¹ Tinyia ojo Lahitokdiho Moses, "Ingohiti ene faji, isi ko kuno cio liyauno isi to kof lo Ijipt. Ifwo many kof lafa lacik nan to kibutia diho Abraham, Isako ko Jakob ajo, ' Acio cia nan diho lotataha kunino '. ² Acule cia nan Malaika ketemoni ningi ifuhe cio kulo Kanaan, Amor, Hitit, Perez, Hivi ko Jebus. ³ Ifwo kof na litihita lei ko otoro. Ati ida cia nan alo ko ite, tonyio ira ite cio kuna igoli kutuhe, manyu atum nan keruno ite to kikoi." ⁴ Koloning cio kuno tenyitenyi irohori, icahi kitoyo na lida cio icief lobo kiciefita lo ngoto. ⁵ Tonyio orumu Lahitokojo diho Moses, "Torihohi cio kulo Israel tijio, ' Ira ite cio kuna igoli kutuhe. Ngahilik nan ko ite kode to kude faritin kuting, ngahikeru nan ite. Jijia itopucete kitingotiti kuningi ato cia nan aii tohi na ngatii nan ko ite '." ⁶ Tona cio kulo Israel ko puca kingotiti kuneicieng to gum lo donge lo Horeb. ⁷ Tona orumu Moses ogurorita lobo kema oleng to kem faji na iloma gaa, na ilolongi inyi ojo, "Kema lo kirico." Kolowak tungani kitifia Lahitok, olo inyi iya kema lo kirico oleng to kem. ⁸ Manyu kolorutoro Moses kema lo kirico, owoju cio fad owoitati agwalahin kulo kemahin kuneicieng, odeyati Moses many orute katua lo kema. ⁹ Kalolo Moses katua lo kema, olotu wiriti lo idis kof owoita agwala kolotenya Lahitokko Moses. ¹⁰ Tiktik kolodeu cio wiriti lo idis owoita agwala lo kema, owoitati fad iworati lobito lobito to agwala lo kema nenge. ¹¹ Otenyitita Lahitokko Moses tarany iya na lotenyare tungani ko morte nenge. Tinyia oitu hati Moses kem ati kajifitani nenge Joshua kito lo Nun ida ingohi kema. ¹² Ojo Moses diho Lahitok, "Itenyitita isi diho nan ijo, ' Torik kuno cio ' ati ida isi lohicio nan ayen ngai icularu isi ko nan. Ijo isi, ' ahiyen nan isi to karana manyu lirumu isi kisisio iyo nan. ' ¹³ Kalohikwama isi nan, kitiyen nan kikohin kunino ojir nan ahiyen isi manyu asodoro rumuno kisisio nino. Iiyo jimitan ara ene misi lo cio kunino." ¹⁴ Inyiahahi LahitokMoses ojo, "Kilik cia ngonun nei ko ite manyu ahicio cia nan ite kiyoma." ¹⁵ Tinyia ojo Moses diho inyi, "Kalida ngonun nino kilik ko ohoi, kehicule ohoi ten. ¹⁶ Aja cia oyen cio ojo kikwama isi nan kode ikwama isi cio kunino kalida isi kilik ko ohoi? Nyio cia lohikor nan ko cio kunino ko cio kunakude to kof?" ¹⁷ Oto Lahitokojo diho Moses, "Atii cia nan na tohi token litifi isi tonyio ahikwama nan isi manyu ahiyen nan isi to karana." ¹⁸ Tinyia ojo Moses, "Jijia kitotorohi nan kimedek nino." ¹⁹ Oto Lahitokojo, "Acio cia nan jiran nei oring to ketemoni nino manyu alet cia nan karana nei, Lahitokiyo ngonun nino. Atii cia nan kisa iyo kuna latiihino nan kisa, manyu alau cia nan kuna lawak nan launo. ²⁰ Ati ida isi itum deya komom nei, tonyio oru lobo tungani lohideu nan, manyu owar." ²¹ Tinyia ojo Lahitok, "Ongon faji na lohinyiha ko nan na ngiwoita isi kai lo moru, ²² Koloringaru kimedek nei, ahifik cia nan isi iyo borok lo moru manyu ahimuk isi to kana nei many aringe nan. ²³ Ato hati adume kana nei, ito hati isi ideu korwong nei, ati ida odeitati komom nei."