteri ono arrohojita daŋ. Nyo awahi omuk laati agurusi bebe tania ipali isi addi to hiruk bwo itihanyi isi atajya hosi te ejiriŋita arryai. ¹¹ Ati iye atulo olo Hollum, ofuhoi addi jyo nerre huna daŋ, bwo ijifatye alibori iko amijana Hollum, neruk, namuno, adihan ettigemita, bwo anyalami. ¹² Orryemonie arrem on oyyu ono neruk, inefatye nesu on osyo fur ninya iloŋorik iye. Inyi neruk inya iwwaha iye ta newwaha on oyyu ihosyere hetamijanak arryai. ¹³ Eramak ni iye ihosyere Hollum al isyo’to nesu jyo nerre daŋ, iko Yesu Kristo al iwwaha newwaha on oyyu ihosyere Pontio Pilato, ¹⁴ ifahai nefahita jo oŋida obeŋ eboti iko amoro itarrohoji ettiyenita many jyo oloŋ on oleyere Hobu hohoi Yesu Kristo. ¹⁵ Italeyehi adi Hollum oloŋ ania alla attuba asaa nyia; Hollum oloyijo, Elettok alla agalik 'to 'daŋ, Oobu olo obuok. ¹⁶ Inyi hama ol obeŋ’to oye. Itoŋo inyi ifaŋan on obeŋ tulo oremik hutonia dia. Obeŋ nya tulo igonyu Hollum bwo obeŋ obo oremik igonyuna inyi. Ijara etahabuyo iko adwaran on osyo fur hatawana jihonyi. Amen. ¹⁷ Iramak abarak hul owoni’to iko ebariti huno afau ana jo oŋida isi obeŋi itadarai kuyya iyihini jyo ebariti hun otuhunie’to, ati oŋida isi iyihini jyo Hollum al isyo’to jihohoi erre daŋ itamunoyere hohoi. ¹⁸ Iramak isi ihanie on oyyu. Oŋida dwo isi abarai te ehanita hun oyiji bwo fe olwahye laati omuk ta aharana erre hosi jyo laati. ¹⁹ Te ehanita hunia ottunani adi isi ebariti idou jo oŋida isi inefatye nesu an ara’to ahode. ²⁰ Ahode Timoteo, irrirryai erre hun isyori jihoi. Oyitoi addi jyo ekyanita hun arai’to asai iko olofyoro hun obeŋi’to arai ahode. ²¹ Iruhi omuk laati erre huna tania ipali isi addi to hiruk. Ijara amehino hatawana jihoi.