¹ Tona, Isako ko kilolonguno Jakob ko kigata inyi oto ko ciha inyi ojo, "Keyem ngorwani Kanaanani. ² Towoju deu ilo iya Padan Aram iya kolo apa lo iyang nino Betuel. Ilo toyemu ngorwani nino tijia to kiji lo tee kariok kulo Laban rece lo iyang nino. ³ Ingohi Lobanga la lolanyu sangite fad kigatahi isi gum kitipit manyu kitiboreng isi many ilotu ira ilulung lo cio. ⁴ Ingohi inyi kicio isi ko lotataha kunino gum lafa licio inyi iyo Abraham ojir mute ilanyu ene kof jijia limanyare isi, kof lafa licio Lobanga iyo Abraham. ⁵ Oto Isako ocule Jakob olo inyi owele iya Padan Aram iyo Laban kito lo Betuel Aramani rece lo Rebeka na lara ngoto Jakob ko Isau. ⁶ Tinyia olotu Isau oyen ojo ligatahi Isako Jakob gum manyu ocule inyi iya Padan Aram lo rumuno ngorwani tijia manyu ojo langun ligatahi inyi gum, ocik inyi ojo, "Keyem ngorwani Kanaanani.'' ⁷ manyu ojo loning Jakob tenya lo apa nenge ko iyang nenge ko loro iya Padan Aram. ⁸ Isau ko yenun koditi na litilongojitare kuna ngorwo kulo Kanaan apa nenge Isako ⁹ tona inyi ko loro iyo Ismail ko yemuno Mahalat kanece lo Nabiot kito lo Ismail kito lo Abraham osodore kuna ngorwo lotehita inyi. ¹⁰ Owoju Jakob to Beerseba ara na loloro iya Harran. ¹¹ Ojo inyi logoru lobo faji, iyoma inyi ijia tonyio orumu kolong lodoi. Oto odumu lobo moru itenore kue langun logeto inyi. ¹² Oto itirija inyi ojo, odeu inyi lohirwohi na licid fotiri kof ogoru kue many kai manyu iculunitare malaikahin kulo Lobanga manyu irwohoritarehin iya kai. ¹³ Idi kai nenge owoita Lobanga oteny ojo, "Ara nan Lahitok Lobanga lo apa nino Abraham ko Lobanga lo Isako. Ahicio mute nan isi ko lotataha kunino ene kof ligeto isi. ¹⁴ Ori mute lotataha kunino iya fur lo kof manyu isarihi mute isi iya ngati lo kai ko ngati lo orof ko ngati lo okangere ko ngati lo lodoyore lo kolong. Cio fad kulo kof orumu mute gum ara diho isi ko ara diho kinyiemoti nino. ¹⁵ Angon nan ko isi manyu ahiriria cia nan isi fajihit fad kuna lilot isi manyu ahinyiahu cia nan isi ene kof. Ida cia nan ahingohi isi many atii nan tohi na lahicik isi.'' ¹⁶ Kolokwenyu Jakob to jio, oto ibuk ojo, "Dede ongon Lobanga ene faji ida hati orumu nan ayen. ¹⁷ Orumu bangun linief inyi oto ojo, "Itirima ene faji jii! Ida ene ara lobo faji ake ko kaji lo Lobanga, ara ene lokoli lo kai." ¹⁸ Kiwanyi berien odumu Jakob longole moru litenore inyi icidohi ara wiriti ko kijuhohino ngoroni kai nenge. ¹⁹ Ilolong inyi na faji ojo Betel kileng orumu na faji obara Luz. ²⁰ Oto Jakob ko kibutia ojo, "Kolohingon cia Lobanga ko nan manyu kiriria nan iyo ene owele laloro nan, manyu kicio nan daha anyia ko kyelani kulo kiciefita, ²¹ manyu aitu ara na ijir kolo apa nei, oto cia Lobanga ara Lobanga nei ²² oto cia ene moro lacidohi nan ara wiriti ara kaji lo Lobanga. Manyu iyo sangite pili kuna lohicio isi nan, ahicio cia nan isi lobito iyo tomon."