¹ Oto Lobanga igatahi Noa ko tee kunenge gum ojo diho icieng, “ititomon ipit itifut kof. ² tyangi kulo mwang ko kweny fad kibangiti cia ko rima ite. Acio nan icieng ko sangite kuna lokudita to kof ko kayam kulo namhatua fad kac kuningi. ³ sangite fad kuna iwari olotita itongo ara daha dihote. Iya na afa lahicorihinore nan isi jatyong kulo mana, ahicio dong jijia sangite fad. ⁴ Ati kenyia tyang ko -okoto to -ken nenge. ⁵ manyu afura cia nan to okoto lo warun ningi. Afura cia nan iyo tyangi fad. Manyu afura cia nan iyo tungani to Lobito to Lobito warun lo tungani kaletoni ⁶ Tungani na lijuhe okoto lo tungani, tungani manyu cia lijuhe okoto nenge tonyio iyo ririoro lo Lobanga oduk Lobanga tungani. ⁷ ititomon, itopit iborengi itifut kof. ⁸ Oto Lobanga ojo diho Noa ko tee kunenge ⁹ “Tode afiha nan ciharu nei kote ko lotataha kuningi kuna mute lohijifita ite ¹⁰ ko sangite kuna iwari fad kulangole lohingoni ko ite; kweny, sang, ko tyangi kulo mwang fad kuna ngole lorutu kote to katua lo tigol, sangite kuna iwari to kof fad. ¹¹ Afik nan ciharu nei kote: ida mute nan akeru warun to kifi isod ari. ida cia mute lobo isod okeru kof ari. ¹² oto Lobanga ojo, “Ara ene kitotorita lo ciharu na lafiha nan kiji nei kote ko sangite kuna iwari longoni kote. Ciharu lo kofiang pili kuna lofwonuno. ¹³ Lafik nan okilok nei iyo idis na cia lara kitotorita lo ciharu nei ko kof. ¹⁴ kalayauno nan idis kai lo kof oto hati okilok ko boto iyo idis, ¹⁵ ayiu cia nan ciharu nei kote ko sangite kuna iwari to koditihin fad, ida mute kifi orihe isod lo keruno warun fad to kof. ¹⁶ Kaloboto okilok iyo idis adeu cia nan ayiu ciharu na isio na longon kiji lo Lobanga ko sangite kuna iwari fad to kof. ¹⁷ Lobanga ko jimitan diho Noa, “Ara ene kitotori lo ciharu na lafik nan kiji nei ko sangite kuna iwari fad to kof.” ¹⁸ Ara tee kulo Noa kulafa loruto to katua lo tigol; Sem, Kam ko Japet. Ara afa Kama pa lo Kanaan ¹⁹ kuno tee kilahaji kulo Noa uni icieng ofwonunore cio kuna lisarihi kof fad. ²⁰ Noa afa karemoni na lofir kitibula vinare ²¹ Langun lomat inyi vino nenge, inyi ko ruma ko geto kema nenge ida imuk ken. ²² Kam monye lo Kanaan kololo odeu kingaturo lo monye oto olo orihohi recera kunu are longoni oleng. ²³ Oto Sem ko Japet odumu kyela itilorohi okokoho kuneicieng ko kingadaru lokorwonge ibirohini kyela imuhi apa neicieng ida icieng odeu kingaturu lo apa neicieng tonyio ibelori komoma kuneicieng iya oleng. ²⁴ Langun lokwenyu Noa to ruma nenge olotu orumu tohi na litii kito nenge la sidi ken nenge ²⁵ oto ojo, “Ificori Kanaan, itongo mute inyi ara opii lo recera kunenge.” ²⁶ Ojo manyu, “Ingohi kwatun tara lo Lahitok Lobanga lo Sem! Icwara Kanaan tara opi lo Sem. ²⁷ Ingohi Lobanga itilalat kof lo Japet, ingohi inyi tomanya kema lo Sem, manyu ingohi Kanaan tar opii lo Japet.” ²⁸ To kifwongi lo kifi isod, omany Noa karihin mia uni ko keek miat. ²⁹ Ara karihin kulo Noa pili mia mietangon ko keek miet oweyarore.