¹ Nan Paul mabusoni lo Kristo Yesu ko Timoti rece niyang. Diho Pilimon morte niyang na lohimaru ko katiyoni kaletoni niyang ² diho Appia kanece niyang, diho Arcippas asegereni kaletoni niyang, manyu diho kanisa na lotubitita kalingi. ³ Kisa ko kisiliban na lolotu iyo Lobanga Apa niyang ko Lahitok Yesu Kristo. ⁴ Akwamitita nan Lahitok Lobanga kalabuhunita isi iyo kilifa nei tik tik, ⁵ tonyio aningo nan kiruk nino iyo Lahitok Yesu ko kimaruno nino cio kulo Lobanga fad. ⁶ Alifa nan jimitan ojir isi ingara kiruk nino to kirunga ojir irumu kinianga na ifut lo sangite kuna ijiri pili kuna lohingonore ohoi iyo Kristo. ⁷ Lohicio kimaruno nino nan kwama nahitok ko kitigolo lo tau tonyio itikwe isi taulo kulo cio kulo Lobanga rece. ⁸ Tona kileng ngocam diho nan iyo Kristo to rihohino isi tohi na lojir isi itii, ⁹ ati alelia nan diho isi to kimaruno. Dong nan iya Paul ngoroyoni na manyu jijia lara mabusoni lo Kristo Yesu ¹⁰ alelia nan diho isi to kito nei Onesimas, na lolotu ara kito nitole to katwa lo mabus. ¹¹ Loru afa faida nenge dihosi ati jijia lara inyi lo faida nahitok ida ara dihosi ake ati ko diho nan manyu. ¹² Aculuno nan inyi na lara lo tau nei lo ituno dihosi. ¹³ Orumu nan kidam kitongo ko inyi ene ojir kilwak nan ara faji nino orihe nan angon mabus to kititima layomit na ijir. ¹⁴ Ati ida nan awak kitiyo lobo tohi ida hati isi iruk ojir tohi na litiyo isi owoju to tau nino ida ara na lohifudahini isi ara kifudahino. ¹⁵ Kuya tohi na licio inyi kikorare ko isi orumu ara na lojir oitunore dihosi tur, ¹⁶ ida dong ara opi ati na logal opi ara rece na limaru. Amaru nan inyi bebe ati imaru isi inyi ogal ara katiyoni nino manyu ara rece iyo Lahitok. ¹⁷ Dong kalirima isi nan manyu ideya nan ara katiyoni kaletoni nino, ifotu inyi iya na ngifotunore isi nan. ¹⁸ Kalitii afa inyi lobo tohi irohoi iyosi kode kolongon lobo mongiyo nino lotehita inyi igerohi kwe nei. ¹⁹ Nan Paul to ken lagero ene to kana nei, adum cia nan ida hati nan atenya jimitan ingon isi ko mongiyo lo ken nino token. ²⁰ Akodomo nan rumuno lobo faida iyosi rece iyo Lahitok, itirobia tau nei iyo Kristo. ²¹ To kigeno iyo ningoro nino, agero nan dihosi to yenun jimitan itii cia isi ogal na latenya nan. ²² Ongon manyu Lobito tohi: Ikukumahi kaji lo welo to nan tonyio ageno nan jimitan kinyiahuni cia nan dihote to kilifa ningi. ²³ Epapras mabusoni kaletoni nei to Yesu Kristo kifonyo isi, ²⁴ iya na lofonyore Mark, Aristokas, Demas ko Luka katiyok kaletok kunei. ²⁵ Kisa lo Lahitok niyang Yesu Kristo ongon ko okorif nino.