¹ Oto Jakob ko deya, odeu Isau ko kula cio kulenge mia ongon ofwonuno. Oto inyi ko kora tee kiji lo Lea, Racel ko kuna ngorwo karwaak are. ² Ofik inyi ngorwo karwaak ko tee kuneicieng ketemoni, itijifahi Lea ko tee kunenge ititongohi Racel ko kito nenge Josep kifwongi. ³ Inyi token nenge ko loro ketemoni olo ogung kof kakeny mietare langun loloro ketemoni lo rece. ⁴ Ati ife Isau kitiricio Jakob ipusohino inyi imaruk. Oto icieng ko kicira. ⁵ Oto Isau ongolo ko deuno ngorwo ko tee kuneicieng, itifi ojo, "Oho ngai kuno lohilihita ko isi?" Inyiahahi Jakob ojo ara kuno tee kuna licio Lobanga karwaani nino. ⁶ Oto ngorwo karwaak ofwonu ko tee kuneicieng ogungiti. ⁷ Ijifahi Lea ko tee kunenge ofwonu ogung, lohicungi olotu Josep ko Racel ogungiti. ⁸ Itifi Isau Jakob ojo, "Nyio fotiri lo kuno sang lohiric ko nan?" Inyiahahi Jakob ojo, "Kulo rumunore kibaya to ketemoni nino lahitok nei." ⁹ Ati ojo Isau, "Langonore nan beciek rece nei, toricahi kuno litehita isi ara kunino." ¹⁰ Ojo Jakob, "Ida Kalarumu nan kibaya to ketemoni nino, ofotu kuno icioriti to kana nei tonyio ori deya lo komom nino diho nan mejo deya lo komom lo Lobanga iya na lifotunore isi nan to kibaya. ¹¹ Tode, iruho iciorit na liyauni diho isi tonyio lohilwak Lobanga nan manyu langon nan ko sangite fad kuna lawak nan." Tona lifudare Jakob, iruk Isau. ¹² Tinya oto Isau ojo, "Lara lohifwo, ahilik nan ko isi." ¹³ Ati ojo Jakob, "iyen isi lahitok nei jimitan isidiha tee manyu ojir nan aric ikojeha kulo kera, kiri ko kicu. Kalomiri bebe otum kirieho ko kacau oweiha lobito far. ¹⁴ Jijia ilo ketemoni lahitok nei, ingohi nan alotu cafi ko kirieho ko kacau ikojeha ko tee many cia agoru diho isi lahitok nei idi Seir." ¹⁵ Tinyia ojo Isau, "Ingohi hati bo angerihi cio kude kunei kiniemuno isi." Itifi Jakob ojo, "Nyio itiyore isi jii? Kicio ja nan arumu kibaya to ketemoni nino lahitok nei." ¹⁶ Dong tona far iciak Isau owele nenge lo itoro iya Seir. ¹⁷ Jakob oite iya Sukos, faji na lolo inyi oduhohi faji lohitongore nenge ko kifaha twoli kulo sang kunenge. Inyi licio ilolongi na faji ojo Sukos. ¹⁸ Langun lolotu Jakob to Padan Aram, olotu ogoru siti lo Sekem ara na ijir, na longon kof lo Kanaan. Ogurohi inyi kema nenge onyiha ko Sekem. ¹⁹ Inyiangu inyi kof to robia mia lobito iyo tee kulo Hamor, apa lo Sekem, ogurohinore kema nenge. ²⁰ Inyia oduhohi inyi ciali lo kiciorita na lilolong inyi ojo 'El Eloe Israel.