¹ Ojo Lahitok diho Moses, ² "Totenya ko cio kulo Israel torihohi icieng tijo; Koloteny lobo tungani lobuti na igol. ³ Lo kifotohino cio diho Lahitok to kicwara wel na itutum, tofik wel to tungani retoni na longon karihin kunenge kiji lo keek are ko keek ile iyo sekeli keek miet kulo rial. Ijifita wel lo sekel na litiyorehin to faji na inyu. ⁴ Ojo kalara tungani ngorwani, ojir ingot wel nenge ara sekeli keek uni kulo rial. ⁵ Kalara tungani na longon kiji lo karihin miet ko karihin keek are tofik wel lo retoni ara sekeli keek are ko lo ngorwani ara sekeli tomon. ⁶ Kalara tungani na longon kiji lo ofa lobito ko karihin miet tofik wel lo retoni ara sekeli miet kulo rial, lo ngorwani ara sekeli uni kulo rial. ⁷ Kalara tungani na lara karihin kunenge keek ile kode logal, tofik wel lo retoni ara sekeli tomon ko miet kulo rial ko lo ngorwani ara sekeli tomon kulo rial. ⁸ Kalideu isi tungani na loteny kikwonga ikilwaha, ida otum duma na wel limohi, o jir inyi iyauno na tungani iyo kadwarani na cia lolotu ongot wel lona tungani iyo wel na lotum na tungani libuti duma. ⁹ Kalara na tohi libuti inyi kicwara Lahitok kiteng, ker kode kine, ibuti inyi kifotohino ara kicorita, olotu na tohi liciori Lahitok ara tohi na inyu. ¹⁰ Ojir ida ojahe inyi kode otob na ijir tona irohoi kode na irohoi tona ijir, kolotob inyi na to lobo oto inyi ko kitobita fad ara kuna inyuji. ¹¹ Kalara na tyang li buti inyi kicwara na lida onyu, na lida otum kiruhiti ara kicorita diho Lahitok - ojir na tyang iyauni diho kadwarani, ¹² na lolotu oher koditi nenge jimitan ojir kode orohoi. Na wel nenge longot kadwarani, itongo cia iya na. ¹³ Kolowak monye kitilaha na tyang ojir osodohini miet lo tomon diho wel nenge. ¹⁴ Kalifotohi tungani kaji nenge ara tohi na inyu diho Lahitok, olotu cia kadwarani oher manyu ongot kire nenge jimitan ojir kode orohoi. Na koditi loteny kadwarani iwasihi cia iya na lotenyare inyi. ¹⁵ Kalitilak tungani na lifotohi kaji nenge na kaji, ojir osodohi miet lo tomon lo wel nenge iyo kitilahita oto cia kaji oitohi ara nenge. ¹⁶ Kalifotohi tungani angati lo kof nenge loluny inyi iyo lohitwaha kunenge diho Lahitok, ojir wel nenge ongoti itutumi na ko borengun lo kinyiemo kuna li ngohini ijia. Kolotum na mana kiyaru okodoho uni kulo osihe ojir wel nenge ara sekeli keek miet kulo rial. ¹⁷ Kalifotohi inyi mana nenge to kari lo Jubili iwasihi wel nenge iya na longotorehin. ¹⁸ Ati Kalifotohi inyi mana nenge langun lorang kari lo Jubili, ongot cia kadwarani wel nenge itutumohi ko wel lo karihin kuna lotong ogorunore iyo nu kari lo Jubili lolotuno oto cia inyiahuni wel nenge iyo na wel longoti. ¹⁹ Kolowak na tungani lifotohi mana kitilaha na mana nenge, ojir osodohi miet lo tomon iyo wel nenge oitohinore mana ara nenge. ²⁰ Ojo kalida inyi itilak na mana, kode kalitilote inyi iyo lobo tungani ake, ida cia orihe otumiti kitilaha. ²¹ Kololahahini na mana iyo kari lo Jubili, olotu cia ara na inyu iya mana na lolungahini iyo Lahitok, olotu cia ara tohi lo kadwarak tur. ²² Kalifotohi tungani kof na linyiangu inyi ida ara kof lolunyot lo imanit, ²³ ongot cia kadwarani wel nenge itutumohi iyo kari lo Jubili manyu ojir na tungani odum na wel nenge la far ara tohi na inyu diho Lahitok. ²⁴ Iyo kari lo Jubili oite cia na kof diho lafa tungani linyiangu inyi diho inyi, tungani lafa lara na kof nenge. ²⁵ Ojir wel fad ongototi ijifita sekel lo faji na inyu na lara sekel lobito gerahin keek are. ²⁶ Oru ha tungani ngifotohi okang lo tyang tonyio ara okangi fad kulo Lahitok kode mongo kode kore kode mongo lo ker, ara lo Lahitok. ²⁷ Kalongon na tyang iyo kuno tyangi likeni ojo ida onyuji, otum inyi kinyaharu inyange iyo wel na longoti, osodohi miet lo tomon iyo wel nenge. Kalida inyi itilak ojir itilotori to wel na longotohini. ²⁸ Ati oru lobo tohi lara lo tungani oto hati ifotohi diho Lahitok, kode tungani kode tyang kode kof lolunyot, lotumiti kitiloto kode kitilaha lobo tohi lolungahini tona kikoi olotu ara na inyu diho Lahitok. ²⁹ Oru lobo tungani lifadaroti lotumiti kitilaha, ojir inyi ifadari. ³⁰ Lobito iyo tomon lo sangite kulo kof fad kode ngamang to manatak kode ngak kulo cianitok ara kulo Lahitok, onyuji icieng diho Lahitok. ³¹ Kalitilaha tungani lobo lobito lo tomon nenge ojir osodohi miet lo tomon iyo wel nenge. ³² Lobito lo tomon lo twol fad; lo kicu, kiri kode kera, kititomoni kulo sang fad kuna lorutunita to fotiri lo iluk lo katibalani, ara cia kuna inyuji diho Lahitok. ³³ Ojir inyi ida onyumu kuna ijiri iyo kuna irohori kode iciak lobo tobo. Kaliciak inyi tobo, oto cia kuna sang ara fad na lifotohini ko kitobita nenge ara kuna inyuji na lida otumiti kitilaha. ³⁴ Ara kuno cihicihi kuna liciorihi Lahitok Moses to kai lo donge lo Sinai to cio kulo Israel.