¹ Tona ojo Lobanga iyo Jakob, "Ilo iya Betel manyia ijia manyu toduhohi ciali lo kiciorita ijia iyo Lobanga lafa loboto iyo isi na lifejarore isi to kana lo rece nino Isau. ² Oto Jakob ojo iyo kaji nenge ko cio fad kuna longoni ko inyi, "Ibirete lobangahin misiok kuna litehita ite manyu itinyujoto kenite kuningi manyu ibel kielani. ³ Ito hati ifwonu kifwo iya Betel faji na laloro nan duhohino ciali lo kiciorita diho Lobanga lafa lohinyiahahi nan kilelia nei to faritin kulo kidak nei manyu kingon ko nan fajihit fad kulafa lalot nan.'' ⁴ Icieng ko kicwara Jakob lobangahin misiok kuna lotehita icieng fad ko gelo kulo kiyoha kuneicieng onuhahi Jakob icieng fotiri lo bule na longon Sekem. ⁵ Icieng ko fworo oto lokavikavi lo Lobanga ko urohino iyo cio kulo kangite kuna lirit icieng oru lobo tungani lotiforo icieng. ⁶ Ogoru Jakob ko cio kunenge fad Luz na lara Betel kof lo Kanaan. ⁷ Oto inyi oduhohi ciali lo kiciorita iyo Lobanga ijia, itibarahi ojo El Betel, tonyio ara afa ijia obotore Lobanga diho inyi to na lifeitare inyi rece nenge. ⁸ Tinyia owei Debora karwaani lo Rebeka onuhahini inyi fotiri lo bule na longon oleng to Betel, ilolongi na faji ojo 'Alon Bakus. ⁹ Langun loitu Jakob to Padan Aram, olotu Lobanga oboto diho inyi ari igatahi inyi gum. ¹⁰ Ojo Lobanga diho inyi, "Ibara isi Jakob adi ida cia karana nino orihe ara Jakob, ara cia karana nino Israel." Tona itibarahi inyi ojo Israel. ¹¹ Manyu ojo Lobanga diho inyi, "Nan Lobanga lolanyu fad, topit isodoro borengun. Misi manyu imaniti kulo misihi ofwonu cid to ken nino manyu ongoni mute kabuno iyo lofafaicio kunino. ¹² Ene kof afa lacio nan Abraham ko Isako, ahicio manyu isi. Manyu acio cia nan ene kof diho lofafaicio kunino to omot nino." ¹³ Oto Lobanga ko loro tinyia lotenyare ko inyi. ¹⁴ Icidohi Jakob wiriti lo moru inyia lotenyare Lobanga ko inyi, manyu ijuhohi imatit ko ngoroni kai nenge. ¹⁵ Ilolong Jakob na faji lotenyare inyi ko Lobanga ojo Betel. ¹⁶ Icieng ko fworo to Betel. Orihe icieng olomaha gaa to Eprat, iciak Racel kiboria manyu ogol otomone nenge noo. ¹⁷ Iya na logolore otomone nenge, ojo katitomononi nenge diho inyi, "Kebang, tonyio litomonu isi kito retoni ari ¹⁸ iya na lowiritare inyi wirita nenge lo lohicungi, tonyio orumu inyi loweyaru, itibarahi inyi kito nenge ojo Ben-Oni. Ati ilolong apa nenge inyi ojo Benjamin. ¹⁹ Iya na, owei Racel manyu onuhahini inyi kikoi lo Eprat na lara Betelehem. ²⁰ Icidohi Jakob moru ara wiriti kwecere nenge. Ko jijia ongon na wiriti lo moru litotoro kwecere lo Racel. ²¹ Osodoro Israel ko lotita ari olo ogurohi kema nenge kifwongi lo Migdal Eder. ²² Ko lomanya Israel na faji, olo Reuben ogetore ngorwani lo apa nenge Bilah. Olotu Israel oning na tenya. Ongon afa Jakob ko tee rei tomon ko are. ²³ Tee kulo Lea: Reuben okang lo Jakob, Simeon, levi, Juda, Isaka ko Zebulun, ²⁴ Tee kulo Racel: Josep ko Benjamin ²⁵ Tee kulo Bilah karwaani lo Racel: Dan ko Naptali Tee kulo Zilpa karwaani lo Lea: Gad ko Aser. ²⁶ Tee kulo Zilpa karwaani lo Lea: Gad ko Aser. ²⁷ Ogoru Jakob kang diho apa nenge Isako na longon mamre, na lonyiha Kirias Arba, na lara Hebron lafa faji lomanyare Abraham ko Isako. ²⁸ Itong Isako karihin mia lobito ko keek mietanui. ²⁹ Oto ko wirita wirita nenge lo lohicungi ko weyaru, oite iyo cio kunenge orumu lobolo lomany karihin beciek. Onuk tee kunenge; Isau ko Jakob inyi.