1
Lotem cio becek kigero tenya lo sangite kuna litiihino kiji niyang,
2
iya na lotenyare cio kulafa lodeu kuno sangite to konyeha many to kiteri ofuonu many iceng ara karwaak kulo tenya ifotunorehin diho ohoi.
3
Iya na langingijunore nan kuno tenyi tenyi many to lohicahi, ocam diho nan kigerohino isi ara na lotub otoc Lahitok Teopilo,
4
ojir iniang fotiri lo tenya lo dede lafa lohitiyenarihin isi.
5
To faritin kulo Erod kabu lo Judea, ongon afa lobo kadwarani lobara Zakaria oreu inyi to agwala lo kadwarani Abia, ngorwani nenge Elisabet manyu ara lo tata lo Aaron.
6
Iceng fad orumu obiri to ketemoni lo Lobanga, oric, manyu ijifita iceng cihicihi kulo Lobanga ko tenyi tenyi kunenge fad to bangun.
7
Ati ida iceng otek tee, tonyio ikorif Elisabet manyu orumu iceng longoroyoni.
8
Tofaritin kude afa litiyore Zakaria ara kadwarani kaji lo Lobanga to gonyo agwala neiceng iya na longonita diho iceng kadwarak.
9
Onyumuni inyi to gumar lo loro kitifurio iheru kaji lo Lobanga.
10
Kologoru tik lo kitifurio iheru, cio kaworak fad orumu ilifati to oleng.
11
Oto malaika lo Lobanga ko boto iyo Zakaria owoita to ngati lo iteten lo ciali na
12
litifuriorihin iheru. Kolodeu Zakaria inyi, oto ko rienya bangun ko kiniefa inyi.
13
Ati ojo malaika diho inyi, “kebang Zakaria loningi kilifa nino. Ngorwani nino Elisabet otomonu ca kito retoni, ojir isi itibarahi Jon”
14
Ara ca inyi kwama ko kwerun lo tau diho isi manyu okwama ca cio becek otomone nenge.
15
Tonyio obolo ca inyi to ketemoni lo Lahitok. Ojir inyi ida omat vino kode lobo imatit litiruma cio manyi ifut mute inyi ko okorif nainyu many to otomone.
16
Iyauno ca inyi becek kulo cio kulo Isirael iyo Lahitok Lobanga neiceng.
17
Manyu olo ca inyi ketemoni lo Lahitok to okorif lo Elia lo kibeluno taulo kulo monyeri kulo tee diho tee kuneiceng ko kafajiarak iyo genyun lo cio kuna ijiri, lo kikukuma cio kuna likukumahino to Lahitok.
18
Itifi Zakaria malaika ojo, “Aja ayen nan jimitan itiihino ca kuno? Tonyio langoroyon nan manyu ngorwani nei loboreng karihin”.
19
Inyahahi malaika inyi ojo, “Nan Gabriel: aweita nan ketemoni lo Lobanga manyu kiculuni nan lo tenya ko isi ko rihohino isi ene layomit ijir.
20
Jija ibuho ca isi ida itenya many far na litiihinore ene tenya, tonyio iberu isi kiruk tenya nitole na mute lolotu ara dede to tik na ibehi.
21
Cio ten itila Zakaria ipanyiti kirungo nenge katwa lo kaji lo Lobanga.
22
Langun lorutu inyi, ida inyi itweru tenya ko iceng. Iceng ko yenun jimitan lodeu inyi kitotorita lobo to kaji lo Lobanga tonyio otenya dong iyo iceng to kac ati ida itweru tenya.
23
Ko lokeru faritin kuna longonyohini kitiyo kaji lo Lobanga, ko loro iya kang.
24
To ifonga ngorwani nenge Elisabet iwasihi kaji to ofahin miet.
25
Ojo inyi litii Lahitok ene diho nan tone, lohitotorohi inyi nan kisisio nenge ko dumaru riri nei tokiji lo cio
26
To ofahin ile, ocule Lobanga malaika Gabriel Nazaret na longon kof lo Galilea,
27
diho kito karioni na lorihe ida loyen retoni na loter lobo lokilahaji lobara Josep na lara lo tata lo David obara nu kito karioni Meri.
28
Olo malaika diho inyi ojo, “Tofonyo isi na lingon ko gum. Onon Lhitok ko isi”.
29
Oto tau lo Meri odou to tenya nenge ipany ko kibuha koditi lo ene fonyo!
30
Ojo malaika diho inyi, “kebang Meri, lirumu isi kisisio diho Lobanga.
31
Ifonga ca isi itomonu kito retoni na lojir itibarihi karana nenge Yesu.
32
Obolo ca inyi manyu ilolongi ca inyi ojo inyi na inyi na longon kai noo. Ico ca Lobanga inyi seger lo fafai nenge David.
33
manyu olanyu ca inyi kaji lo Jacob tur ida ca okabwe nenge icung”.
34
Itifi Meri malaika ojo itiihino ca ene tenya aja ati nan ida lohiyenaru ko retoni?
35
Inyahahi malaika inyi ojo, “olotu ca okorif na imyu diho isi manyu kimuk ca golun nenge lona longon kai noo isi manyu inyi na inyu na litomuno isi ilolongi ca ojo kito lo Lobanga.
