¹ To karihin kulo Amrapel kabu lo Sinar, Ariok kabu lo Elsar, Kedorlama kabu lo Elam ko Tolal kabu lo Goim ² ofwo kuno kabuno kitiremo Bera kabu lo Sodom, Birisa kabu lo Gomora, Sinab kabu lo Adama Sember kabu lo Zeboim ko kabu lo Bela kode Zoar. ³ Ofwonu kuno kabuno lileti to kifwongi imorihini karemok kuneicieng ridat lo Sidim na lara nam lo Balang. ⁴ Itongo afa icieng iyo okabwe lo Kedorlama to karihin tomon ko are ati ofwonu Okom silan iyo kari lo tomon ko uni. ⁵ Iyo kari lo tomon ko ongon olo Kedorlama ko kuna kabuno limora ko inyi olanyu cio kulo Repi to Asteros, cio kulo Karnaim, cio kulo Zup to Kam, cio kulo Fmit to Save Kiriasaim ⁶ ko cio kulo Hor to kof lo donge lo Seir ogoruni many El Paran na lonyiha ko kuny. ⁷ Oto ibeloti ko fworo En Mispat na lara Kades oto ko lanyunoti kof lo cio kulo Amalek fad imoruni ko kof lo cio kulo Amor kuna lorumu omanya Azezon Tamar. ⁸ Oto kabu lo Sodom, kabu lo Gomora, kabu lo Adama, kabu lo Zeboim ko kabu lo Bela na lara Zoar ko kidororo ofwo otuhohini loreunore Sidim ⁹ oraarihin Kedorlama kabu lo Elam, Tidal kabu lo Goim, Amurapel kabu lo Sinar ko Ariok kabu lo Elsar- kabuno ongon isiraniti ko kabuno miet. ¹⁰ Ridat lo Sidim ongon afa ko tulaha kulo odok na irwok, ojo lifeita kabu lo Sodom ko lo Gomora ourohino cio kude katwa lo kuna tulaha ife kula kude dongeco. ¹¹ Obele kuna kabuno sangite kulo Sodom ko Gomora fad ko dahi fahi ko fworoti. ¹² Oyorori ko kito lo rece lo Abraam Lot ko sangite kunenge tonyio omanya afa inyi Sodom. ¹³ Olotu tungani lobo lifeju orihohi Abraam Ibruni, lorumu omanya fotiri lo cianitore lo Mamre na lara Amorani, rece Eskol ko Aner kuna afa lomanya ko Abraam. ¹⁴ Koloning Abraam jimitan liyari kito lo rece ilolong rei kuna litiyeni rem cio Mia uni ko tomon ko mietauni kuna lotomonohini kaji nenge ko tiforo kuna merok many kof lo Dan. ¹⁵ To karwe, okor Abraam karemok kunenge Ipusohini merok ko lanyuno icieng ifuharu icieng many Hoba ngati lo kai lo Damaska. ¹⁶ Oruju inyi sangite ko kinyahuno kito lo rece Lot ko sangite kunenge fad ara Lobito ko ngorwo ko cio kuna kude. ¹⁷ Langun loituno Abraam to rem na lolanyunore Kedorlama ko kula kude kabuno orumu lirumu ko inyi olotu kabu lo Sodom kitirico inyi ridat lo Save (jimitan ridat lo kabuno). ¹⁸ Oto Melkisedek kabu lo Salem iyauno mugati ko vino itongo orumu inyi ara kadwarani lo Lobanga na longon kai noo. ¹⁹ Oto inyi igatahi Abraam gum ojo, “Icio Lobanga na longon kai noo Abraam gum, Lobanga na loduk kai ko kof ²⁰ Manyu maja ongon iyo Lobanga na longon kai noo na licio merok kunino kac kunino”. Oto Abraam icio inyi Lobito iyo tomon kulo sangite fad.'' ²¹ Oto kabu lo Sodom ojo iyo Abraam, “Kicio nan cio isi iyaru sangite”. ²² Ati ojo Abraam iyo kabu lo Sodom, “Abutia nan iyo Lobanga na longon kai noo kaduhoni lo kai ko kof to to tingo lo kac kunei kai ²³ jimitan ida nan aruk lobo tohi lara nino kileng usi kode kofite lo kamuhe ojir ida mute isi ijio latibar nan Abraam”. ²⁴ Ida cia nan aruk kilifuno lobo tohi ingohi acung to tohi na lonyia karemok kunei ko sangite kuna liyaru cio kuna lohilihu ko nan iya Aner, Eskol ko Mamre ingohi icieng iyaru ikoriti kuna locam to icieng”.