¹ O joo Lahitok diho Moses, ² To rihohi Aron ko tee kunenge o jir i tiyore kiciorita kuna lohi fotohi cio kulo Israel nan to bangun ko rima, o jir ida iti fiahi karana nei na Inyu. Nan Lahitok. ³ To rihohi icieng i joo, "To kofiang fad kuna lo fwonuno ka lida lobo lotata nino o nyu oto hati o nyihu iyo kicioriti kuna i nyuji kuna li fotohi cio kulo Israel diho Lahitok, o jir na tungani o dumari to ketemoni nei. Nan Lahitok. ⁴ Ko lo ngon lotata lo Aron ko mwai lo ken na li iti diho kode ko iitan lobo to ken nenge, o jir inyi ida o nyia kicioriti kuna i nyuji many iti nyujori inyi. Ara manyu cia inyi tungani na lida o nyu ko lo tir tohi na li iti bot ken lo tungani na i wei, kode na lo tir tungani na li iti bot kijuhuno to kula kulo otomone, ⁵ kode ko lo tir lobo tohi lokudita na li cio inyi ida o nyu kode lobo tungani na li cio inyi ida o nyu, lobo tohi keken li cio inyi ida o nyu. ⁶ Tungani na lo tir kuna sangite i wasihi ida o nyu many kurou, o jir inyi ida o nyia kiciorita na i nyu many ka li lal inyi ken nenge to kifi. ⁷ Ko lo doi kolong o nyu cia inyi, o tum dong inyi daha kicioriti kuna i nyuji tonyio ara icieng daha nenge. ⁸ O jir inyi ida o nyia lobo tohi lo wei ake kode na lo kony tyang na i ngere, i cio inyi ida o nyu to na. Nan Lahitok. ⁹ O jir kadwarak o ric ifahiti kunei o jir ida o cifuni loguce o weiha to kitikaja icieng. Nan Lahitok na lahi iti nyujo icieng. ¹⁰ O ru lobo tungani na lida ara lo kaji lo kadwarani lo tum o nyia kiciorita na i nyu, ida kileng lobo weloni lo kadwarani kode karwaani nenge o tum daha. ¹¹ Ati ka li nyiangu kadwarani opii to robia, kode ko lo tomonohini opii kalenge, o tum na opii daha daha nenge. ¹² Ko lo yem lobo tungani lida ara kadwarani kito karioni lo kadwarani, ida na kito ngorwani o tum o nyia daha na i nyu na lo sofuni. ¹³ Ati ka lara kito lo kadwarani ngorwani lafuserito kode ko lo jahi o ru hati tee o yitu hati inyi ki tongo kolo apa nenge iya lafa li tongore to okarione nenge, o tum inyi o nyia daha lo apa nenge. Ida lobo tungani lida i ruhiti o tum daha na daha. ¹⁴ 4 Ko lo nyia lobo tungani kiciorita na i nyu to kibunyita, o jir inyi o dumahi kadwarani kiciorita manyu o sodohi miet lo tomon iyo wel nenge. ¹⁵ Ke cio kadwarani iti base kiciorita na i nyu na li yaunita cio kulo Israel diho Lahitok ¹⁶ to ki cwara cio o daha to kibunyita, i cio i yauno loguce diho icieng na lo waj kidumi. Nan Lahitok na lahi iti nyujo icieng. ¹⁷ O joo Lahitok diho Moses, ¹⁸ To teny diho Aron ko tee kunenge ko cio kulo Israel fad tijio diho icieng; ' Ko lo lotu lobo to kiji ningi kode Israelani kode misiohoni na lo manya kiji lo Israel i yauno kiciorita ara kiciorita locurat iyo Lahitok kode lo ciha lo kibutia kode ara kiciorita lo kibaya, ¹⁹ o jir i yauno mongo kode mongo lo ker kode kore na lo ru madati, o jir i ruhiti ara faji nino. ²⁰ Ke yauno lobo tohi lo ngon ko madati tonyio ida cia i ruhiti ara faji nino. ²¹ Ka li yauno lobo tungani kiciorita to twol lo kicu kode lo kera kode lo kiri ara kiciorita lo kimoraru iyo Lahitok kode lo kitifuta kibutia kode ara kiciorita lo kibaya, o jir o ru madati kode lofunya o jir i ruhunorihin. ²² Ke fotohi diho Lahitok tohi na i ngodo, na i gila, na i nguto, kode lobo tohi ko lofunya kode ko korongani na iyes kode na loit. Ke fik lobo iyo koditi lo kuno ciali ara kiciorita na li fotohini Lahitok to kima. ²³ To lobo i tum isi ki yauno ara kiciorita lo kibaya mongo lo ker na i ngwal kode na i kaforo ati ida o tumiti kiruhuno ara kiciorita lo kitifuta kibutia. ²⁴ Ke fotohi diho Lahitok tyang na lo gelemori kode o cihi kode i kokonyi terekeke, ke tii ene tohi to kof nino, ²⁵ manyu o jir isi ida i fotu koditi lo na tyang to kana lo misiohoni ito hati i fotohi ara daha lo Lobanga nino. Ida cia i ruhiti ara faji nino tonyio i ngwali icieng manyu o ngoni ko mada. ²⁶ O joo Lahitok diho Moses, ²⁷ "Ko lo tomonuni kace kode kilelo kode kito lo ker, o jir o ngerihini i tong ko ngotenge to faritin mietare. to far lo mietauni o lorore iya ketemoni o tumiti kiruhuno ara kiciorita na li fotohini diho Lahitok to kima. ²⁸ Ke ngot kiteng kode kine kode ker ko kito nenge lobito far. ²⁹ Ka li fotohino isi kiciorita lo kwama diho Lahitok, i fotohi iyo kikoi na ngo tumiti kiruhuno ara faji nino. ³⁰ O jir o nyai la far bito ke ngerihi lobo o get many ko kiwanyi. Nan Lahitok. ³¹ To na iti ric cihicihi kunei manyu i fik tic. Nan Lahitok. ³² Ke iti kaj kode iti bas karana nei na Inyu. O jir ki yeniti nan ara na Inyu to cio kulo Israel. Nan Lahitok na lahi iti nyujo ite ³³ Na manyu lahi yauno ite to kof lo Ijipt lo rahun Lobanga ningi. Nan Lahitok.