36
Kileng ijanyi nino Elisabet otomonu ca kito to ongoroyone, nangole lojimi ikorif ongon jija ko kocehe lo ofahin ile.
37
Tonyio oru lobo tohi lolanyu Lobanga”.
38
Ojo Meri, “Nan karwaani lo Lahitok. Ingohi itiihino diho nan iya na liteny isi”. Tinya, malaika ko ngerihino inyi.
39
To kuna farihin ikukumahino Meri loro lobo kang longon donge lo Judea.
40
Olo inyi orute kaji lo Zakaria ko fonyo Elisabet.
41
Koloning Elisabet fonyo lo Meri ifiri kito to kocehe nenge oto Elisabet ifut ko okorif na inyu.
42
To ogoro na ikwat igore ojo, “Ingon isi ko gum tokiji lo ngorwo, ongon ko gum kito na mute itomonu isi
43
Nyio obolo kwenyi nei ji lo ngoto Lahitok nei waja nan?
44
Nan ningo fonyio nino jii, kito ko kifirita to kocehe nei ko kwama.
45
Ongon ko gum inyi na liruk ojo tohi na locik Lahitok diho inyi, itiihino ca.
46
Oto Meri ojo; Omaja warun nei Lahitok,
47
ko okorif nei ongon ko kwama diho Lobanga alwahani nei.
48
tonyio ibuha inyi to kidak lo karwaani nenge kicaha to jija iya ketemoni kofiang fad kilolongoti ca nan ojo na longon ko gum.
49
Tonyio kagoloni litii sangite kuna ijiri diho nan onyu karana nenge.
50
Ongon kisa iyo cio kuna lobang inyi many to kofiang many kofiang.
51
litii inyi ticitici kuna igoli to kana nenge. Litisara inyi katidarak many to katwa lo kibuhibuhi kuneiceng.
52
Liticulu inyi kalanyunok to segeri ati oting kariejak kai.
53
Litifut inyi kakingak to sangite kuna ijir ati ifuhe kabarak ofwo to ka.
54
Lolwak inyi karwaani nenge Israel igigilo launo iceng
55
diho Abram ko latataha kunenge iya ija iya na lotenyare inyi diho monyeri kuniyan.
56
Itong Meri kolo Elisabet ofahin uni ko iitoro iya kang neiceng.
57
Kolotumohino faritin kulo tomonun lo Elisabet otomonu inyi kito retoni.
58
Oning loriehati ko kajeba kunenge ojo litotorihi Lahitok inyi kisa nenge nahitok ongari kwama ko inyi.
59
Far lo mietauni ofwonuni kitibara kito, owak iceng kitibarahino Zakaria iya monye,
60
ati otenya ngotenge ojo, “Oru owak inyi obara Jon”.
61
Ojimi diho inyi “Oru lobo tungani likajo ko ite lilolongi to na karana.
62
Oto dong otenyi ko kac diho monye, lo kitifia inyi owak inyi kitibara kito ojo ngai.
63
Itifia inyi toi lo kigero oto itipany cio fad, iger ojo “obara karana nenge Jon”.
64
Itifia inyi toi lo kigero oto itipany cio fad, iger ojo “obara karana nenge Jon”.
65
Loriehati fad ko kifut ko bangun manyu kangite kulo donge lo Judaia fad oforo cio na tenya.
66
Cio fad kuna loning ene tenya ibuhati manyu itifiati ojo, “Ara ca mute ene kito nyio? Tonyio ongon kana lo Lobanga ken nenge”.
67
Monye nenge Zakaria ko kifut ko okorif nainyu ko kimoca ojo,
68
“Maja ongon diho Lahitok Lobanga lo Isirael tonyio lolotu inyi manyu lolahu cio kunenge.
69
loting inyi muriak lo lahuno niyang To kaji lo karwaani nenge David.
70
(iya lafa lotenyare inyi to kutuhe kulo kamocak kunenge berien)
71
lwahuno to merok kuniyang ko to kac Kulo cio fad kuna lohiberu ohoi.
72
kitotoro kisa nenge diho monyeri kuniyang ko kibuhuno ciha nenge na inyu,
73
kibutia lafa libutiare inyi diho monye, liyang Abram.
74
lo rujuno ohoi to kac kulo merok kuniyang, manyu kico ohoi kirwaa inyi oru ko bangun
75
iyo nyujon ko biran ketemoni nenge faritin kuniyang fad.
76
Manyu isi kito nei kilolongi ca ojo, kamocani lo na longon kai noo tonyio ilo ca isi ketemoni lo Lahitok
77
lo kikukuma kikoi diho inyi. lo kicwara cio kunenge genyun lo lwaharu to launo lo kipali pali kuneicen.
78
Tonyio to jiran lo kisa lo Lobanga niyang na mute lo lotunore kolong na lotuluno diho ohoi to kai
79
lo kinwaha kuna litongo katwa lo kimuyuk ko katwa lo okorif lo wei lo kitibirahino kejuha kuniyang kikoi lo kisiliban Otomone lo.
80
Manyu obolo kito olotu ogol iyo okorif na inyu. Manyu itongo inyi katwa lo kuny many olotu obotore taranydiho Isirael fad.