¹ Tona otenya afa kof fad tenya lobito. ² Langun lofwo cio iya ngati lo okangere, orumahini faji lo Sinar ko manyati ijia. ³ Oto otenyuni ojo, “ifwonu ngatiduk matafali kifik otoc”, itiyore icieng matafali ara faji lo morutok ko odok ara kidwanyita. ⁴ Oto icieng ojo, “Ifwonu ngafahata kang na hitok ko kaji icadak na logoru olele nenge many kai ojir kikwati ida manyu kisarihi kof fad. ⁵ Ati olotu Lobanga kof deya na kang ko kaji icadak na lifaha cio. ⁶ Ojo Lahitok Lobanga, “Tode kalara icieng cio kuna limoraru otenyati tenya Lobito iciahi kitiyo jii, ida cia lobotohi lowak icieng kitiyo olanyu icieng. ⁷ Ifwonu ingafi kitihalut tenya neicieng ojir ida oningoroti”. ⁸ Tona itisarihi Lobanga icieng tinyia kof pili ko kiticungoti kifaha na kang hitok. ⁹ Inyi licio ilolongi na faji ojo Babel tonyio ara afa ijia itihalutore Lobanga tenya lo kof fad. ¹⁰ Ara ene lorejore lo lotataha kulo Sem. Koloring karihin are tona lokerunore kifi isod kov orumu Sem longon ko karihin mia Lobito olotu otomonu Arpaksad. ¹¹ Langun lotomonu Arpaksad itong Sem karihin keek miet otomonu tee kilahaji kulakude ko kariok. ¹² Kologoru karihin kulo Arpaksad keek uni ko miet, olotu otomonu Sela. ¹³ Langun lotomonu Sela itong Arpaksad karihin mia ongon ko uni otomonu tee kilahaji kulakude ko kariok. ¹⁴ Kologoru karihin kulo Sela keek uni olotu otomonu Eber. ¹⁵ Langun lotomonu Eber itong Sela karihin mia ongon ko uni otomonu tee kilahaji kulakude ko kariok. ¹⁶ Kologoru karihin kulo Eber keek uni ko ongon, olotu otomonu Peleg. ¹⁷ Langun lotomonu Peleg itong Eber karihin mia ongon ko keek uni, otomonu tee kilahaji kunakude ko kariok. ¹⁸ Kologoru karihin kulo Peleg keek uni, olotu otomonu Reu. ¹⁹ Langun lotomonu Reu, itong Peleg karihin mia are ko mietangon otomonu tee kilahaji kunakude ko kariok. ²⁰ Kologoru karihin kulo Reu keek uni ko are, olotu otomonu Serug. ²¹ Langun lotomonu Serug itong Reu karihin mia are ko mietare otomonu tee kilahaji kunakude ko kariok. ²² Kologoru Serug karihin keek uni olotu otomonu Naor. ²³ Langun lotomonu Naor itong Serug karihin Mia are otomonu tee kilahaji kunakude ko kariok. ²⁴ Kologoru karihin kulo Naor keek are ko mietangon olotu otomonu Tera. ²⁵ Langun lotomonu Tera itong Naor karihin mia Lobito ko tomon ko mietangon otomonu tee kilahaji kunakude ko kariok. ²⁶ Kologoru karihin kulo Tera keek mietare otomonu Abraam, Naor ko Aran. ²⁷ Ara ene lorejore lo lotataha kulo Tera. Otomonu Tera Abraam, Naor ko Aran. Olotu Aran otomonu Lot. ²⁸ Orihe monye Tera owar owei Aran to Ur kof lo Kaldaia lotomonore nenge. ²⁹ Oyema Abraam ko rece Naor. Obara afa ngorwani lo Abraan Sarai, obara ngorwani lo Naor Milka ara afa inyi kito lo Aran na lara monye lo Milka ko Iska. ³⁰ Okorif afa Sarai oru lobo kito nenge. ³¹ Odumu Tera kito nenge Abraam ko lotata nenge Lot kito lo Aran ko ngorwani lo kito nenge Sarai ngorwani lo Abraam ko wojunoti ara Lobito to Ur kof lo Kalidaia ko johitati iya Kanaan. Ati ojo icieng ogoru Aran ko manyati ijia. ³² Itong Tera karihin mia are ko miet ko weihino kof lo Aran.