¹ Bwo ojo Oloyiri, te esidi fau ipali adi omuk jyo neruk addi, nyo itaniŋye isi abwana hun inyobye’to iko ettiyenita johin. ² Inyobye adi agesemok isi, nyo omohini atajya gesemok hya ta agesemita hosi. ³ Ojori isi oŋida laati obeŋi oyamai, bwo hotobyaŋahi oŋiye aŋiyo hun isyo Hollum jyo eruhok hul omijani nelahode ifwotuniere ta ahumo. ⁴ Nyo oyiji aŋiyo daŋ hun isyo Hollum, bwo oremehini laati ŋiyo daŋ kuyya ifwotuni isi ta ahumo. ⁵ Nyo italibori aŋiyo daŋ te ekyana Hollum iko ta amojo. ⁶ Al ittiyenio iye erre huna jyo illarak, ira adi iye ahegyamani ol oyyu olo Yesu Kristo, nyo ibolororo iye ta nekyanita huno neruk, iko ta nettiyenita hun oyiji hun ijifatyo iye. ⁷ Ati ihai eyabita hun orrohoji’to iko hunya beryen. Ittiyenie ahwan hoi ta amijana Hollum. ⁸ Oyiji ebaliti hwan kai, ati oyyu amijana Hollum te erre daŋ, nyo owon inyi iko ecorit ono nesu on owon’to ihwania bwo ono nesu on ottu’to. ⁹ Arai nekyanita huna ahode bwo oŋida laati daŋ ifwotuni isi. ¹⁰ Te eram ana egyama hohoi bwo fe edihu hohoi ettigemita, nyo eyihi hohoi jyo Hollum leswoni al ara’to Etalahani wati daŋ ati ara inyi Etalahani ahode jyo eruhok. ¹¹ Oduloi ettiyenio bwo iramyo erre huna jyo laati. ¹² Helaha obo atulo omyana iye ta arahan hoi ahito, ati itahutak etamijani jyo eruhok ta nekyana, ta amanya, ta namuno, ta neruk, iko ta alibori. ¹³ Ihuma ihenio abuk Hollum, ittittoye, bwo fe ittiyenie eram honyi many attuniere ni. ¹⁴ Hepwak esyoryo on owon’to itaji hoi, inya isyori jihoi ihwa ikyanarik eleittaha iholoŋ an iyyabanierek isi ahas hosi jihoi. ¹⁵ Ihanie erre hunia on oyyu, ihanie isi ta agolon hoi daŋ, jo oŋida laati daŋ igonyuni aboboloro hoi. ¹⁶ Irrirryai ahwan hoi iko ettiyenio hoi. Oduloi te erre huna, nyo al ihanio iye ana italahu adi iye ahwan hoi iko hul itaniŋye ettiyenita hoi.