¹ Ani Paulo efahata olo Yesu Kristo te efahi ono Hollum Etalahani hohoi iko Yesu Kristo al ara’to neyihina hohoi. ² Egyoro ni jyo Timoteo lonyi hoŋ ahode ta neruk. Ijara amehino bwo namuno iko nelik taji on ottu’to jyo Hollum Monye iko Yesu Kristo Hobu hohoi hatawana jihoi. ³ Ninya alari ni Masedonia elolya ni jihoi irasari Efisa ifahari laati omuk hotobyaŋahi ittiyenie ettiyenita hun olufaji’to. ⁴ Oŋida isi obeŋi itaniŋye eyabita iko erre hohonyok hun obeŋi’to otuhunie nyo iyaŋunie isi aŋalafata asai, obyaŋara neruk jyo eram ono Hollum. ⁵ Ati eram on obolo’to inyi namuno on ottu’to to taji on olibo’to iko egigilo on oyyu’to, bwo neruk on obeŋ’to iko enyobyo. ⁶ Ati ipali omuk laati te erre huna jyo etafudita asai. ⁷ Awahi isi ratan ahettiyanak ifahita huno Mose, ati obeŋi isi omijani nekyanita hun ikyanai isi kuyya erre hun ittiyenie isi. ⁸ Ati emijak hohoi jo oyiji efahita al ittiyenio atulo isi on obis. ⁹ Omijana ana, obeŋi efahita arai ta abisak, ati ta amyosok ifahita iko eharak ifahita, to hya hul obeŋi omijani Hollum iko eyyak, te ebwatak iko amorok fure Hollum, ta attok monyye iko honyye, ta attok wati, ¹⁰ ta asomok, ta afarak, te etinyyaŋak wati, ta agemosok, te ellamak, bwo isyarani efahita jyo laati daŋ hul ihari’to ettiyenita hun oyiji. ¹¹ Enyurak hohoi ettiyenita huna ta asayyo hun oyiji huno akwatan Hollum al itahuye, isi asayyo hunya isyarani jihoŋ. ¹² Humo jyo Yesu Kristo Hobu hohoi al isyo jihoŋ agolon bwo ihenio inyi ani atulo al egyama’to on oyyu ette inyi nyimuna ani ahegyamani. ¹³ Ara nya ni ahamoroni Kristo bwo fe ahettigyamani honyi iko olorroho, ati anyurak ni amehino nyo ehanio nya ni ihwania ta abyaŋan mijana iko ta abyaŋan iruk. ¹⁴ Bwo fe osyaro amehino ono Hobu jihoŋ bebe ta neruk iko namuno on owon’to itwa, Yesu Kristo. ¹⁵ Arai nekyanita huna ahode bwo oŋida laati daŋ ifwotuni isi jo, ottu nya Yesu Kristo ifau italahuniere leyyak, bwo ara ni aheyyani agalik isi daŋ. ¹⁶ Ati te eram ana anyurak ni amehino jo oŋida Yesu Kristo itahutak adihan honyi on obolo’to toni, al ara’to aheyyani agalik isi daŋ. Ara ana etamijani jyo hya hul ofwonni adi iruk jihonyi ihalu, inyuraniere nesu on osyo fur. ¹⁷ Tania ijara etahabuyo iko akwatan hatawana jyo Hobu fur. Inyi Hollum abotye ol osyo’to fur, ol obeŋ’to oye, bwo fe obeŋ oleyo. Amen. ¹⁸ Esyo ni efahi ana jihoi Timoteo lonyi hoŋ, jo oŋida iye irrem arrem on oyyu ihwa ninya ikyanarak eyak sayyo teye. ¹⁹ Iniefatye neruk ta agolon iko ataji on oyyu. Ihari omuk laati esiŋyo ono atajya ette itarroho neruk hosi. ²⁰ Ihiji laati hulo owoni Humenayo iko Alesandro hul esyo ni ihas Sitan ibahyere isi jo oŋida isi omijani jo orroho amoryo Hollum.